»Nä, ich gieh net meh garn ofn Tanzsool! Früher, do tanzet mer sen Walzer oder sen Dreher un war racht garn huppet, dar werget aah emol e Polka runner. Wie hoot mer do die alten Mäd rümgeschlenkert. Ich weß noch ganz gewieß: Wenn en emol net schie war, do machet mer sei zah, zwölf Tourn wag, un do brauchet mer sich net in Bett neizeleng un ze schwitzen. Oder itze? – – Saht när hie!! Erscht laafen se e vertel Stund in Saal rüm, hächstens, daß se emol rüber und nüber tschutschiern; un dobei hobn sie sich aagesackt – – nä, dos macheten mir früher net ofn Tanzsool, do taten mer owarten, bis mer sei Gumfer hamführet. Dann knicken sie wieder emol zesamme, dann schleichen se wieder emol an Buden hie – mer denkt, weß Gott, se wolln Schwamme suchen! Un die Händ dobei! Wie äfällig se de Pfuten spraatzen – mer möcht sprachen: »Wie gesaht –.«
Un die Näme! Hiawatha, Tschimmi, Foxtrutt, Tanko, Boston – nu, zun Dunnerwatter, sei mir dä bei de Schwarzen oder sinst wu! Un dos Gewerg machen net epper bluß de gunge Leit, nä de alten erscht racht! Mer sieht aah an die Tänz ganz genau, wie's heitzetog is: 's macht niemand garn mehr viel!
Der Büttner-Wilhelm war e Maa, dar garn Alles e Bissel garn machet, dan ließ natirlich kaa Ruh, bis 'r aah e Weibsen ahgesackt hatt un miet ofn Sool rümwerget. Mer muß soong: er war dorchaus käner, dar de Hus mit dr Beißzang aazieht, oder esu lecht war dos doch net, wie 'r sichs gedacht hatt. Er tat sich bal de Bä versitzen, un endlich blieb 'r bei ener Säul traten, esu fix fitzet mer sich do net nei! Wie 'r nu e Weil getraaten war, machet dr Schmied-Fritz zu ne hie un freget ne racht scheiheilig: »Nu, Helm, of wos lauerst de dä?«
»Du,« saht dr Halm, »ich wart bluß bis dr Takt kimmt!«