In so moch that gentiƚƚ men and honest persones haue greete delite in haukyng and desire to haue the maner to take haukys: and also how and in waat wyse they shulde gyde theym ordynateli: and to knaw the gentiƚƚ termys in communyng of theyr haukys: and to vnderstonde theyr sekeneses and enfirmitees: and also to knawe medicines for theym accordyng. and mony notabuƚƚ termys that ben vsed ī hawkyng both of their haukys and of the fowles that their hawkys shaƚƚ sley. Therfore thys book fowlowyng in a dew forme shewys veri knawlege of suche plesure to gentiƚƚ men and ꝑsonys disposed to se itt.
Thys is the maner to begynne to kepe hawkys: bot not aƚƚ maner hawkys. bott oonli Goshawkys: and Tercellis of Goshawkys. and spare hawkys. and in watt maner thay shaƚƚ be taake.
The maner to speke of hawkis fro an eeg to thei be habuƚƚ to be takene.
Now to speke of hawkys. first thay been Egges. and afterwarde
they bene disclosed hawkys. and communeli goshawkys
been disclosed. as sone as the choughe and in some place
more tymeli after the contre is of hete. and tymeli bredyng.
¶ And we sħaƚƚ say that hawkis doon Eyer. and not brede.
in the woodes. And we shaƚƚ say that howkys doon draw when
they bere tymbering to their nestes. and nott they beld ne make
ther nestes And in the tyme of their loue they caƚƚ. and not
kauke. And we shaƚƚ say that they trede.
¶ And when they bene vnclosed and begynneth to feder any
thyng of lengthe Anoon be kynde they wiƚƚ draw somwatt out
of the nest: and draw to bowis. and come agayn to ther nest
And then thay be clepit Bowessis ¶ And after saynt Margaretis
day thay wiƚƚ flie fro tree to tree. And then thay bene
calde Brawncheris. And then it is time for to take hem
¶ And .vij. nighttis be fore saynt Margaritis day &̄ .vij.
nightis after is beste takyng of spare hawkes.
How ẏe shall demeẏn ẏow ī takẏng of hawkis & with wat instrumētis & how ẏe shall kide them
Who so wiƚƚ take hawkes he must haue nettis wich ben kalled vrines and tho must be made of good small threde. and it hade need to be died other green or blwe for espieng of thee hawke. and he most take with hym needeƚƚ and threde to ensile the hawkes that ben takien. And in this maner they must be ensiled. Take the needeƚƚ and threde: and put it thorow the ouer igh lid and so of that other. and make hem fast vnder the beke: thatt she se neuer a deeƚƚ and then sħe is ensiled as she awthe to be. Sum vsen to ensile hem with the needer igh lidde a bone the beke on the hede almost: bot that is the wors way For of reeson the ouer igh lidde closith more iustly then the nether be cause of the largenesse. When she is ensiled then bere thi hawke home on thi fiste and cast hir on a perch and let hir stande ther a night and a day and on that other day towarde eeuen. then take and cut eseli the thredes and take hem a way softeli for brekyng of the lyddis of the ighen. Then softe and faire begynne to fede her. and fair fare with her tiƚƚ sħe wiƚƚ sitte weeƚƚ vppon the fist. For it is drede for hurtyng of hir wengys. And then thessame night after the fedyng wake her aƚƚ nyght and the morow aƚƚ day. Then shee wiƚƚ be preui Inowgh to be reclamed. And the first meete that she shaƚƚ eete: lett it be hoot. and yeue her Inough ther of
Whan ẏowre hawke maẏ be draw to reclaẏme and the maner of hir dẏette
And if yowre hawke be harde pennyd: she may be drawne to be reclaymed For aƚƚ the while that she is tender pennyd: she is not habuƚƚ to be reclaymed ¶ And if she be a Goshawke or Terceƚƚ that shaƚƚ be reclaymed euer fede hym with wasħe meete at the drawyng. and at the reclaymyng. bot loke that hit be hoote. and in this maner wasħe it. Take the meet and go to the water and strike it vpp and downe in the water. and wringe the waater owte. and fede hir ther with and she be a brawncher. And if it bene an Eyesse thow most wasħ the meete clenner then ye doo to the brawncher. and with a linne cloth wipe it and fede hir. And euermore the thrid day yeue her castyng when she is fleyng if she be a Goshawke or Terceƚƚ in this maner: Take new blanket cloth and cut .v. pelettis therof of an inche longe. And take the flesħ and cutt .v. morceilis: and withe a knyues poynt make an hoole in eueri morceƚƚ. and put therin the pellettis of cloth. and take a fair disħ with water and put hem therin. Then take the hawke and yeue her a morceƚƚ of hoote meete the mowntenawns of halfe hir sooꝑ. Then take hit that lyth in the waaṫ. and fede hir for aƚƚ nyght.
How ẏe shall fede ẏowre hawke. and to knawe hir infirmiteis. & ther bene monẏ diueris of them
If yowre hawke be a spare hawke: euer fede hir with vnwascħ meet and looke that hir castyng be plumage. than looke that it be cleyn vnder the perch. and in the morow ye shal fynde the castyng vnder the perch. and ther ye shaƚƚ knowe whether the hawke be clene or noo. For sum gobbit wiƚƚ be yolow and sum greene. and sum glaymous. and sum cleere And if itt be yolow she engenderith the frounce. the wych is an eueƚƚ that wiƚƚ riese in the mowothe or in the cheke. And if it be grene. she engenderith the Ry. The condicion of this eueƚƚ is this. it wil arise in the hede and make the hede to sweƚƚ. &̄ the iyen aƚƚ glaymous. and dyrke· and bot it haue helpe: it wiƚƚ downe in to the legges. and maake the legges to rancle. and if it goo fro the legges in to the hede a gayne. thi hawke is bot loost. And if it be glaymous and roping she engenderith an eueƚƚ callid the Cray. that is whan an hawke may not muteyse
Merke wele ẏowre medicines here folowẏng
¶ A medicine for the frounce ī the mowth
Take a siluer spoone and put the smaƚƚ ende in the fyre tiƚƚ it be hoote. Then let holde the hawke and oppyn hir beke and brin the soore and anoynte it with the mary of a goose that hathe lyne longe. and she shaƚƚ be hoole. And if the frounce be wex as greete as a note. Than ther is a grubbe ther in. and then thow most cutt it with a Rasure in this maner. Lette hoolde the hawke: and slitte ther the soore is. and thew shalte fynde ther as it ware the mawe of a pegeon. Take it owte aƚƚ hoole. and take a payre of sheeris and cutt the hoole of the soore. and make it as fayre as ye may with a lynne cloth. and wipe clene the bloode a way. and anoynt the soore with bawme .iiii. dais arewe and afterwarde with papylyen. tiƚƚ it be hoole.
