"I am in the place," said the uther, "quhair I am demandit of conscience to speik the treuth; and thairfoir I speik. The treuth I speik impung it quhoso list. And heirunto [I add,] Madam, that honest, gentill, and meik naturis be appeirance, be wickit and corrupt counsallouris, may be convertit and alter[947] to the direct contrair. Exampill we haif of Nero, who in the begyning of his impyre, we find haifing some naturall schame;[948] but efter that his flatteraris had encuraged him in all impietie, alleging, that na thing wes either unhonest nor yit unlauchfull for his personage, quho wes Empriour abuif utheris: quhen he had drunken of this coup, I say, to quhat enormiteis he fell, the historeis beiris witnes. And now, Madam, to speik planelie, Papistis and conjureit ennemeis to Jesus Christ, haif your Graceis eare patent at all tymeis. I assure your Grace thai ar daingerous counsallouris, and that your Mother fand."

As this wes said, Ledingtoun smyleit,[949] and spak secreitlie to the Queue in hir eare; what it wes, the tabill hard nocht. But immediatlie sche addressit hir vissage, and spack to Johne Knox, and said, "Weill, ye speik fair eneuch heir befoir my Lordis; but the last tyme I spak with you secreitlie, ye causit me weip monie salt teiris, and said to me stubernelie, 'Ye set not by my greitting.'"

"Madam," said the uther, "becaus now the secound tyme your Grace hes burdened me with that crime, I maun ansuer, as [leist] for my silence I be haldin gyltie. [If your Grace] be rypelie rememberit, the Laird of Dun, yit leving to testifie the treuth, was present at that tyme quhairof your Grace complenis. Your Grace accuseit me, that I had irreventlie handyllit you in the pulpat; that I denyit. Ye said, What ado had I to speik of your marriage? What was I, that I sould mell with syk maiteris? I ansuerit, As tueching natour, I wes ane worm of this earth, and yet ane subject of this Commounwelth; but as tueching the office whairintill it hes plesit God to place me, I wes ane watchman, bayth over the Realme, and over the Kirk of God gatherit within the same; be reasoun whairof I wes bound in conscience to blaw the trumpet publictlie, so oft as evir I saw onie upfall, onie appeiring dainger,[950] either of the one or of the other. But sa it wes, that ane certane bruit affermed that traffick of mariage wes betwix your Grace and the Spanishe allya; quhairinto I said, that gif your Nobylattie and Estaitis did agrie, unles that bayth ye and your husband sould be so straitlie bound, that neither of you mycht hurte this Commounwealth, nor yit the pure Kirk of God within the same, that in that cais I wald pronunce, that the consentaris wer trubleris[951] of this Commounwelth, and ennemeis to God, and to his promeis plantit within the same.[952] At these wordis, I grant, your Grace stormed, and burstit furth into ane unressonable weiping. Quhat myttigatioun the Laird of Dun wald haif maid, I suppois your Grace hes not forget. But whill that nathing wes abill to stay your weiping, I wes compellit to say, I tak God to record, that I never tuik plesour to see onie creatour weip, [yea, not my children quhen my awin hands had bett thame,[953]] meikle less can I rejoise to see your Grace mak sick regreat. But seing I haif offerit your Grace no such occasioun, I maun rather suffer your Grace to tack your awin plesour, or that I dar conceil the treuth, and so betray baith the Kirk of God and my Commounwelth. Thir wes the maist extreme wordis that I spak that day."

Efter that the Secretar had conferrit with the Quene, he said, "Mr. Knox, ye may returne to your hous for this nicht."

"I thank God and the Quenis Majestie," said the other. "And, Madame, I pray God to purge your hairt from Papeistrey, and to preserve you from the counsall of flatteraris; for how pleasand that thei appeir to your ear and corrupt affectioun for the tyme, experience hes tauld us in what perplexatie thay have brocht famous princes."

Ledingtoune and the Maister of Maxwell [were] that nycht the two stoupeis of hir chair.

Johne Knox being departit, the Tabill of the Lordis, and utheris that wer present, wer demandit, everie man be his vote, Gif Johne Knox had nocht offendit the Quenis Majestie. The Lordis voteit uniformelie thai coulde find no offence. The Quene wes past to hir cabinet. The flatteraris of the Courte, and Ledingtoune pryncipally, raged. The Quene wes brocht agane, and placeit in hir chyre, and thai commandit to vote oure agane: quhilk thing heichlie offendit the haill Nobylattie, and began to speik in opin audience, "What! sall the Laird of Lethingtoune haif power to controle us: or sall the presence of ane woman caus us to offend God, and to dampne ane innocent aganis oure conscience for plesour of onie creatour?" And so the haill Nobylattie absolved Johne Knox agane, and praisit God for his modestie, and for his plane and sensible ansueris. Yit befoir the end, ane thing is to be noittit, to witt, that amangis sa monie placeboes, we mene the flatteraris of Courte, thair wes nocht ane that planelie durst condampne the pure man that was accusit, this same God reuling thair tounge that sometymeis reulit the toung of Balaam,[954] when gladlie he wald haif cursit Godis pepill.

