¶ For the gowte in the throte.
When ye se yowre hawke blaw oftyn tymes: and that it commys of no batyng. ye may be sure she hath the gowte in the throte And for that Take the blode of a pekoc. and Encense myrabolanana. and clawis of gelofre. and caneƚƚ and gynger. and take of aƚƚ thes euynlich and medyƚƚ hem with pecokkys blode and seth it tyƚƚ it be thycke. and therof make morcellis. and yeue the hawke therof eueri day. at mydmorne and att Noone.
For the gowte in the hede and ī the Raẏnes.
When ye se yowre hawke may not endew her meete nor remoūte her astate. she hath the gowte in the hede and in the Raynes.
¶ Take Momyan̄ oderwise called momyn̄. among Poticaries ye may haue it. and the skynne of an haare and yeue it to yowre hawke to eete .ix. tymes with the flesħ of a catt. and iff she may holde that meette she shaƚƚ be saafe.
¶ A medecẏne for a sekenes called the fallera
When ye se that yowre hawkes clees wax white: then she has the fallera. For this sekenes take a blacke snake. and cutte a way the hede. and the tayƚƚ. and take the myddyƚƚ. and fry it in an erthyn pote. and take the grece and saue it. and anoynt the flesħ of a pecoke therwith and yeue it to the hawke for to eete viij. days: and ye haue no pecoke yeue hir flesħ of a colu̇ and after the .viij. days yeue hir a chekyn. and wasħ it a littil and yeue it hir to eete. and take the tenderist of the brest withe the ffresheƚƚ bone and let hir eete it. and if she amende anythyng she shaƚƚ be hooƚƚ.
A medecẏne for the crampe in the thigh in the legge and in the fote of an hawke.
When ye se youre hauke lay hir oon fote vppō her oder fote. she is take with the crampe. Then drawe hir blode vppon the fote yt lies vppon that other fote. and vppon the legge also. and she shaƚƚ be hoole.
¶ For the Cogh or the poose.
Take powdre of Bays: and put it vppon the flesħ of a Coluer. and yeue it ofte to yowre hawke and with owte dowte she shaƚƚ be hoole.
¶ A medecẏne for the podagre.
When yowre hawkes fete be swollyn she hath the podagre then Take fresħ may butter and as moch of Oyƚƚ of olyf and of alyn. and chaufe it wele to gedre at the fiere and make therof of anoyntement. and anoynt the fete .iiij. days. and set hir in the sonne. and yeue hir flesħ of a cat. and if that auayƚƚ nott Seth the cuttyng of a vyne. and wrappe it a bowte the swellyng. and let hir sit vppon a colde stone and anoynt hir with butter or freshe grece. and she shaƚƚ be hooƚƚ.
A medecẏne for a sekenes within the bodẏ of an hauke and it shewith not outewarde how she shall be holpen and in what maner.
A man maẏ knaw by the chere. and vngladnes of an hawke this infirmyte bot yit it is straunge to knawe: thyngys that a man may not se: in what sekenes and what maner thay be greuyde and specialli whan a man whote not wherof it commyth ¶ Fede yowre hawke wele vppon an henne and then make her to fast .ij. days after: to avoide weele hir bowellis. The thryd day take hony soden̄ and fyƚƚ hir body fuƚƚ. and bynde hir beke that she cast it not owt of hir body and then set hir owtt in the sonne. and when it drawith towarde euen fede hir with an hoote fowle. for as I herde my maystris say and she be nott hooƚƚ herof. loke neuer oder medecyne.
For the passion that Goshawkis haue fastẏng
¶ Take the Rote of smaƚƚ Rysshes. and make Iuce of hem and weete yowre flesħ therin and make her to eete it.
¶ For hawkis that ben wonded.