¶ how the frounce commẏthe.
The frounce commyth whan a man fedith his hawke withe Porke or cattis flesħ .iiii. days to geyder.
¶ how the Rẏ commẏthe.
For defawte of hoote meete this sekenese the Ry commyth.
¶ how the Craẏ commẏthe.
The Cray commyth of wasħ meete the wich is wasħ withe hoote water in the defawte of hoote meete. Also it commythe of thredis the wtch ben in the flesħ that the hawke is fedde with. For though thow pike the flesħ neuer so clene. yit thow shalte fynde thredes ther in.
¶ whan thẏn hawke shall bathe hẏm.
And euermore ech thridde day let thyn hawke bathe hym. aƚƚ the somer if it be mere wether. and onys in a weeke in wynter if it be fayre wether. and not ellis. And whan thow bathes thy hawke: euer yeue hir a morceƚƚ of hoote meete vnwasħ though she bene a Goshawke.
How ẏe maẏ cawse ẏowre hawke to flẏe withe a currage in the morow.
Iff ye wiƚƚ that yowre hawke flye in the morowtide. fede hir the nyght before with hoote mete. and wasħ thessame meete in vreyne and wryng owt the water clene. and that shaƚƚ make hir to haue lyst and currage to flie ī the morow in the best maner.
How ẏe shall gẏde ẏow if ẏowre hawke be full goorged and ẏe wode soone haue a flẏght.
Iff yowre hawke be fuƚƚ goorged. and that ye wold soone vppon haue a flighte take .iij. cornes of whete. and put hem in a morceƚƚ of flesħ. and yeue thessame morcellie to the hawke. and she wiƚƚ cast anoon aƚƚ that she hath with in her. and anoon after that she hath cast. Looke ye haue a morceƚƚ of hoote meete to yeue hir ¶ And if yowre hawke be ouergoorged. yeue her thessame medesyn.
¶ A medecẏne for the Rẏ
Take dayses leeuys. and stampe hem in a morter. and wrynge owt the Iuse. and with a penne put it in the hawkis nares Ones or twyes whan the hawke is smalle goorged. and a non after let hir tyre. and she shaƚƚ be hoole as a fysħ ¶ Or ellis take percelli Rootis and serue hir with theyem in thessame maner. and when she tyrith holde rew ī yowre honde with the tyring and that shaƚƚ make hir voide. bot it is perlous to vse it often that the Iuce faƚƚ ner spryng in to hir yghes.
¶ Also and ye yeue yowre hawke fresħ butter or the marow of hogges that is in the bone of the butte of porke. it shaƚƚ make hir to cast water wele at the nares. and it will kepe the nares opyn. bot it wiƚƚ make hir hawtyn and prowde
¶ A medecẏne for the Craẏ & moo folow
Take and chafe with yowre hondys the fundement of yowre hawke with luke water a longe tyme. and after that take the powder of Saxifrage or ellis the powder of Rewe. and a quantite of may butter. and temper hit weeƚƚ to geder tiƚƚ thay ben euen medlide. than putte it in a littyƚƚ box and stoppe it faste. & as oftyn as yow fede yowre hawke an hoole meele anoynt hire meete a littyƚƚ ther with. and that shaƚƚ make hir to loue meet the bettir for loue of the oyntement. and it shaƚƚ saaue hir fro the Cray and from mony oder sekeneses: that gender ofte in an hawke.
¶ Also take the hoote hert of a swyne or of a pigge and feede her .ij. days therwith. and she shaƚƚ be hoole.
¶ Also take porke and weete it in hoote mylke of a cowe. &̄ fede the hawke therwith. and that shaƚƚ make hir mutyse att the best.
¶ Also poorke with the mary of the boon of the but of porke shaƚƚ make hir mutise &̄ fede hir with booth to geder.
¶ Also vse hir to fresh butter and it wiƚƚ doo thessame.
¶ Also oon mele or .ij. at the most of the hoote leuer of a pig shaƚƚ make hir to mutyse weele. be ware ye yeue hir not to grete a goorge therof. for it is a perlous meete
¶ Also take ye white of an egge. &̄ labur thessame ī a spoge as weele as ye wolde make glayre for rede Inke tiƚƚ it be like wat̄. put thessame ī a vesseƚƚ. & let the meete yt shaƚƚ be for hir soꝑ: ly a stepe ther in aƚƚ the day be for. &̄ at night fede hir therwt and that the wich shaƚƚ be for hir dyner in the mornyng let it ly aƚƚ the nyght. bot in any wyse that ye haue alway fressħ gleyre. and if hir fedyng be poorke it is the bettir. yt is proued
¶ The kẏndeli termis that belong to hawkis
In the begynnyng of kyndeli spech of the termys that belong to hawkys here ye may fynde theym ¶ The first is holde fast at aƚƚ timys. and specially whan she batith. It is calde batyng. for she batith with hir selfe most oftyn causeles
¶ The secunde is rebate youre hawke: to yowre fyst. & thatt is whan yowre hawke batith. the leest meuyng that ye can make with yowre fyst she wiƚƚ rebate ayen vppon yowre fyst
¶ The thride is feede yowre hawke. and not gyue hir meete ¶ The fawrith is an hawke snytith. or sewith hir beke and not wipith hir beke ¶ The .v. youre hauke Ioukith. and not slepith ¶ The .vi. youre hawke proynith. and not pikith and she pronyth not bot whan she begynnyth at hir leggys. and settheth moystour like oyle. at hir taiƚƚ. and bawmeth hir fete &̄ strikyth the federis of hir wynges thorow her beke. and it is calde the note. than as she fetchis the oyle. And ye shaƚƚ vnderstonde an hawke wolde not be letted of hir proynyng. For that tyme that she proynyth she is lykyng and lusty. and whanne she hathe doone she wiƚƚ rowse hire myghtyly.