This persaveit, the Quene began to upbraid Mr. Henrie Synclair, then Bischope of Ross, and said, heiring his vote to agree with the rest, "Trubill nocht the barne: I pray you trubill him nocht; for he is newlie walknit out of his sleip. Why soulde nocht the aulde fule follow the futestapis of thame that haif passit befoir him." The Bischope answerit cauldlie, "Your Grace may considder, that it is neither affectioun to the man, nor yit lufe to his proffessioun that moved me to absolve him; but the sempill treuthe, quhilk planelie appeiris in his defence, drawis me efter it, albeit that utheris wald haif condampnit him." And this being said, the Lordis and haill assisteris araise and departit. That nycht wes nether dansing nor fyddilling in the Courte; for Madame wes disappoyntit of hir purpois, quhilk wes to haif had Johne Knox in hir will be vote of hir Nobylattie.

Johne Knox, absolved be the votes of the grittest pairt of the Nobylattie from the cryme intendit aganis him, evin in the presence of the Quene, sche rageit, and the placebois of the Courte stormed: And so began new assaultis to be maid at the handis of the said Johne, to confes ane offence, and to put him in the Quenis will, and thay soulde promeis that his gryttest punischement sould be to go within the Castell of Edinburgh, and immediatlie to returne to his awin hous. He answerit, "God forbid that my confessioune soulde dampne those nobill men that of thair conscience, and with displasour of the Quene, have absolved me. And forder, I am assureit, ye will nocht in earnist desyre me to confes ane offence, onles that thairwith ye wald desyre me to ceise from preiching: for how can I exhorte utheris to peace and Cryssin quyetnes, gif I confes myself ane authour and mover of seditioun?"

The Generall Assemblie of the Kirk approcheit. But the juste petitiounis of the Mynisteris and Commissionaris of Kirkis wer dispysit at the first, and that with thir wordis, "As Mynisteris will not follow our counsellis, so will we suffer Mynisteris to labour for thame selfis, and see what speid thai cum." And when the quhole Assemblie said, "Gif the Quene will not [provide for our Ministeris], we man; [for] bayth Thrid and Tua pairt ar rigyrrouslie takin frome us, and frome our tennentis." "Giff utheris," said one, "will follow my counsell, the gaird and the Papistis sall complene als lang as our Mynisteris haif done." At these wordis the former scherpnes wes cullourit, and the speikare allegit, that he menit not of all Mynisteris, bot of sum to quhome the Quene wes no dettour; for what Thrid ressavit sche of Borrowis? Cristopheir Gudeman[956] ansuerit, "My Lord Secretour, gif ye can schaw me what [just] tyttill either the Quene hes to the Thrid, or the Papistis to the Twa pairt, then I think I soulde solve[957] quhidder sche wer dettour to Mynisteris within broughis or not." But thairto he ressavit this check for ansure, "Ne sit peregrinus curiosus in aliena Republica;" that is, "Lat not ane strainger be curious in a strainge Commounewelth." The man of God ansuerit, "Albeit I be ane strainger in your pollicey, yit so am I not in the Kirk of God; and thairfoir the cair thairof does no less appertene to me in Scotland than gif I wer in the myddis of Ingland."

Monie wonderit at the sylence of Johne Knox; for in all those quick ressonyngis he openit not his mouthe. The cause thairof he himself expressit in those wordis: "I haif travellit, rycht honorabill and belovit Bretherin, sen my last arryval within this Realme in ane uprycht conscience befoir my God, seiking no thing more, as he is [my] wytness, than the advancement of his glorie, and the stabillitie of his Kirk within this Realme; and yit of lait dayis I haif bene accuseit as ane sedytious man, and as ane that usurpes unto my self power that becumis me nocht. Trew it is, I haif gevin adverteismentis into the bretherin in dyveris quarteris, of the extremitie intendit aganis certane faythfull for luiking to ane Preist going to Mess, and for observing of those that transgressit juste lawis; bot [that] thairintill I haif usurped farther power than is gevin into me, till that be you I be dampned, I utterlie deny; for I say, that be you, that is be the chairge of the Generall Assemblie, I haif als just power to adverteise the bretherin from tyme to tyme of daingers appeiring, as that I haif to preche the worde of God in the pulpett of Edinbrough; for be you I wes appoyntit to the one and to the uther; and thairfoir, in the name of God, I craif your jugementis. The dainger that appeirit to me in my accusatioun wes nocht sua feirfull as the wordis that come to my earis wer dollorous to my hairt; for thir wordis wer planelie spokin, and that be sum Protestantis, 'What can the Pape do mair then send furth his Letteris, and requyreit thame to be obeyit.' Lat me haif your jugementis thairof, quhidder that I haif usurped onie power to my self, or gif I haif bot obeyit your commandiment."