Take a way the federis abowt the wonde and take the white of an Egge and Oyle of Olyue. and mediƚƚ it to geder. and anoynt the wonde and kepe it with white wyne. vnto tyme ye se dede flesħ. and then put in the wonde Escompe saƚƚ vnto tyme the dede flesħ be wastyde. after take encence: and clene as myche of that oon as of that oder. mediƚƚ it infere. and whan ye wiƚƚ anoynt the soore heete yowre oyntement and anoynt it with a pen: tyƚƚ the tyme the skynne grow ayenne. and if ye se dede flesħ theron: and woƚƚ haue it a way Take venecreke & then anoynt itt with this Oyntement afforsayde and she shaƚƚ be hooƚƚ
¶ A medecine for an hauke that has the artetik
When ye se yowre hawke fat abowte the hert trust it for trouth she hath the artetike. Therfore do let hir blode in the Origynal vayne. and after that yeue hir a frogge for to eete. &̄ she shaƚƚ be hooƚƚ
A medecine for an hauke combred ī the bowillis
When yowre hawke is Encombred in the bowillis ye shaƚƚ knaw it by hir Eyghes. for hir Eighen wiƚƚ be derke and she wiƚƚ looke vngladli and hir metessing wiƚƚ defowle hir foundement. Then take the hawkes meete and anoynt it with powdre of canneƚƚ and yeue it hir to eete. and she shaƚƚ be hooƚƚ.
¶ A medecẏne for an hawke that has the goute
Fede yowre hawke with an Irchyn onys or twyes. & it shaƚƚ helpe hir:
¶ A medecẏne for an hawke that hath mites.
Take the Iuce of wormewode and put it ther thay be and thei shaƚƚ dye.
¶ That an hauke vse hir craft all the seson to flẏe or lefe.
When ye go to the felde in the latter ende of hawkyng and desire that yowre hawke shaƚƚ vse hir crafte. Do to hir in this maner let hir sle a fowle. and let hir plym vppon it asmoch as she wiƚƚ. and when she hath plymmed Inough go to hir softely for frayng. and rewarde hir on the fowle. and after that ye may cast hir on a perch. & asweƚƚ she may vse hir craft so. as that she slew aƚƚ the yere.
¶ A medecẏne for an hauke that has the stoon
¶ Anoynt hir fundement with Oyƚƚ. and put the powder of alym with an hole straw.
¶ Also take an herbe callid cristis lardder. & anoynt hir mowthe within and she shaƚƚ be hooƚƚ.
¶ Also take smale flambe rotis and polipodi and the cornes of sporge and grinde it weeƚƚ and seeth it in butter. and drawe it thorugh a clooth. and make throf .iij. pellettis of the grettenes of a Not. and put it in his mowth in the morowtide. and loke that she be voide. and then let her fast tiƚƚ euensong. and fede hir littiƚƚ and littiƚƚ. and she shaƚƚ be hooƚƚ.
¶ A medecẏne for vermẏn.
Take the Iuce of the Roote of ffeneƚƚ. and do it where the vermyn be. and thay shaƚƚ dye.
¶ A medecine for the Reume that haukis haue
When ye se yowre hauke cloose her Eyghen. and shakith hir hede. then hath she the Reume in the hede. Therfore yeue hir larde of a gote the first day and the secunde yeue hir epatike with the flesħ of a chycon and she shaƚƚ be hooƚƚ.
¶ A medecẏne for haukis that bene drẏ and desẏre to drẏnke, to kepe hem moẏst in kẏnde.
¶ Take the Iuce of haarhounde and weete thyn hawkys mete therin. and fede her therwith onys or twyes. and she shaƚƚ be hooƚƚ.
For sekenes that haukis haue ī their Entrellis.
An hawke that is seke withi thentrayles: is of an oder aray then in oder sekeneses. for if she holde not her mete bot cast it. that is tokyn of the foule glet. for surfete of federis that be yeuen to hawkis in theyr yowth and afterwarde when thay come vnto trauayƚƚ. and ben anoyde of the Reuer then thay waxen slow to flye and desire forto rest. and when thauke is vppon hir perch then she wiƚƚ slepe forto putouer. at thentrīg and if she holde flesħ any while in hir goorge: it wiƚƚ loke as it wor sooden and when she is waked she assayeth to put ouer at thentryng. and it is agluttide and colded: with the glett yt she hath engenderid. and if she shulde ascape she most put ouer. or ellis she most dye. or cast it and if she cast it she may be holepe with the medecyne.
¶ A medecẏne for the Entreẏllis.