And sum tyme yowre hawke cowntenansis as she piked hir. and yet she proynith not. and then ye most say she Reformith hir federis and not piketh hir federis. ¶ The .vij yowre hawke colyeth and not beckyth ¶ The .viij. she rowsith and not shakith her selfe ¶ The .ix. she streynith and not Clithith nor Cratchith ¶ The .x she mantellith and not stretchith whan she puttith her leges from hir oon after an other: and hir wynges folow after hier leggꝭ. then she dooth mantiƚƚ hir and whaan she hath mantilled hir and bryngith booth her wynges to geider ouer hir backe ye shaƚƚ say yowre hawke warbellith hir wynges. and that is oon terme dewe therfore ¶ The .xi ye shaƚƚ say yowre hawke mutessith or mutith and not sklysith. ¶ The .xij ye shaƚƚ say cast yowre hawke to the perch. and not set youre hawke vppon the perch.
Here shal ẏe vnderstonde furthermore other maner of termẏs that belong vn to hawkis for to cōmende them for diuerse of theẏre propirteis
First ye shaƚƚ say This is a fayr hawke. an hudge hauke a longe hawke. a short thike hawke. &̄ say not this is a grete hawke. also ye shaƚƚ say this hauke has a large beke Or a shortt beke. and caƚƚ it not bille. an hudge hede or a smaƚƚ hede fayre sesoned ye shaƚƚ say yowre hawke is fuƚƚ goorged and not cropped. and yowre hawke puttithouer and endueth. and yet she dooth booth dyuersely.
¶ How ẏowre hawke puttithouer
An hawke puttithouer when she remeuith the mete from hir goorge in to hir bowillis. And thus ye shaƚƚ knawe it whan she puttithouer she trauersith withe hir bodi. and specialli with the necke: as a Crane doothe or an other bridde
¶ whan ẏe shall saẏ enduth & embowellid
An hawke enduth neuer as long as hir bowillis bene fuƚƚ at her fedyng. bot assone as she is fedde. and restith she enduthe littiƚƚ and littiƚƚ. And if her goorge be wide and the boweƚƚ any thyng stiffid. ye shaƚƚ say she is embowellid and hath not fully endewed and as long as ye may fele any thyng in hir bowellis it is perlous to gyue her any mete.
¶ Merke well theẏs termẏs folowẏng
Say an hawke hath a long wyng. a faire long tayƚƚ with vi barris owt. and stondith vppon the .vii. This hawke is entirpenned That is to say when the federis of the wynges bene bitwen the body and the thighis. This hawke has an hudge legge or a flat leg. or a rownde legge. or a faire enserid legge
¶ To knawe the maill of an hawke
Hawkes haue white maiƚƚ. Canuasmaiƚƚ or Rede maiƚƚ. And som caƚƚ Rede maiƚƚ Iren mayƚƚ. white maiƚƚ is soone knawe. Canuasmaiƚƚ is betwene white maiƚƚ and Iron maiƚƚ. And Iron maiƚƚ is varri Rede.
¶ Plumage. and Caste ẏowre hawke.
¶ A Goshawke nor a terceƚƚ in thare sore aage haue nott thau mayles named. bot it is calde their plumage. and after the cote. it is calde theyr Maiƚƚ ¶ And if yowr hawke reward to any fowle by countenance for to flee ther to ye shaƚƚ say cast the hawke ther to. and not lett fli ther to.
¶ Nomme or seesid.
¶ And if yowre hawke Nomme a fowle. and the fowle breke a way fro hir. she hath discomfet mony federes of the fowle. and is brokyn a way for in kyndeli spech ye shaƚƚ say youre hawke hath Nomme or seesid a fowle and not take it
¶ werfore an hawke is calde a Rifelere.
¶ And oft tyme it happith mony an hawke for egernesse when he shulde Nomme a fowle he seesith bot the federis. and as ofte as he doos so he Riflith. therfore such hawkys been called Rifeleres if they doo ofte so.
How ẏe shall naame the memberes of ẏowre hawkis in conuenient termes.
Now ye shaƚƚ vnderstande the naamys off the membries of hawkys: to begynne at hir fete and goo vpwarde as knyghttis been harnesside and armeed. & so we shaƚƚ enarme her
¶ Talons.
Fyrst the grete Clees behynde. that strenyth the bake of the hande. ye shaƚƚ caƚƚ hom Talons
¶ Pownces.
The Clees with ī the fote ye shaƚƚ caƚƚ of right her Pownces
¶ Longe Sengles.
Bott certaynly the Clees that are vppon the medyƚƚ stretcheris ye shaƚƚ caƚƚ the loong Sengles.
¶ Petẏ Sengles.
And the vttermest Clees ye shaƚƚ caƚƚ the Pety Sengles
¶ The keẏ or Closer.
Vnderstond ye also that the longe Senclees be calde the key of the fote. or the Closer. For what thyng som euer it be yt yowre hawke strenyth: open that Sengle. and aƚƚ the fote is oppen· for the strength ther of fortyfieth aƚƚ the fote.
