VII
Fun un domingo,
Fun pó-la tarde,
Có sol que baixa
Tras dos pinares,
C’ as nubes brancas
Sombra dos ánxeles,
C’ as palomiñas
Qu’ as alas baten,
Con un batido
Manso e suave,
Atravesando
Vagos celaxes,
Mundos extraños
Qu’ en rayos parten,
Ricos tesouros
D’ ouro e diamante.
Pasin os montes,
Montes e valles,
Pasin llanuras
E soedades;
Pasin os regos,
Pasin os mares,
Con pes enxoitos
E sin cansarme.
—
Colleum’ a noite,
Noite brillante,
C’ unha luniña
Feita de xaspes,
E fun con ela
Camiño adiante,
C’ as estreliñas
Para guiarme,
Qu’ aquel camiño
Sólo elas saben.
Dempois á aurora
Có seu sembrante,
Feito de rosas
Veu á alumbrarme;
E vin estonces,
Antr’ o ramaxe
D’ olmos é pinos
Acobexarse,
Branca casiña
Con palomare,
Dond’ as pombiñas
Entran e sayen.
N’ ela s’ escoitan
Doçes cantares,
N’ ela garulan
Mozos galantes
C’ as rapaciñas
D’ outros lugares.
Tod’ é contento,
Tod’ é folgare,
Mentras a pedra
Bate que bate,
Mole que mole,
Dalle que dalle;
Con lindo gusto
Faille compases.
Non hay sitiño
Que máis m’ agrade
Qu’ aquel muhiño
D’ os castañares,
Dond’ hay meniñas,
Dond’ hay rapaces
Que ricamente
Saben loitare.
Donde rechinan
Hasta cansarse
Mozos e vellos,
Nenos é grandes;
E anque non queren
Qu’ aló me baixe,
Sin qu’ o soupera
Na casa naide,
Fun ó mohiño
D’ ó meu compadre,
Fun pó-lo vento,
Vin pó-lo aire.