The flatteraris of the Courte, amangis quhome Sir Johne Ballentyne, Justice Clerk,[958] wes then not the leist, began to storme, and said, "Sall we be compellit to justifie the rasch doingis of men?" "My Lorde," said Johne Knox, "ye sall speik your plesour for the present: of you I craif no thing; bot gif the Kirk that is heir present do not either absolve me, or ellis condampne me, nevir sall I in publict or in privat, as ane publict mynister, open my mouthe in doctrine or in ressonyng."

Efter lang contentioun, the said Johne being removed, the whole Kirk fand, that a chairg wes gevin unto him to adverteis the Bretherin in all quarteris as oft as evir dainger appeirit; and thairfoir avowit that fact not to be his onlie, bot to be the fact of all. Thairat wer the Quenis claw-backis mair inrageit than evir thai wer; for sum of thame had promissit to the Quene to get the said Johne convyct, baith be the Consall and be the Kirk;[959] and being frustrat of boith, sche and thai thocht thame selffis nocht [a little] dissapoyntit.

In the verie tyme of the Generall Assemblie, thair cumis to publyct knawlege ane heinous murdour committed in the Courte, yea, not far from the Quenis awin lap; for ane Frenche woman, that servit in the Quenis chalmer had playit the hure with the Quenis awin hipoticary.[960] The woman conceveit and bare ane child, quhome with commoune consent the father and the mother murthered. Yit wer the cryis of ane new borne barne hard; searche wes maid, the chylde and mother wes baith deprehendit; and so wer baith the man and the woman dampned to be hangit upoun the publict streit of Edinburgh. The punischment wes notable, becaus the cryme wes heinous. Bot yit wes not the Courte purged of hureis and huredome, quhilk wes the fontane of sik enormiteis; for it wes weill knawin, that schame haistit mariage betwix Johne Sempill, callit the Danser, and Marie Levingstoune, surnameit the Lustie.[961] What bruit the Maries and the rest of the dansaris of the Courte had, the ballattis of that aige[962] did witnes, quhilk we for modesteis sake omit. Bot this wes the commoune complaint of all godlie and wyse men, that giff thai thocht that sick ane Courte soulde lang continew, and giff thai luikit for no uther lyffe to cum, thay wald haif wissit thair soneis and dochteris rather to have bene brought up with fydlaris and dansaris, and to have bene exerceit in flinging upone ane flure, and in the rest that thairof followis, than to haif bene nurisched in the companie of the godlie, and exerceissit in vertew, quhilk in that Courte wes haittit, and fylthines not onlie maintenit, bot also rewairded. Witnes the Lordschip[963] of Abercorne, the baronie of Authormortie,[964] and diverse utheris pertenyng to the patrimonie of the Crowne, gyffin in heritage to scouparis, dansaris, and dalliaris with damis. This wes the begyning of the regement of Marie Quene of Scottis, and thir wer the fructeis that sche brocht furth of France. "Lorde, luik upone our mysereis, and delyver us from the tyrannie[965] of that hure, for thy awin meir mercies saik."

God from hevin, and upone the face of the eirth, gaif declaratioun that he wes offendit at the iniquitie that wes committit evin within this Realme; for upone the 20th day of Januare thair fell weit in grit aboundance, quhilk in the falling freisit so vehementlie, that the eirth wes bot ane scheit of ysce. The foules baith grit and small freisit, and mycht nocht flee: monie deyit, and sum wer takin and laid besyde the fyre, that thair fetheris mycht resolve. And in that same moneth the sey stude still, as wes clerlie observed, and nather ebbit nor flowit the space of 24. houris. In the moneth of Februare, the 15th and 18th day thairof, wes sene in the fyrmament battelis arrayit, speiris, and utheris weapounis, and as it had bene the joinyng of two armeis. Thir thingis wer nocht onlie observed, bot also spokin and constantlie affyrmed be men of jugement and credit. But the Quene and our Court maid myrrie. Thair wes banketting upoun banketting. The Quene wald banket all the Lordis; and that wes done upoun polessie, to remove the suspitioune of hir displesour aganis thame, becaus thai wald nocht at hir devotioun dampne Johne Knox. To remove, we say, that jeloussie, sche maid the banket to the haill Lordis, quhairat sche wald haif the Duke amangis the rest. It behuifit thame to banket hir agane; and so did banketting continew till Fastronis-evin and efter. But the pure Mynisteris wer mockit, and reputed as monsteris; the gaird, and[967] the effairis of the kytcheing wer so gryping, that the Mynisteris stipendis could nocht be payit; and yit at the Assemblie precedeand, solemnitlie promeis wes maid in the Quenis name, be the mouth of Secretour Lethingtoune, in the audiance of monie of the Nobylatie and of the hoill Assemblie, who affyrmeit, that he had commandiment of hir Heichnes to promeis[968] unto thame full contentatioun to all the Mynisteris within the Realme of thingis bygane; and of suche ordour to be keipit in all tymeis to cum, that the whole bodie of the Protestantis soulde haif occasioune to stand content. The Erle of Murray affermit the same, with monie uthair fair promeisses gevin be writ be Lethingtoune him self; as in the register of the Actis done in the Generall Assemblie may be sene.[969] Bot how that, or yit anie uther thing promissit by hir, or in hir name, unto the Kirk of God, wes observed, the Warlde can witnes.