¶ Seris of waterẏ or waxẏ colowre.
Knawe ye: that the skynne a bowte yowre hawkys legges & his fete is calde: the Seris of hir legges and hir fete. whether thay be watery hewed or of waxy colowre yolowe.
¶ The Beme feder. Full Sommẏd and Reclaẏmede.
An hawke hath .xij. federis vppon his tayle. and oon principaƚƚ
feder of thessame is in the myddis. and in maner
aƚƚ that oder bene couertid vnder thessame feder. and that is called
the Beme feder of the tayle. And ther gooth blacke barris
ouerwarde the tayle. and thos same barris shaƚƚ telle yow whan
she is fuƚƚ summed. or fuƚƚ fermyd. For whan she is fuƚƚ barrid
she stondith vppon .vij. and then she is perfite rede to be Reclaymede.
¶ Ye shaƚƚ vnderstonde that as longe as an hawke stondeth
vnder the nombre of .vij. barris. And she be in hir sore aage:
it most be sayde that she is not fuƚƚ summed. for so longe she is
bot tender Pennyd whether she be brawncher or Eyes.
¶ And iff she be a mewed hawke. and stonde within .vij. barris.
ye shaƚƚ say she is not fuƚƚ fermed. for she is not habuƚƚ to be
Reclaymed. be cause she is drawe to soone owt of the mewe for
she is not harde pennyde. no more than a soore hawke.
¶ Braẏles or Braẏlfederẏs. Degouted
To knaw forthermor of hawkes. an hawke hath long smale white federis. hangyng vndeer the tayƚƚ: from hir boweƚƚ downe warde. and the same federis ye shaƚƚ caƚƚ the brayles or the brayle federis. And communely euery goshawke and euery tercellis braylis bene bysprenged with blake speckes. like Armyns. and for aƚƚ that thay bene accomptid neuer the better. Bot and a sparehawke be so Ermyned vppon the brayles. or a Musket. oder ye shaƚƚ say she is Degouted to the vttermost brayle. and much it betokynis hardenes.
¶ Brest federẏs. Plumage. Barbe federẏs. Pendaunt federẏs.
The federis abowte the formore parteys of an hawke: becalled the brest feederis. & the feederis vnd the wynges are plumage The federis vnder the beke be calde the barbe federis. And the federis that bene at the Ioynte: at the hawkes kne thay stonde hangyng and sharppe at thendes. thos be calde the pendaunte federis.
¶ Flagg or faggis federẏs.
The federis at the wynges next the body be calde the flaggꝭ or the faggꝭ federis.
¶ Beme federes of the wẏng Sercell
And the long federis of the wynges of an hawke bene calde the beme federis of the wyng. And the federis that sum caƚƚ the pynyon feder. of a noder fowle. of an hawke: it is calde the Serceƚƚ ¶ And ye shaƚƚ vnderstonde iff an hawke be in mewe yt same serceƚƚ feder shaƚƚ be the last feder that she wiƚƚ cast. and tyƚƚ that be cast. she is neuer mewed. yit it has bene seen: that hawkes haue cast that same first as I haue herde say. bot that other Rewle is gendraƚƚ. and whan she hath cast hir sercellis in mew. then and not erst it is tyme for to fede hir with wasħ meete and to begynne to ensayme hire.
¶ Ensaẏme
Ensayme of an hawke is the grece. and bot if that be take a way with fedyng of wasħ meete and otherwyse as it shaƚƚ be declared here after. she wiƚƚ gedder a paneƚƚ wich may be hir vttermost confusion. and she flye therwith. and take blood. and colde ther vppon.
¶ Couertis or couert
Ther bene also federis that cloos vppon the sarcellis. and thossame be calde the couertis or the couert federis. and so aƚƚ the federis be calde that bene next ouer the long beme federis. and the fagg federis vppon the wynges.
¶ Backe federis.
¶ The federis vppon the backe halfe be called the backe federis.
¶ Beke Clape Nares Sere
¶ The Beke of the hawke is the vpper parte that is croked.
¶ The neder parte of hir beke is calde the clape of the hawke.
¶ The Hoolis in the hawkes beke bene callede the Nares.
¶ The yolow be twene ye Beke &̄ ye yeghen is calde ye Sere.
¶ Crẏnettis.
Ther be oon an hawke long smale blake federis: like heres about the sere &̄ thossame: be calde Crinettis of ye hawke.
¶ Sore aage.
¶ Ye shaƚƚ vnderstonde that the first yere of an hawke whether she be calde Brawncher or Eyesħ. that first yere is calde hir sore aage. and aƚƚ that yere she is calde a sore hawke. for and she eskape that yere. with good fedyng she is likly to endure longe.
¶ To Reclaẏme an hawke
Iff ye wiƚƚ Reclaym yowre hawke ye most departe oon mele in .iij. melis. vnto tyme that she wiƚƚ come to Reclayme. and whan she wiƚƚ come to Reclayme encrece her melis euery day better and better. And or she come to the Reclame make her that she sowre not. For thogh she be wele Reclaymed hit may happyn that she wiƚƚ sowre: so hegh in to the Eyre. that ye shaƚƚ Nether se hir nor fynde hir.
¶ And iff yowre hawke shaƚƚ flie to the partrich. looke that ye Ensayme her or she flie. whether she be Brawncher or Eyes Or mewed hawke.
¶ whẏ an hawke is called an Eẏes.
An hawke is calde an Eyes of hir Eyghen. for an hauke that is broght vp vnder a Bussard or a Puttocke: as mony be: hath wateri Eyghen. For whan they be disclosed and kepit in ferme tyƚƚ thay be fuƚƚ summyd. ye shaƚƚ knawe theym by theyr wateri Eyghen. And also hir looke wiƚƚ not be so quycke as a Brawncheris is. and so be cause the best knawlege is by the Eygh. they be calde Eyeses.
