Virgille plus fu sapïens,
Plus clerc, plus sage et plus scïens
Que nul qui a son temps vesquist,
Et plus de grans merveilles fist.
Pour voir il fist de grans merveilles;
Homs naturel ne fist pareilles:
Et si fut il bien dechéu
Cil qui fut tant sage scèu.
Ung peu de son sens vous diray,
Et puis apres je vous liray
Comment dechut fu sans fausser,
Tout par deffault de bien gloser
Combien qu'il fu(s)t de gran sens duits.
Il fist de Naples les conduits:
Parsouls terre de pierre estoient,
Qui vin grec a Romme livroient;
De dix journeés la venoit
Par les conduits que fait avoit.
Il fist un pont sur la riviere,
Que ad ce temps si sage n'yere
Qui sceust de quoy fait il estoit
Ne d'ont le fondement venoit,
Et comment la pierre on y mist.
Cil une mouche d'arain fist
Que toutes mouches qui estoient
Celle approchïer ne povoient
D'un jet d'une pierre tenant,
Qu'el'(ne) morusse(nt) maintenant.
Il refist ung cheval d'arain,
Que tout cheval plain de mehain,
Tantost que ce cheval véoient,
De ce mehaing se garissoient.
Enmy Romme ung miroir fist,
Et tout enmy Romme le mist,
Que tous ceulx qui le regardoient
D'une journeë voir povoient
Toute humaine créature
Qui avoit volenté ou cure
De Romme nuire ou grever:
La le porrent v(o)ir et trouver.
Illec(ques) véoit qui venoit
(A) Romme, ou qui nuire y vouloit.
Mainte grant chose faire osa:
Or oyer comment mal glosa.
A une dame du pays
Fut il par grant amour bays,
Et a grant merveilles l'ama
Et son coeur en elle sema:
Pluseurs fois en veille et en pense,
Tant qu'il en pert la contenance.
Ceste dame est de grant atour,
Et demouroit en une tour
Qui fut plus haute de dix lances.
Cil qui la mist ses contenances
Lui tramist une mesagiere
Qui de s'amour lui fist prïere,
Qué elle le voulsist amer
Et de fait son amy clamer;
Et, se elle vouloit richesses,
Terrïennetes et noblesses,
Tant lui donroit a dire voir
Qué elle en voulroit avoir.
Celle qui eust le coeur faintif,
Qui eust au coeur moult de despit,
Et lui manda par malvais tour
Qué elle bien volloit s'amour
Et que sa voulente feroit
Et que de coeur bien l'ameroit,
Mais ne pooit a lui aller;
Mais s'il se volloit tant pener
Et que trop il ne lui anuit,
Tantost quant viendra a minuit
Qu'il veinst au pië de la tour,
La metteroit a point son atour;
Une corbeille descendroit,
Et Virgille ens se metteroit,
Et amont tantost vous trairons;
S'il vous plaist, ainsi le ferons:
A tirer ne faulrons nous mie,
Ainsi l'ordonne vostre amie.
Cil ne pensa ne ne glosa,
Tant a celle dame pensa;
A la tour est la nuit venus.
Illecques s'est tous quois tenus,
Et tant se vault illec tenir
Qu'il vit la corbeille venir,
Et cil s'est tost dedens bouté:
Adont fut il amont tiré.
Quant au droit millieu fut saquie,
Adont illec fut atacquie
Qu'il ne pot monter n'avaller:
Or poeult illec des mains voller,
Et illecques lyës se tint
Jusques par tout le beau jour vint.
Tout le monde y est venu
Et chascun s'est illec tenu;
Disoiënt: Vez cy grant merveille;
Véez Virgille en la corbeille.
Virgille qui tant ot savoir,
Pot illecques grant honte avoir:
Toute Romme y acourut;
A tout chascun cecy parut,
Et quant le mydi fu allé
Adonc fu de corde avallé...
Quant Virgille fut avalé,
De son meschief fut demalé
Et de honte qu'il pot avoir;
Lors prisa moult peu son savoir
Et dit: Jamais ne sara chier
Se de ce ne se poeut vengier.
Et lors mist sa scïence en coche,
Comme a la chose qui lui touche.
Il y a pensé et dité:
Lors fist qu'en toute la cité,
De dix lïeueës tout a point,
Il ne demoura de feu point;
Tout fust estaint sans detrïer.
Lors fist par ung varlet crïer:
Qui du feu voulroit acquerir,
Le voit a tel dame querir;
Entre ses jambes en ara,
Né ailleurs n'en recouvera.
Nul ne sceust ailleurs feu trouver:
Qui dont véyst la gent ouvrer;
Tantost fu celle tour brisee
Et celle grant dame escoursee;
Droit enmy la ville fu mise
Et en ung hault lieu fu assise.
Illec chascun son... tenoit,
Et chascun du feu y prenoit;
A son... chandeilles metoient,
Et a son... les alumoient,
Et cil qui alumé avoit
A aultrui aidier n'en pooit.
Il n'en pooit aidier nullui,
N'en avoit mestier que a lui.
Celle fu illec ordonnee
Tout le jour, de la matinee.
Jusques il fust la nuit obscure,
Toute nuë sans couverture,
Toutes jour chandeilles boutoient
Et toute jour les y alumoient.