The Mynisteris perceaving all thingis tend to ruyne, dischairgit thair conscience in publict and in previt; but thay ressaifit for thair laubouris haitred and indignatioun; and amangis utheris, that worthie servand of God, Mr. John Craig, speiking aganis the manifest corruptioun that then withoute schame or feir declareit the self, said, "Sum tymeis wer hypocriteis knawin be thair disgyseit habittis, and we had men to be monkis, and women to be nunis; but now all thingis ar so chaingit, that we can nocht dyscerne the Erle frome the Abbot, nor the Nun frome sik as wald be haldin the Nobill-wemin;[970] so that we haif gottin ane new ordour of monkis and nunis. But, (said he,) seing that ye eschame not of that unjuste proffeit, wald God that thairwith ye had the coule of the nun, the vaill, yea, and the taill joyned with all,[971] that so ye mycht appeir in your awin cullouris."

This lybertie did so provoik the choller[972] of Lethingtoune, that in opin audience he gaif him unto the Devill, gif that ever efter that day he sould regaird what become of Mynisteris, that he sould do what he could, that his companyeounis sould haif ane skair with him; "And lat thame bark and blaw," said he, "alse loude as thay list." And so that wes the second tyme that he had gevin [his] defyance to the servandis of God. And heirupone raise whispering and complainttis, all be the flatteraris of the Courte, complenyng that men wer not cheritably[973] handyllit: "Mycht nocht synnis be repruifit in generall, albeit that men wer not so specialie taxed, that all the warlde mycht knaw of whome the preachour spak?" Quhairinto wes the ansuer maid, "Let men eschame publiklie to offend, and the Mynisteris sall abstene from specialiteis; but so lang as Protestantis ar not eschameit manifestlie to do aganis the evangill of Jesus Chryste, so lang can nocht the Mynisteris of God ceise to cry, that God wilbe revengit upoun sik abusearis of his holie worde."

And thus had the servandis of God ane doubill battell, fechting upoun the one syde aganis the idolatrie and the rest of the abominatiounis mentenit be the Quene; and upoun the uther pairt, aganis the unthankfulnes of sik as sumtyme wald haif bene estemed the cheiff pyllaris of the Kirk within the Realme.

The threitnyngis of the prechouris wer feirfull; but the Courte thocht the self in [such] securitie that it coulde nocht myscary.[974] The Quene, efter the banketting, keipit a dyett [be directioun of] Monsieur Lusury, Frenche man, who had bene acquaintit with hir maladie befoir, being hir physicioun:[975] And theirefter sche, for the secound tyme, maid hir progresses in the North,[976] and commandit to waird in the Castell of Edinburgh the Erle of Kaithness,[977] for ane murther committit be his servandis upoun the Erle of Merchellis men. He obeyit, bot he wes sodentlie relevit; for sik blude-thrystie men and Papeistis, sik as he is, ar best subjectis to the Quene. "Thy kingdome cum, O Lord; for in this Realme is no thing (amangis sik as soulde punische vyce and mentene vertew) but abhominatiounis abounding withoute brydell."

