Saint Pol qui fu si haut prodom
Ala par mainte regïon
Pour aprendre et pour encerchier
Les boens clers qu'il avoit tant chier.
Apres la mort Virgile avint
Que Saint Pol a Romme s'en vint;
Qui mult sot des ars de clergie,
Ainz qu'il créust le filz Marie;
Dont maint Juys et maint païen
Converti et torna a bien.
Quant il fu venu en la vile
Et il sout la mort de Virgile
Qui mort estoit novelement,
Si l'en pesa moult durement:
Quar moult convertir le vousist
Par son sens dont maint bien féist.
Lors quist ses livres ou il sot
Et trova en l'un un haut mot
De la plus bele prophecie,
C'onques fust de païen oïe,
De la venue Jhesu Crist,
Qu'il méismes avoit escrit:
Qué une novele lignie
S'estoit del ciel haut abessie,
Et la virge estoit ja venue
Qui en rendroit la terre drue.
Quant saint Pol ot léu cel mot,
Si dist de Virgile un tel mot:
Ha! se ge t'éusse trouvé,
Que ge t'éusse a Dieu donné!
Puis quist tant qu'il trouva un lieu
Qu'il avoit claïte de feu
D'une lampe qui ardroit cler
Et deus cierges pour alumer.
Cil lieu parfont en terre estoit;
Mes nus hons entrer n'i osoit:
Quar la voie estoit si orrible,
Estroite, hisdouse et penible,
Plaine de vent et de tonnoirre,
Qu'a paine le péust l'en croirre;
Ne nus hons n'i povoit porter
Lumiere qui péust durer.
Toute voiës si pres s'en mist
Que l'ymage Virgile vit
Séant sus une grant chaiere,
Et ses livres en tel maniere,
Tout environ lui par monceaus,
Moult riches par semblant et biaus.
El poing destre tint un fermé,
Aussi comme par grant chierté.
Les deus cierges vit lez lui estre,
Ardanz a destre et a senestre:
Devant lui un archier estoit,
Qui droit vers la lampe visoit;
Mez la dedenz ne pout entrer
Pour chose qu'il séust penser:
Quar a l'entree avoit deu homes
De cypre, de moult laides formes,
Qui grans martiaus d'achier tenoient,
Dont vers terre tels cox dounoient
Qué on s'i n'osist aprechier,
Que nus ne s'i osast lanchier,
Ne n'i péust mettre riens nee
C'au premier coup ne fust cassee,
Et se la chose si fort fust
C'au premerain coup rechéust:
Le lieu crolloit si au ferir,
Qu'il sembloit tout déust finir.
Quanqu'en pres fuste a une mile,
Que Saint Pol ne tint pas a guille;
Mes tant fist puis, si comme on dist,
Que les deus martiaus cesser fist:
Et li archier tantost bruisa
La lampe, et tout en poudre ala.
Saint Paul qui bien quidoit avoir
Les livres, n'i pout riens véoir
Qui ne fust en poudre et en cendre:
Si s'en retourna sanz riens prendre.