Take yolkys of Egges rawe. and whan they be wele beton to geder. put therto spanyshe salte. and as mych hony therto. & weete therin thy fleshe. and fede thyn hawke .iij. days therwith and if she make daunger to eete it. let holde thyn hawke. and make hir to swalow .iij. or .iiij. morcellis in a day. and securli she shaƚƚ be hooƚƚ ¶ Yit I shaƚƚ say to yow a noder thyng. take hony at the choungyng of the moon. and a kene nettyƚƚ and therof make smaƚƚ powdre and when it is weƚƚ grownde. take ye brest boon of an henne. and a noder of a coluer. and hakke it with a knyfe. and do a way the skynne. and do theron the powdre and aƚƚ hoote with the powdre fede hir. and do so thries. and she shaƚƚ be hooƚƚ.
¶ For sekenes of Swellẏng.
Iff an wicked felon be swollyn in sich a maner yt a man maȳ heeƚƚ it. that the hawke shaƚƚ not dye thus a man may helpe hir strongly. and lengthe hir lyfe. bot the hawke wiƚƚ be very eegre and glettous of the seekenes. and therfor ye moost Take the Rote of comfory and sugre iliche mych. and sethe it in fresħ grece with the thridde parte of hony. and then draw it thorogh a fayre clooth. and oft yeue it to the hawke and she shaƚƚ amende.
For blaẏnis ī haukes mouthes cald frounches
Off the frounches it is dredde for hawkes. for it is aṅoyus sekenes. and drawith hir to deth. and with holdeth hir strengthe. for men sayn that it commyth of colde. For colde doth hawkes mych harme. and makyth flewme faƚƚ owte of the brayne &̄ the Eyghen wiƚƚ sweƚƚ and empeyre in her hede. and bot she haue hasteli helpe it wiƚƚ stoppe her nase thrillis. And therfor Take Feneƚƚ Maryaƚƚ and Kersis ilich moch. and sethe it & draw it thorough a cloth. and oderwhiles: wasħ her hede therwt and put som in the Roofe of her mowth. and she shaƚƚ be saafe
¶ A medicine for an hauke that castis hir flesh
Wete hir fleshe in sarfoiƚƚ or ellis seeth Rafne in water and put her fleshe therin: when it boylith.
¶ A medecẏne for the Reume clepid Agrum
¶ When thou seeth thy hauke vppon his mouth and his chekis blobbed. then she hath thys sekenes calde Agrum. Therfor take a nedeƚƚ of siluer and hete it ī the fire. and brynne the Narellis thourogh owte. then anoynt it with oyle of Olyff.
¶ For to make an hawke grete and fatte.
Take a quantyte of poorke and ony and butter Iliche myche and porgede grece and do a way the skynne. and sethe hem to geder. and anoynt thy flesħ therin. and fede yowre hawke therwith. and she shaƚƚ encrece myghtely. Ellis take the wynges of an Eued. and fede hir and kepe hir from traueƚƚ and do so ofte though the eued be neuer so fatte. and if yowre hawke be not passing fat within a fortenet wondre I thynke.
¶ For booches that growe in an hawkis Iowe
Kutt theys botches with an knyfe. and let owte the mater of theym. and after clense theym clene with a syluer spone or ellis fille the hooƚƚ with a powdre of arnement Ibrent. and vppon that powdre do a littiƚƚ larde: that is resside and so it wiƚƚ a way.
Here is a goode medecẏne for an hawke that wyll not coom to Reclaẏme.
¶ Take fresħ butter and put therto sugre and put it in a clene cloth and Reclayme her to that and kepe it in a box in youre. bagge.
A medecẏne for hawkis that bene Refreẏned.
When ye se yowre hawke Nesyng and Castyng wat thorogh her Nostrellis or hir nares then dowteles she is Refraned. For that sekenes: take ye greynes of shaffelegre and of peper and grynde it weeƚƚ. and temper it with strong vynegre and put in hir Nares and in the Rooff of hir mowth and yeue hir flesħ to eete. and she shaƚƚ be saaff.
A medecẏne for hawkẏs that haue paẏne in theẏr croupes.
¶ Ye shaƚƚ take fayre Morsum and poudre of gelefre: and meddiƚƚ it to gedre. and yeue it to yowre hawke to eete. and if she holde it past the secunde day after. she shaƚƚ be hoole.
A medecẏne for the stoone in the fundement
¶ When yowre hawke may not metese then she hathe thatt sekenes calde the stoon. And for this sekenes: ye shaƚƚ take the hert of a swyne and the grece of a swyne. and cutt it with the flesħ of the hert and she shaƚƚ be holpe.