The flatteraris[978] of the Courte did daylie inrage aganis the pure Prechouris: happyest wes he that coulde invent the moist bytter tantis and disdainfull mokingis of the Mynisteris. And at lenth thai began to jest at the terme of Idolatrie, affirmyng, "That men wist nocht what thai spak, quhan thai callit the Messe Idolatrie." Yea, sum proceidit farder, and feirit nocht at opin tabilles to affirme, "That thai wald sustene the argument, that the Messe wes no Idolatrie." These thingis cuming to the earis of the prechouris, wer proclamit in publyct pulpett of Edinburgh, with this complaynt direct be the speikare[979] to his God. "O Lord, how lang sall the wyckit prevaill aganis the juste! How lang sall thou suffer thy self and thy blessit Evangill to be dyspysit of men; of men, we say, that makis[980] thame selfis defendaris of the treuth! For of thy manifest and knawin ennemeis we complene nocht, bot of such as unto whom thou hes reveilit thy lycht: for now it cumis into our eiris, that men, not Papistis, we say, bot cheif Protestantis, will defend the Messe to be no Idolatrie. Giff so wer, O Lord, myserablie haif I bene disavit, and myserablie, alace, O Lord, haif I deceavit thy peopill; quhilk thou knawis, O Lord, I haif evir moir abhorrit than a thousand deithis. Bot," said he, turnyng his face towardis the rowme where sik men as so had affirmed, sat, "Gif I be nocht able to prove the Messe to be the moist abhominable Idolatrie that evir wes useit sen the begynning of the Worlde, I offer my self to suffer the punischement appoyntit be God to a fals teichare; and it appeiris unto me," said the preichare, "that the affirmeris soulde be subject to the same law: for it is the treuthe of God that ye persecute and blaspheme; and it is the inventioun of the Devill, that obstinatlie aganis his Worde, ye menteyne. Whairat, albeit ye now flyrt and ye flyre, as [thocht] that all wer spokin wer but wind,[981] yit am I [als] assureit, as I am assureit that my God leveth, that sum that hear this your defectioun and railling aganis the treuthe and servandis of God, sall see ane pairt of Godis jugementis poured furth upoun this Realme, (and pryncipallie upoun you[982] that fastest cleifes to the favour of the Courte,) for the abominatiounes that ar be you menteneit." Albeit that suche vehemencie provoikit teiris of sum, yit those men that knew themselfis guilty, in a mocking maner said, "We must recant, and burne oure bill; for the Prechouris ar angrie."

The Generall Assemblie, halden in Junij 1564,[983] approcheit, unto the which greit[984] pairt of the Nobylatie, of those that ar callit Protestantis, convenit; sum for assistance of the mynisteris, and sum to accuse thame, as we will efter heir.[985]

A lyttill befoir the trubles, quhich Sathan raised in the bodie of the Kirk, began Davie[986] to grow grit in Courte. The Quene usit him for Secretarie, in thingis that appertenit to hir secreit effaires, in France[987] or ellis quhair. Grit men maid in Courte unto him, and thair sutes wer the better heard. Bot of the begynning and progress, we delay now forder to speik, becaus his end will requyre the descryptioune of the whole: [And referris it unto suche, as God sall rayse up to do the same.][988]

The first day of the Generall Assemblie, the Courtiouris nor the Lordis that dependit upoun the Court, presentit nocht thame selfis in the sessioun with thair Bretherin. Whairat monie wondering, ane anceyant and honorable man, the Laird of Lundie,[989] said, "Nay, I wonder nocht of thair present absence; but I wonder that at our last Assemblie, thai drew thame selfis ane pairt, and joynit nocht with us, but drew from us some of our mynisteris, and wylleit thame to conclude sik thingis as war never proponit in the publick Assemblie, [quhilk apperis to me to be a thing][990] verrie prejudiciall to the libertie of the Kirk. And, thairfoir, my jugement is, that thai salbe informit of this offence, quhilk the whole Bretherin haif consaveit of thair former falt; humblie requyring thame, that gif thai be Bretherin, thai will assist thair Bretherin with thair presence and counsall, for we had nevir grytter neid. And gif thai be myndit to fall back from us, it wer better we knaw it now than afterward." Thairto aggreyit the whole Assemblie, and gaif commissioun to certene Bretherin to signify the myndis of the Assemblie to the Lordis; quhilk wes done that same day efter noon.[991]

The Courteouris at first semeit nocht a lyttill offendit, that thay sould be as it wer suspectit of defectioun: yit, nevirtheles, upoun the morrow, thai joynit with the Assemblie, and come into it: But thai drew thame selfis, lyke as thai did befoir, apairt, and enterit the Inner Counsell-house. Thair wes the Dukis Grace, the Erles Argyle, Murray, Mortoun, Glencarne, Merchell, Rothes; the Maister of Maxwell, Secretour Lethingtoun, the Justice Clark, the Clark of Register, and the Controllour, the Laird of Pittarro.

Efter a lyttill consultatioun, thai direct ane messinger, Mr. George Hay,[992] than callit the Minister of the Court, requyring the Superintendantis, and sum of the leirnit ministeris, to confer with thame. The Assemblie ansuerit, "That thai convenit to delyberat upoun the commoun effairis of the Kirk; and, thairfoir, that thay could nocht lack thair Superintendantis and cheif ministeris, whose jugementis wer so necessarie, that without thame the rest sould sit as it wer idill; and thairfoir willand thame (as of befoir) that gif thay acknawlege thame selfis memberis of the Kirk, that thai wald joyne with the Bretherin, and propone in publict sik thingis as thai pleissit; and so thai sould haif the assistance of the whole in all thingis that mycht stand to Godis commandiment. But to send from thame selfis a portioun of thair companie, thai understand that thairof hurt and sclander mycht aryse, rather than anie proffeit or conforte to the Kirk: for thay feirit, that all men sould nocht stand content with the conclusioun, whair the conference and ressounis wer hard but of a few."