¶ Ye may also knawe an Eyes. bi the palenese of the seres of her legges of the sere ouer the beke. And also by the tayntys that be vppon her tayƚƚ and her wengys wiche tayntys com for lacke of fedyng. when thay be Eyes.
¶ what a taẏnt is.
A Taynt is a thyng that gooth ouerwarte the federis of the wynges. and of the tayƚƚ lyke as and it were eetyn with wormys and it begynyth first to brede at the body. in the penne and that same penne shaƚƚ frete asonder. and falle a way thurrow thessame taynte and then is the hawke disparagid for aƚƚ that yere.
¶ Medecẏnẏs to Ensaẏme ẏowre hawke
Take the Rote of Rasue and do it in clene water. and lay thy flesħ ther in. to temper a grete whyle. and yeue it to yowre hawke to eete. and if she eete therof. drede not bot hit shaƚƚ benymme hir grece. bot within .iij. days she shaƚƚ not grettely abate.
¶ Also take puliaƚƚ and garlek and stampe it wele to geder. and wrynge owte the Iuce in a dysħ. and then weete the flesħ ther in. and fede yowre hawke therwyth. and bot it tempur yowre hawke. that is to say ensayme yowre hawke. with in .iiij. days. I merueƚƚ Bot looke eueri day that ye make new Iuce and whan ye fede hir. weete yowre meete ther in.
¶ Also take the Iuce of percelly Moris otherwise calde percelly Rootis. and thossame of Isop. and wasħ yowre flesħ ther in and yowre hawke shaƚƚ be Ensaymed kyndly. and no grete abate to the hawke.
¶ Som vse to lay thare flesħ in water almost a day. and yeue thessame to the hawke at soper. and that at lyth aƚƚ nyght. to geue to hir in the mornyng. and thus to fede hem in mew or thay be drawen a bowte a monyth or .vi. weekys. and to ensayme theym or thay com on fist. as sone as thay cast theyr cerceƚƚ. then is the tyme to begynne to fede hem soo.
¶ How ẏowre hawke ensaẏmẏthe
Understonde ye for certayn: that as longe as yowre hawkes fete be blakysħ and rough: she is fuƚƚ of grece. and euer as she ensaymyth. hir fete wiƚƚ wax yolow and smothe
How ẏe shall gẏde ẏow whan ẏowre hawke is redẏ to flie. Also ẏe shall saẏ put vp a partriche
Whan ye haue ensaymed yowre hawke: and Reclaymyd hir. and that she is redi to flie to the partrich. ye most take a partrich in yowre bagge. and goo in to the felde. and let yowre spanyellis fynde a Couy of partrichys. and when thay be put vpp. and begynne to scatre. ye most haue markeris to marke som of thaym. and then cowple vp yowre houndys. wan ye haue so doon. let sum felow of yowris preueli take the partrich owte of yowre bagge. and ty it by the legge: with a creaunce. and cast it vp as high as he can. and as soon as the hawke seith hir she wiƚƚ flie ther to. and if yowre hawke sees the partirich a boone. yeue hir a rewarde: theruppon. and go after yt by laysoure to the partrich that be marked and doo as I shaƚƚ teƚƚ yow here folowyng.
¶ Iff ye haue a chastised hounde: that wiƚƚ be rebuket: and is a Retriuer. vncouple him and no moo of yowre houndis. and goo to a sengler partrich: of the couy so sparplid. and be as nygh as ye can to the Risyng therof and if yowre hawke desire cast hir to it. and if she take it then is yowre hawke made for that yere. and of thessame partrich that she sleth. thus ye moost rewarde hir as it shewith here next folowyng.
¶ how ẏe shall rewarde ẏowre hawke.
Take a knyfe and cutt the hede and the necke from the body of the partrich. and stripe the skynne a way from the necke. and yeue that same to the hawke. and couer the body of the fowle with a bonett or an hatt. and lay thessayd hede and the necke theruppon. and if she wiƚƚ forsake the fowle that she plumyth on. and com to the rewarde. then preuyli take a way the partrich. and rewarde yowre hawke with the Brayne. and the necke. Beware that she eete no bonys. for that is eueƚƚ to endewe. and it wiƚƚ make hir vnlusty: for to flye. And thus ye most serue hir of as many as she sleth. bot let hir rewarde be the lasse. for ellis she may be sone fuƚƚ goorged. and then she may flye no more a grete while.
¶ how ẏowre hawke shall Reioẏse.
And whan yowre hawke hath sloyne a fowle. and is rewarded as I haue sayde. let hir not flie in no whise tyƚƚ yt she haue Reioysed hir. that is to say. tyll she haue sewed. or snyded her beke. or ellys rowsed her. and whan she hath done any of theys. or aƚƚ. go and retriue moo and she wiƚƚ nym plente.
Whan ẏowre hawke hath nomme a fowle how ẏe shall do that ẏe rebuke not the hawke.
Lerne wele oon thyng. and beware therof. whan yowre hauke hathe nomme a partrich. stonde a goode way of. and come not to nygh her. and dryue a way yowre houndys for rebukyng of hir. for many hawkys loue noon howndys. and also many howndys wiƚƚ benymme theym theyre gamme from ther fote. and that is parlous. and whiles yowre hawke plumith cumme softely towarde hir. alway nere and nere. and if she leue plumyng. and loke vppon yow. stonde styƚƚ and cherke hir. and whistyƚƚ hir. tyƚƚ she plume ayen. and thus serue hir tyƚƚ ye be right nere hir. Than softe and layserly: faƚƚ oppon yowre kneys. and preuely while she plumyth sett yowre honde and be sure of the gesse. and than ye may gyde aƚƚ thyng as ye wyƚƚ. and if ye doo the contrary: she wiƚƚ for feere cary hir game or let it go quyke. and that is bot losse to yow and yowre hawke also.