¶ A medecẏne for the drẏ Frounce.
For thys sekenes take the Roote of Pillipody that growth vppon Okys. and seth it a grete while then take it fro the fire and let it stonde and wax lew warme. then wasħ yowre flesħ therin. and feede yowre hawke .iij. tymes. and she shaƚƚ be hoole
¶ A medecẏne for wormẏs called anguellis
Take pressure made of a lombe that was borne in vntyme &̄ maake therof .iij. morcellis and put it in a gut of a coluer and fede her therwith and loke the hawke be voide when ye yeue hir thys medecyne.
¶ Also take Iuce of dragonys and put fuƚƚ the gut of a pegion and then cut it and departe it as the hawke may ouerswolow it. and put it in his body. and knytt his beke for castyng
¶ Also yeue hir the ballockys of a Buc as hote as thay ben cut owte. and make powdre of the pyntyƚƚ and cast it vppō the flesħ of a Cat. and fede her therwith & she shaƚƚ be hooƚƚ.
An hawke Tẏrith. Fedith. Goorgith. Bekith. Rousith. Enduẏth. Mutith. Perchẏth. Ioẏkith. Puttithouer. Proẏnẏth. Plommẏth. She warbullith. and mantellith.
She tyrith vppon Rumppys. She fedith on aƚƚ maner of flesħ. She goorgïth when she fillith hir goorge with meete. She bekyth when she sewith: that is to say she wypith hir beke. She Rousith when she shakith aƚƚ hir federis and hir body to gedre. She Enduyth when hir meete in hir bowellys faƚƚ to digestion. She mutith when she auoydith hir order. She perchith when she stondyth on any maner bowe or perch. She Ioykith when she slepith. She puttithouer when she Euoidith hir meete owte of hir goorge in to hir bowillis. She proynith when she fetchyth oyle with hir beke ou̇ hir tayle and anoyntith hir fetr & hir federis. She plōmyth when she pullith federis of any fowle or of any other thyng and castys hem from her She warbbelyth when she drawith booth her wyngys ouer the myddys of her boeke. and ther they mete both and softely shakyth them. and let hem faƚƚ ayen. And she mantyllith when she stretchith her oon wyng a long after her lege. and afterwarde that other wyng. and moost comynly she doth that affore or she warbelyth hir.
¶ The namẏs of a Spare hauke as Ostrigers and Sparuiters haue determẏned
Ther is a question axyd whether a man shaƚƚ caƚƚ a spare
hawke Or a spere hawke Or an aspere hawke. & Ostrigers.
and also Sparuiters: sayen she may be callid aƚƚ .iij.
Namys. for thees resonys. She may be callid a Spere hawke
for of aƚƚ the hawkys that ther be she is moost spere. that is to
say moost tendre to kepe. for the leest mysdyetyng and mysentendyng
sleth
¶ Also she may be calde an aspare hawke of sharpenesse
of hir corage. and of hir lokyng quicly. and also of her fleyng
For she is moost asper and sharpe in aƚƚ thyngꝭ that belong
vnto hir of any other hawkys
¶ She may be also callid a spare hawke for .ij. Resones. oon
is she sparith goshawkys and tercellys both. siche as ben in
their soore aage. vnto tyme thay may be Reclaymyd. and made
redy to flye. as Goshawkys and tercellys that be not fully
mewed: vnto tyme they may be clene ensaymyd and redy to
flye. for aƚƚ the whyle thay bene vnabuƚƚ. the spare hawke occupithe
thesseson. and sleth the partrich weeƚƚ. that is to say froom
saynt Margaritys day vnto it be lammas. and so forth in the
yere.
¶ And she wyƚƚ slee weeƚƚ yong fesawntis: yong heth cockys
in the begynnyng of the yere. And after Michelmas whan partriches
passe her daunger I haue seen them made sum to sle the pie
sum to sle the Tele vppon the Reuer: at the Iutte. sume to sle
the wodecok and sum for the blacke bride and the thrushe.