This ansuer wes nocht giffin without cause; for no small travell wes maid, to haif drawin sum mynisteris to the factioun of the Courtiouris, and to haif sustenit thair argumentis and opiniounis. But whan it wes persaifit be the moist politick amangis thame, that thai could not prevaill be that meanes, thai proponeit the matter in uther termis, purging thame selfis, first, that thai nevir ment to devyde[993] thame selfis from the sociatie of thair bretherin; but, because thai had certane heidis to confer with certane ministeris; thairfoir, for avoyding of confusioun, thai thocht it mair expedient to haif the conference befoir a few, rather than in the publict audience. But the Assemblie[994] did still reply, "That secreit conference wald thay nocht admit in those heidis that sould be concludit be generall voit." The Lordis promeissit, "That no conclusioun sould be taikin, nether yit voit requyreit, till that bayth the propositiounis and the ressounis sould be heard, and considderit of the whole bodie." And upoun that conditioun wer directit unto thame, with expressit chairge to conclude no thing without the knawledge[995] and advyse of the Assemblie, the Laird of Dun, Superintendant of Anguss, the Superintendantis of Lothyane and Fyffe,[996] Mr. John Row, Mr. John Craig, Williame Crystisoune, Mr. David Lyndesay, mynisteris, with the Rectour of Sanctandrois,[997] and Mr. George Hay; the Superintendant of Glasgow, Mr. Johne Willok, wes Moderatour, and Johne Knox waitit upoun the Scrybe. And so thay wer appoyntit to sit with the Bretherin. And that because the principall compleint tuychit[998] Johne Knox, he wes also callit for.

Secretour Lethingtoun began the harangue,[999] which contenit these heidis: First, How much we wer adettit unto God, be whois providence we had libertie of religioun under the Quenis Majestie, albeit that sche wes nocht persuadeit in the same: Secoundlie, How necessarie ane thing it wes that the Quenis Majestic, be all gude offices, (so spak he,) of the Kirk, and of the mynisteris principally, sould be retenit in that constant opinioun, that thai unfeinzeitlie favourit hir advancement, and procureit hir subjectis to haif ane gude opinioun of hir: And, last, How daingerous ane thing it was, that mynisteris sould be noittit ane to disagree from ane uther, in form of prayer for hir Majestie, or in doctrine conserning obedience to hir Majesties authoritie: "And in these two last heidis, (said he,) we desyre you all to be circumspect; but especially we maun craif of you our brother, Johne Knox, to moderat your selff, als weall in form of praying for the Quenis Majestie, as in doctrine that ye propone tuyching hir estait and obedience. Neither sall ye tak this, (said he,) as spokin to your reproche, quia nevus[1000] interdum in corpore pulchro, but becaus that otheris, by your example, may imitate the lyke libertie, albeit nocht with the same modestie and foirsycht; and what opinioun may ingedder[1001] in the peopillis heidis, wyse men do forsee."

The said Johne prepairit him for ansuer, as followis: "Gif such as feir God haif occasioune to praise him, that becaus that idolatrie is maintenit, the servandis of God dispyseit, wyekit men placeit agane in honour and authoritie, (Mr. Henrie Synclair wes of schort tyme befoir maid President,[1002] who befoir durst nocht haif syttin in jugement;) and, finalie, (said he,) gif we aucht to prais God becaus that vice and impyettie overfloweth this hoill Realme without punischment, than haif we occasioun to rejoise and to prayse[1003] God: But gif those and the lyke use to provoik Godis vengeance aganis Realmis and Natiounis, than, in my jugement, the godlie within Scotland aucht to lament and murne; and so to prevent Goddis jugementis, leist that he, fynding all in a lyke security,[1004] stryke in his hot indignatioun, begynning [perchance] at sik as think thai offend nocht."

"That is ane heid," said Lethingtoun, "whairinto ye and I nevir aggreyit; for how ar ye abill to prove that evir God straik or plaigit ane natioun or peopill for the iniquitie of thair Prince, gif that thame selfis levit godlie?"