A medecẏne for to make an hawke to cast that is a comberẏd with castẏng with in her bodẏ
Take the Iuce of Salandyne. and wete a morceƚƚ of flesħ therin. the mowntenaunce of a Note. and yeue that morceƚƚ to the hawke. and that shaƚƚ make hir for to cast hir olde casttyng. and the hawke shaƚƚ be safe.
¶ A medecẏne for an hawke that will soure
Wassħ the flesħ that yowre hawke shaƚƚ be fedde with: in ye Iuce of feneƚƚ. and that shaƚƚ take away that pride from hir and make hir to leue hir sowryng whether she be lene or fatte. And mony tymes an hawke wiƚƚ sowre whan she lackyth bathyng.
¶ A medecẏne for an hawke that is lowse.
Take quycke siluer and put it in a bassien of brasse. and do ther to saladyne: and askys. and medyƚƚ it wele to geder. tyƚƚ aƚƚ the quycke siluer be dede. and medyƚƚ therto fat of bonnys. and anoynte the hawke ther with. and hang it aboute hir necke tyƚƚ it faƚƚ a way. and that shaƚƚ slee the lies.
¶ Also powdre of orpement blowen vppon an hawke: with a penne shaƚƚ slee the lies.
¶ Also take a dagon or pece of Rough blanket vnshoron and holde it to the fire. vnto tyme it be thorough owte warme and wrappe the hawke therin. and than holde hir softely and stylly. for hurtyng in yowre hondys. and the vermyn wiƚƚ crepe in to the cloth.
¶ Also holde hir in the sonne in a fayre day. & ye shaƚƚ se the vermyn crepe owte vppon her federis. then take a knyfe and wete the oon side of the blade therof wt yowre mowth. &̄ alway as thay appere lay the wete side of the knyfe to theym. and they wiƚƚ cleue ther to. and then ye may slee thaym.
¶ The opẏnẏon of Ostregiers.
After the opynyon of many Ostregiers: and ye fede yowre hawke contynually with Porke with Iayes. with Pyes. Or especially bere hir moch in Rayeny weder. thay shaƚƚ be lowse.
¶ Ostregeris. Speruiteris. Faukeneris.
Now be cause I speke of Ostregeris: ye shaƚƚ vnderstonde that thay be calde Ostregeris that kepe Goshawkys. or Tercellis. and tho that kepe Sperhawkys and muskettys ben called Speruiteris. and keperis of aƚƚ other hawkys ben callidde Faukeneris.
¶ The length of the Gesse. Lewnes. Tẏrettis. and how theẏ be fastined. & Bewettis
Hawkys haue aboute ther legges Gesse made of leder most commynly. some of silke. wich shulde be no lenger bot that the knottis of theym shulde. appere in myddys of the lefte honde: betwene the longe fyngre and the leche fyngre. be cause the lewnes shulde be fastened to theym. with a payre of tyrettis. wich tyrettis shuld rest vppon the lewnes. and not vppon the gesses. for hyngyng and fastynyng vppon trees when she flyeth. and the saame lewnes. yow shaƚƚ fastyn than abowte yowre lyttyƚƚ fyngre slackely. in compaysyng the saame in .iiij. or .v. folde. as a bowstryng vnocupyede and the terettys serue to kepe hir from wyndyng whan she bathes ¶ Also thessame letheris that be putt in hir bellis: to be fastyned a boute hir leggys ye shaƚƚ calle Bewettis.
¶ Creaunce.
Also ye shaƚƚ caƚƚ the long lyne that ye do caƚƚ youre hawke to Reclaym with: yowre Creaunce. what so euer it be.
¶ A medecẏne for an hawke that will cast flesh
Putt the flesħ that yowre hawke shaƚƚ eete: in fayre water. and fede her therwith .iij. days. and she shaƚƚ holde hir flesħ at the best.
¶ A medecẏne for an hawke that has lost here corrage.
An hawke that hath loost her corrage: aman may knawe if he wiƚƚ take good hede. For siche is hir maner. whan she is cast to a fowle. she fleith a waywarde as thogh she knewe nott the fowle. Or ellis she wiƚƚ flie a littyƚƚ way after. and a noon she yeueth it vpp. and for suche an hawke thys is a goode medecyn.
¶ Take Oyle of spayne and tempere it with clere wyne. and with the yolke of an egge and put therin befe. and therof yeue to yowre hawke .v. morcellis. and then set hir in the sonne. and at euen fede hir with an olde hote coluer. and if ye fede hir thꝰ iij tymys that hawke was neuer so lusty nor so Ioly before. as she wiƚƚ be after and come to hir owne corege.
¶ Othir make poudre of mecles that stynkith. and putt the poudre on the flesħ of a pecoke and mediƚƚ the blode of the pecoke among the poudre. and make hir to eete the flesħ.
A medecẏne that an hawke shall not lie ī mew for vnlustẏnese.
Take ferne Rotis that growith on an Oke. and oke appillis and make Iuce of theym. and wete hir flesħ therin. &̄ feede the hawke .ij. timys or .iij. and that shaƚƚ make hir to leue that
¶ A medicine for an hawke that hath the teẏne
An hawke that hath the teyne a man may sone knaw if he take hede. for this is hir maner She wiƚƚ pante more for oon batyng then an other for .iiij. & if she shulde flie a littyƚƚ wile she shuld almost lese her breth. whether she be fatte or lene. and alway she makyth heuy chere. and for that this is the medycyne.
Take a quantyte of the Redenesse of haseƚƚ with the poudre of Rasne and peper and somwhat of gynger. and make thereof in fresħ grece iij. pellettys and holde the howke to the fire and when she felith the hete make hir to swalowe the .iij pellettys by strength. and knytte fast her beke that she cast it not owte and do so thries. and she shaƚƚ be safe.