¶ The wodecok is comborous to sle: bot if ther be crafte. therfore
when ye come to a wode or a quech of bushus. cast yowre
sparehawke in to a tre and beete the busħes then and if any wodecok
a rise she wiƚƚ be sure therof. ¶ Ye most first make hir
to a fowle cast vp owt of the bushes. and yowre hawke most
sit on loofte as ye make hir to a partriche. Also as I sayde ye
may caƚƚ hir a spare hawke: for an oder cause. for and ther weer
a shippe fraght fuƚƚ of hawkis. and no thyng ellis. and ther were
a spare hawke among thaym ther shuld no custom be payd because
of hir. And so for the most comune name thay be calde spare
hawkes for the resones a forsayd.
An hawke flieth to the vew to the Beke. or to the Toll. Nō Crepe Querre Fer Iuttẏ &ċ
An hawke fleeth to the Ryuer dyuersis ways. and slethe the fowle dyuerli. That is to say she flieth to the vew or to the beke. or to the toƚƚ. & aƚƚ is bot oon. as ye shaƚƚ knawe here after She fleeth also to the quarre: to the crepe. and no mo ways bot thoos .iij. And she Nymmyth the fowle at the fer Iutty or at the Iutty ferre.
Now shall ẏe knaw what theis termes betokẏn & moo folowẏng. as Hut. Iuttẏ ferrẏ. Mounte Raundon. Crepe. Ennewed.
A Goshawke or a terceƚƚ that shaƚƚ flee to the vew. to the
toƚƚ or to the beke. in this maner she is taught ye most
fynde a fowle in the Reuer or in a pitte preueli. and theen sett
youre hauke a grete space of. vppon a mooƚƚ hiƚƚ or on the grownde.
and crepe softeli towarde the fowle: from yowre hawke
streght way and when ye come almost ther as the fowle lyeth.
looke backewarde towarde the hawke. and with yowre hande or
with yowre tabur styke: becke yowre hawke to come to you. and
when she is on wyng. and comyth low bi the grounde. and is almost
at yow. then smyte youre tabur. and cry huff. huff. huff
and make the fowle to spryng. and with that noyse the fowle wil
rise and the hawke wyƚƚ nym it.
¶ And now take hede. Iff yowre hawke nym the fowle at the
fer side of the Ryuer or of the pitt from yow Then she sleeth the
fowle at the fer Iutty and if she slee it vppon that side that ye ben
on. as it may hape dyuerse times. Then ye shaƚƚ say she hath sleen
the fowle at the Iutty ferry.
¶ Iff yowre hawke nym the fowle a lofte: ye shaƚƚ say she toke
it at the mounte or at the souce.
¶ And if the fowle spryng not bot flee a long after the Reu̇
and the hawke nym it then. ye shaƚƚ say she slew it at the Raundon̄.
¶ Creepe.
And yowre hawke fleeth at or to the Creepe when ye haue yowre hawke on yowre fyst and crepe softely to the Ryuer or to the pit. and stelith softeli to the brynke therof. and then cry huff. and bi that meane Nym a fowle. Then it is slayn at the Crepe oder at the fer Iutty. or at the Iutty ferry. as a booue is sayde.
¶ And if it happyn as it dooth oftimes the fowle for fere of yowre hawke woƚƚ spryng and faƚƚ ayen in to the Ryuer. or the hawke sees hir. and so lie styƚƚ and dare not arise. ye shaƚƚ say then yowre hawke hath ennewed the fowle in to the Ryuer. ond so shaƚƚ ye say and ther be moo fowles in the Ryuer then thatt yowre hawke nymmyth if thay darenot arise for fere of yowre hawke
¶ A thefe.
Understonde ye that a Goshawke shulde not flie to any fowle of the Ryuer with bellis in no wise. and therfore a Goshawke is calde a theef.
¶ Querre.
And yowre hawke fleeth to the querre. when ther be in a stobuƚƚ tyme Sordes of mallardes in the felde and when she espith theym and commyth couerte her selfe. and flie preuyli vnder hedges or law bi the grownde. and nym oon of hem. or thay rise then ye shaƚƚ say that the fowle was slayn at the querre.
Merke this terme draw
Som folke mysuse this terme draw. and say that thayr hauke wiƚƚ draw to the Ryuer. And that terme draw is propurli assigned to that hawke that wiƚƚ slee a Roke or a Crow or a Reuyn: vppon a londe sittyng. and then it most be sayd that sich an hawke wiƚƚ draw weeƚƚ to a Rooke.