"I lukeit," said he, "my Lord, to haif audience, till that I had absolvit the uthor two pairtis; but seing it pleissis your Lordship to cut me off befoir the myddis, I will ansuer to your questioun. The Scriptour of God teichis me, that Jerusalem and Juda wes punischit for the sinne of Manasses; and gif ye will allege, that thai wer punischit because that thai wer wyckit, and offendit with thair King, and nocht because thair King wes wyckit; I ansuer, that albeit the Spreit of God makis for me, saying in expressit wordis, 'For the syn of Manasses,' yit will I nocht be so obstinat as to lay the whole syn, and plaigis that thairof followit, upoun the King, and utterlie absolve the peopill; but I will grant with you, that the whole peopill offendit with the King: but how, and in what fassioun, I feir that ye and I sall nocht agrie. I doute nocht but the grit multitude accumpanit him in all abhominatiounis quhilk he did; for idolatrie, and ane fals religioun haith evir bene, is, and wilbe plesing to the moist pairt of men. But to affirm that all Juda committit realie the actis of his impyettie, is but to affirm that quhilk nether hes certentie, nor yit appeirence of ane treuth: for who can think it to be possible, that all those of Jerusalem sould so schoirtlie turn to externall idolatrie, considdering the notabill reformatioun laitlie befoir had in the days of Ezechias? But yit, says the text, 'Manasses maid Juda and the inhabitantis of Jerusalem to erre.' True it is; for the one pairt, as I haif said, willinglie followit him in his idolatrie, and the other, be ressoune of his authoritie, sufferit him to fyle Jerusalem, and the tempill of God, with all abhominatiounis, and so wer thai all cryminall for his sin; the one be act and deid, the uther be suffering and permissioun: even as hoill Scotland is guiltie this day of the Quenis idolatrie, and ye, my Lordis, speciallie above all utheris."

"Weill," said Lethingtoun, "that is the cheif heid quhairin we nevir aggreit; but of that we sall speik heirefter. What will ye say as tuyching the moveing of the peopill to haif ane gude opinioun of the Quenis Majestie, and as concerning obedience to be gevin to hir authoritie, as also of the form of the prayer quhilk commounlie ye use," &c.

"My Lord," said he, "moir eirnistlie to move the peopill, or yit utherwyse to pray than heirtofoir I haif done, a gude conscience will nocht suffer me; for He who knawis the secreittis of hertis, knawis that privilie and publictlie I haif callit to God for hir conversioun, and haif willit the peopill to do the same, schawing thame the dangerous estait quhairin nocht onelie sche hir self standis, but also the haill Realme, be the ressoun of hir indureit blindnes," &c.

"That is it," said Lethingtoun, "whairin we find gryttest falt. Your extremitie aganis hir Messe, in particular, passis meassour. Ye call hir ane slaif to Sathan; ye affirme that Godis vengeance hingis oure the Realme, be ressoune of hir impietie;[1006] and what is this ellis but to rouse up the hairt of the peopill aganis hir Majestie, and aganis thame that serve hir."

Thair wes heard ane exclamatioun of the rest of the flatteraris, that sick extremittie could nocht proffit. The Maister of Maxwell said in plane wordis, "Gif I war in the Quenis Majesties place, I wald nocht suffer sick thingis as I heir."

"Gif the wordis of prechouris," said Johne Knox, "sall alwayis be rest to the worst pairt, than will it be hard to speik onie thing so circumspectlie, provyded that the treuth be spokin, quhilk sall not eschape the censure of the calamniatour. The moist vehement, and, as ye speak, excessive maneir of prayer that I use in publict is this, 'O Lord, gif thy plesour be, purge the hairt of the Quenis Majestie from the venoum of idolatrie, and deliver hir from the boundage and thraldom of Sathan, in the quhilk sche hes bene brocht up, and yit remanis, for the lack of true doctrine; and lat hir see, be the illuminatioun of thy Holie Spreit, that thair is no meane to pleis thee but be Jesus Christ thy onlie Son, and that Jesus Christ can nocht be found but in thy holie word, nor yit ressavit but as it prescrybeis; which is, to renunce our awin wittis, and preconsavit opinioun, and worschip thee as thou commandis; that in sa doing sche may avoid that eternall dampnatioun quhilk abydeis all obstinat and impenitent unto the end; and that this poor Realme may also eschaip that plaig and vengeance quhilk inevitablie followis idolatrie, menteinit aganis thy manifest worde, and the opin lycht thairof.' This, (said he,) is the form of my commoun prayer, as your selflis can witnes. Now, what is worthie reprehensioun in it I wald heir?"

"Thair ar three thingis," said Lethingtoun, "that nevir lykeit unto me. And the first is, Ye pray for the Quenis Majestie with ane conditioun, saying, 'Illuminat hir hairt, gif thy gude plesour be;' quhairby it may appeir, that ye doute of hir conversioun. Whair haif ye the example of sik prayer?"

"Whairsoevir the exampillis are," said the uther, "I am assureit of the reule, whilk is this, 'Gif we sall ask onie thing according to his will, he sall heir us;' and our Maister, Chryst Jesus, commandit us to pray unto our Father, 'Thy will be done.'"