¶ Also take Rasne and Rubarbe. and grynde it to gedre. and make Iuce therof and wete the flesħ therin. and yeue it hir to eete. and she shaƚƚ be hooƚƚ.
¶ Also take alisawndre and the Roote of prima rose and the Roote of gro gnauteles and seeth aƚƚ in the bottre of a kow and yeue hir .iij morcellis euery day vnto the tyme that she be hoole. and looke that she be voide when ye yeue hir the medecyne.
How a man shall take an hawke fro the Eẏrer
Who so takys an hawke from the Eyerer: hym behoueth to doo wisely. in bryngyng hym easeli. and to kepe him wele from colde. and from hurtyng of theyr bonys. for thay be fuƚƚ tendre. and thay most haue grete rest. and thay may not haue stynkyng & filthy Eyre bot as clene as can &̄ may be thoght. and euermore yeue him clene meete. and hote. &̄ a littyƚƚ & oftyn. & change oftyn ther meete bot loke it be hot and cutt her meete in to smale morcellis. for thay shulde nott tyre on bonys tyƚƚ they myght flie. Then after when she begynnyth to penne. and plumyth. and spalchith and pikith her selfe. Putt hir in a cloose warme place. that no fulmertis nor fecheus. ne other vermyn com nott in to hir. and let the place be secure from wynde and rayne. and then she wiƚƚ preue hir selfe and euer more yeue hir good hote meetys. For it is better to a man to fede his hawke while she is tendre with hoote meetis. to make hir good with somme cost. then to fede hir with eueƚƚ meetis to make hir vnthrefti with lytyƚƚ cost. ¶ And looke whan she begynnyth to ferme then yeue hir bathyng.
A medecẏne for wormẏs in an hawke wiche sekenesse is called the Fẏlaundris.
Merke wele this sekenese and beware therof. This is the medecyne therfore. ye shaƚƚ take an herbe that is called Neppe and putt it in a smaƚƚ gut of a Capon or of an henne. and knyt it with a threde. and let hir Resaue it hooƚƚ. and she shaƚƚ be hooƚƚ and saafe ¶ Thus ye shaƚƚ knawe whan yowre hawke hath wormys in hir bowke. Looke whan she hath castyng and ye shaƚƚ fynde oon or .ij. a bowte hir castyng place iff she haue ony.
¶ A medecẏne foor an hawke that castẏs wormẏs at the foundemēt what wormis that thei be
Take the lymayƚƚ of Iren: &̄ medyƚƚ it wt flesħ of porke &̄ yeue it to ye hauke .ij. days for to heete. and she shaƚƚ be hooƚƚ
A medecẏne for an hawke that hath a sekenesse the wich is called the aggresteẏne.
Whan ye se yowre hawke hurte his fete with his Beke. and pullyth her tayƚƚ. then she hath the aggresteyne. For this sekennese take Merde of a dove. and of a shepe. and of an allow. and stronge vynegre. and do aƚƚ softely in a bassyn of brasse. &̄ Medyƚƚ hem wele to geder: to serue .iij. days after. and yeue hir flesħ of a coluer with ony and with powder of peper. and set hir in a derke place. and doo so .iv. days. and when ye see New federis in the tayƚƚ. wasħ hir with euerose. and she shaƚƚ be hoole and saafe.
¶ A medecẏne for an hawke that hath the croampe in hir wẏnges and how it cummẏth.
For this Croampe take a whyte looff of brede sumwat colder then it commyth owt of the oouen. and let holde the hawke sooftely for hurtyng. and kut the loofe almoost thorow owte. and display the wynge esely. and holde it betwene the .ij. partes of the loofe. and let it be hoolde so. the space of alfe a quarter of an howre. and she shaƚƚ be hoole.
¶ The Croampe commyth to an hawke with takyng of coolde in hir yowthe. Therfore it is goode for an hawke to kepe hir warme: yonge and hoold. and this medycyne is good at aƚƚ tymes for hir whether she be yonge or holde.
Let not an hawke be put in mew to late bot in this maner as it folowth. if ẏe loue ẏoure hawke
Iff ye loue wele yowre hawke. kepe her wele. and put hir nott late in mewe. for who so for couetesnese of flieng leses the tyme of his hawke mewyng. and withholdis her to long therfro he may after putt hir ī mewe at auenture. for then a parte of hir mewying tyme is past. ¶ Who so puttyth his hawke in mewe in the begynning of Lentyn. if she be kepit as she awth to be she shaƚƚ be mewed. in the begynnyng of Auguste.
¶ how ẏe shall dispose and ordaẏn ẏowre mewe
Sett and dispose yowre mewe. in this maner so. that no weseƚƚ
ner pulcatt ner non other vermyn entre ther to Ner none
wynde. ner no grate colde Ner that it be ouer hote. Let that on
parte of the mewe be turned to warde the sonne. so that in the moost
parte of the day: the sonne may come Inne.
¶ Also ye most se that she be not auexed ner greued withe
mych noyse. ner with song of men. and that no manner folkes
come to hir. bot oonly he that fedyth hir.
¶ It behouyth that yowre hawke haue a fedyng stokke in hir
mewe. and a longe stryng tyed therto: to fastyn hir mete with
for ellis she wiƚƚ cary it a bowte the hous. and soyle it with dust
And perauenture she wiƚƚ hyde it tiƚƚ it stynke. and then fede
vppon it. and that myght be hir deth. and therfor when it is
bondyn to the sayd fedyng stocke. she shaƚƚ nether at the fedyng
ner at the tyryng ne at the lightyng ne at the Rysyng hurtte
hir selfe. And whan she hath fedde. take a way the remenaunt
if any leeue. and in anywyse that she haue clene mete. and att
euery meeƚƚ fresħ. for of stale metis and eueƚƚ metis she shal
engender mony sekeneses. ¶ And loke ye go neuer to yowre
mew hot when ye shaƚƚ yeue yowre hawke meete. or ellis to bryng
water to bathe her. and suffyr no Rayn to weete hir at no
tyme. and ye may. and as for hir bathyng that shaƚƚ no thīg
hynder hir mewyng.