Take a tame Malarde and set hym in a fayr playn. and let hym goo where he wiƚƚ. then take yowre hawke vppon yowre fist. and goo to that playn. and holde vp yowre hande a praty way of from the Malarde. and looke if the hawke can espie it. by hir awyn corage and if she haue fowude the fowle and desire to flee ther to. let hir slee it. and plymme weƚƚ vppon hir. and serue her so .ij. or .iij. tymes and then she is made to the quarre.
I haue knawyn gentylmen that whensoeuer and whersoeuer thay se any tame Dookes. and if theyr hawkys wolde desire to thaym. then thay wolde let flee to theym in coragyng theyr haukys to be weeƚƚ fleyng to the quarre an oder tyme.
A pratẏ craft to take an hawke that is brokẏn owt of mew. and all maner of fowlẏs that sẏt in trees if a man wẏll.
Looke where an hawke perchith for aƚƚ nyght: in any maner place. and softe and layserly clymbe to her with a sconce or a lanterne that hath bot oon light. in yowre hande and let the light be towarde the hawke so that she se not yowre face and ye may take hir by the leggys or oder wise as ye lyst. and in lyke wise aƚƚ other maner fowle.
Of hawkẏs Bellẏs.
The bellis that yowre hawke shaƚƚ wheer looke in any wise
that thay be not to heuy ouer hir power to weyr. also
that noon be heuyer then an other bot like of weyght.
Looke also that thay be sonowre and weƚƚ sowndyng and shil
and not both of oon sowne: bot that oon be a semytoyn vnder
a noder. and that thay be hoole and not brokyn and specialli
in the sowndyng place. For and thay be brokyn thay wyƚƚ sowne
fuƚƚ dulli.
Off spare hawke bellis ther is chooce and lyttiƚƚ of charge
of thaym: for ther beeth plenty.
¶ Bot for Goshawkes somtyme Bellis of Melen were
calde the best. and thay be fuƚƚ goode for thay comunely be sownden
with siluer and solde ther after. Bot ther be now vsed
of Duchelande bellys: of a towne calde durdright. and thay
be passing goode. for thay be wele sortid weƚƚ sownded. sonowre
of Ryngyng in shilnes and passing weƚƚ lastyng.
¶ Here endyth the proceis of hawkyng. And now foloys the naamys of aƚƚ maner of hawkys &̄ to whom they belong.
¶ Theẏs haukes belong to an Emproure
Theys be the names of aƚƚ maner of hawkes. First an Egle. a Bawtere. a Melowne. The symplest of theis .iij wiƚƚ slee an Hynde calfe. a Fawn̄. a Roo a Kydde. an Elke. a Crane. a Bustarde a Storke. a Swan̄. a Fox in the playn grownde. And theis be not enlured. ne reclaymed. by cause that thay be so ponderowse to the perch portatiff. And theis .iij. by ther nature belong to an Emprowre.
¶ Theis hawkes belong to a kẏng.
Ther is a Gerfawken. a Terceƚƚ of a gerfauken. And theys belong to a kyng.
¶ For a prẏnce.
Ther is a Fawken gentiƚƚ. and a Terceƚƚ gentiƚƚ. and theys be for a prynce.
For a duke.
¶ Ther is a Fawken of the rock. And that is for a duke
For an Erle.
¶ Ther is a Fawken peregryne And that is for an Erle
¶ For a Baron.
Also ther is a Bastarde and that hauke is for a Baron
Hawkes for a knẏght
¶ Ther is a Sacre and a Sacret. And theis be for a Knyght.
Hawkis for a Squẏer.
¶ Ther is a Lanare and a Lanreƚƚ. And theys belong to a Squyer.
For a ladẏ
¶ Ther is a Merlyon. And that hawke is for a lady
An hawke for a ẏong man
¶ Ther is an Hoby. And that hauke is for a yong man And theys be hawkes of the towre: and ben both Ilurid to be calde and reclaymed
¶ And ẏit ther be moo kẏndis of hawkes
¶ Ther is a Goshawke. and that hauke is for a yeman
¶ Ther is a Terceƚƚ. And that is for a powere man.
¶ Ther is a Spare hawke. and he is an hawke for a prest
¶ Ther is a Muskyte. And he is for an holiwater clerke
And theis be of an oder maner kynde. for thay flie to Querre and to fer Iutty and to Iutty fferry.