"But," said Lethingtoun, "whair evir find ye onie of the Propheitis so to haif pray it?"

"It sufficeth me," said the uther, "my Lord, that the Maister and teicheare of bayth Prophettis and Appossillis hes taucht me so to pray."

"But in so doing," said he, "ye put ane doute in the peopillis heid of hir conversioun."[1007]

"Nocht I, my Lord," said the uther, "but hir awin obstinat rebellioune causis mo than me to doute of hir conversioun."

"Whairinto," said he, "rebellis sche aganis God?"

"In all the actiounis of hir lyffe," said he, "but in thir two heidis especiallie; former, That sche will nocht heir the preiching of the blissit evangill of Jesus Chryst; and secoundlie, That sche menteinis that idoll, the Messe."

"Sche thinkis nocht that rebellioune," said Lethingtoun, "but goode religion."

"So thocht thai," said the uther, "that sumtymes offerit thair childerin unto Moloch, and yit the Spreit of God affirmeis that thai offerit thame unto devillis, and nocht unto God. And this day the Turkis thinkis to haif ane better religioune than the Papistis haif; and yit, I think, ye will excuse nether of thame boith from committing rebellioun aganis God: nether yit justlie can ye do the Quene, onles that ye will mak God to be parcyall."

"But yit," said Lethingtoun, "why pray ye nocht for hir without moving onie doute?"

"Becaus," said the uther, "I haif leirnit to pray in faith. Now Faith, ye know, dependis upoun the wordis of God, and so it is that the word teichis me, that prayeris proffettis the sonis and dochteris of Godis electioun, of which noumer, quhether sche be ane or nocht, I haif just cause to doute; and, thairfoir, I pray God 'illuminat hir hairt, gif his gude plesour be.'"

"But yit," said Lethingtoun, "ye can produce the exampill of none that so hes prayit befoir you."

"Thairto I haif alreddy ansuerit," said Johne Knox; "but yit for farther declaratioun, I will demand ane questioun, quhilk is this, Quhider gif ye think that the Appossillis prayit thame selves as thai commandit utheris to pray."

"Who douttis of that?" said the haill companie that wer present.

"Weill than," said Johne Knox, "I am assureit that Peter said thir wordis to Symoun Magus, 'Repent thairfoir of this thy wyckitness, and pray to God, that gif it be possible the thought of your hairt may be forgevin thee.' Heir we may cleirlie see that Peter joynes ane conditioun with his commandiment, That Symoun sould repent and pray, to wit, gif it wer possible that his sin mycht be forgevin; for he wes nocht ignorant that sum synnis wer unto the deith, and so without all houpe of repentence or remissioun. And think ye nocht, my Lord Secretar, (said he,) but the same doute may tuich my hairt, as tuyching the Quenis conversioun, that then tuiched the hairt of the Appossill?"

"I wald nevir," said Lethingtoun, "heir you or onie uther call that in doubt."

"But your will," said the uther, "is no assurance to my conscience: And to speik frelie, my Lord, I wonder gif ye your self doute nocht of the Quenis conversioun; for more evident signes of induratioun haif appeirit, and still do appeir in hir, than Peter outwartlie could haif espyit in Symoun Magus. For albeit sum tymes he wes are sorcerar, yit joynit he with the Appossillis, belevit, and wes bapteissit; and albeit that the venome of avarice remaneit in his hairt, and that he wald haif bocht the Holie Goist, yit when he heard the feirfull threitnyngis of God pronunceand aganis him, he trymbillitt, desyreit the assistance of the prayeris of the Appossilis, and so humblit him self, so far as the jugement of man could perss, lyke ane true penitent, and yit we see that Peter douttis of his conversioun. [Quhy then may not all the godly justly doubt of the conversioun[1008]] of the Quene, wha hes usit idolatrie, quhilk is no less odious in the sicht of God than is the other and still continewis in the same, yea, that dispyseis all threitnyngis, and refuisses all godlie admonitiounis?"

"Quhy say ye that sche refuisses admonitioun?" said Lethingtoun. "She will glaidlie heir ony man."

"But what obedience," said the uther, "to God or to his worde, ensewis of all that is spokin unto hir? Or when sall sche be sene to gif hir presence to the publict preiching?"

"I think nevir," said Lethingtoun, "so lang as sche is thus intreittit."

"And so lang," said the uther, "ye and all utheris maun be content that I pray so as I may be assureit to be heard of my God, that his gude will may be done, ether in making hir comfortable to his Kirk, or gif that he hes appoyntit hir to be ane scurge to the same, that we may haif patience, and sche may be brydellit."

"Weill," said Lethingtoun, "lat us cum to the Secound Heid. Whair find ye that the Scriptour callis onie the bound slaiffis to Sathan? or that the Propheittis of God speik so irreverentlie of kingis and princes?"