¶ The maner how a man shall put an hawke in to mewe. and that is to be wele nooted.
Off oon thyng ye most be ware weeƚƚ yff she haue any sekenes that ye make her hole or ye put hir in mewe. for as I vnterstonde a seke hawke shaƚƚ neuer mew weƚƚ. for though she mewe she shaƚƚ not endure bot while she is grete and fatte. for at the abatyng of hir astate she may no lenger endure.
¶ Some tyme with owt any medicyne many men deuysyn hou thay myght mew ther hawkys for sum put hawkys in mew at high estate. and sum when thay be right low. and sum whan thay be fuƚƚ. and sum when they be Empty and lene. and sume when thay be myserabuƚƚ lene. Bot therof it is no force. iff she be hole Neuertheles. I shaƚƚ say myn aduyce as I haue sene &̄ lerned.
Who so puttith a Goshawke or a Terceƚƚ or a spere hawke in to mew so high that she may be no higher. she wiƚƚ holde hir longe in the poynt: or that she lese or lent any federis. And who so puttith hir in mew lene. it will be long or she be remounted and who so puttith hir in mew to hungry and to lene: if she haue meete at hir wiƚƚ she wiƚƚ eete to moch. be cause of hungre. and ꝑauenture she may be dede ther by. as hath ofte be sene
Bot who so wiƚƚ that an hawke endure and mew kyndli. myn counceƚƚ it is that she be not to high noder to low. noder in grete destresse of hungre. bot like as she wolde flee best then take hede the first day of to moch eetyng. vnto tyme that she be stawnchid and after that a man may take her sich mete as I shaƚƚ teƚƚ more playnli here after
In what maner and how a man shall fede his hawke in mewe.
Loke with wat meetis she hath bene most vsed to be fedde and fede hir therwith .viij. days contynualli. and tho .viij. days yeue hir birdis Inow. both morow and euyn. and let hir plomme vppon hem wele. and take castyng of the plomage. and that shaƚƚ talawnt hir wele. and cause her to haue goode appetide and it shaƚƚ clense wele hir bowillis and whan she is weeƚƚ clensed. ye may yeue hir what meete that ye wiƚƚ so it be clene and fresħ
¶ Bot the beste mete to make an hawke to mewe moost sone wyth owte any medecyne is the fleshe of a kydde and of a yong Swanne and of a chikyn and especiaƚƚ Ratonys flesħ so thei be not assaughte Noon like to hit and of a yong goos for sich meete is hote of it selfe.
¶ And take gobittis of grete fresħ Elis. and specialli the colpon next the Naueƚƚ. and weete it in hote blode of moton it is goode to make her to mewe. bot specialli it shaƚƚ make her wight after hir soore aage
¶ Thees sayd fleshes bene goode to mewe an hawke: and to kepe hir in state bot loke she haue goode plente euery day. so that she Rather leue parte then lacke any. and euery .ijj. day let hir bath if she lyst
¶ And when she waxith nygh ferme yeue hir hennys and fatt porke and of an hounde is passing good.
¶ An hawke is neuer fuƚƚ ferme nor redy forto drawe owte of mew vnto tyme hir serceƚƚ be fuƚƚ groyn. yet haue I sene sū folkys take hem owte of mewe when the sarceƚƚ were bot halfe ispronge. and that is parlous. for they are not then harde penned.
¶ Som folkys vsen when an hawke has cast hir sarceƚƚ to begynne and wasħ hir meete. and fede hir so in mew with wasħ meete a monyth or .vi. weekys or euer thay drawe thaym.
¶ Bot of aƚƚ fleshes after she is mewed. a resenable goorge of an hoote haare is beest. and also of a crowe hoote. bot it moste be wasħ in water: and then it is the better. For that wiƚƚ not benymmen hem hastely theyr grece. ner put hem in no grete febulnes. for it durith sumwat with hir.
¶ To make an hawke to mew tẏmeli with owt anẏ hurtẏng of hir.
Now I shaƚƚ teƚƚ yow verray true medecynes for to mewe an hawke hastyly that ye shaƚƚ beleue for trowthe and ye wiƚƚ as-say theym.
¶ Ther be in woddys or in hedgis wormys calde edders that ben Redde of nature. and he is calde veꝑa. and also ther be snakys of thessame kynde. and they be verri bitter. Take .ij. or .iij of theym and smyte of ther hedes and thendys of theyr taylis. Then take a new erthen pot: that was neuer vsed. and cut hem ī to smaƚƚ gobettys. and put thossame therin. and let hem sethe stronglich. a grete while. at good layser. and let the pot be couered. that no ayre com owte of it ner no breth and let it sethe so long that the saame colpons seth to grece. then cast it out and doo a way the bonis. and geder the grece. and put it in a clene vessiƚƚ. and as oft as ye fede yowre hawke: anoȳt her meete therin. and let hir ete as moch as she wiƚƚ. and that meete shal mewe her at yowre awne wiƚƚ.
¶ A nother medecẏne.
Take whete: and put it in the brothe that thedderis were sothen in. and when ye se the whete begynnyth to cleue: take it owt and fede hennys or chykynnes therwith. and fede yowre hawke with thessame polayn.
Who so will that an hawke mewe not nor fall noon of hir federis. therfore here is a medecẏne
Take powder of Caneƚƚ. and the Iuce of franke cost and the Iuce of paranye. and take morcellis of flesħ .iij. or .iiij. if ye lust and weete them therin. and make the hawke to swalow hem and serue hir so mony tymys.
¶ Also take the skynne of a snake or of an Edder. and cut it in to smale peces. and temper it with hoote blode: and cause yowre hawke oftyn tyme to fede therof and she shaƚƚ not mewe.