The certane knowledge of all these thingis came to our earis, whairat many war effrayed; for diverse suspected that England wald nott be so fordwarde in tymes to cum, considering that thair formar expensses war so great. The principall conforte remaned with the preacheouris; for thei assured us in Goddis name, that God should performe in all perfectioun that worke in our handis, the begyning whairof he had so mychtelie mainteaned, becaus it was not ouris, but his awin; and thairfoir exhorted us that we should constantlie proceid to reforme all abuses, and to plant the ministerie of the Churche, as by Goddis word we mycht justifie it, and then committ the successe of all to our God, in whose power the dispositioun of kingdomes standis. And so we begane to do, for troubles appearing, maid us give ear to the admonitionis of Goddis servandis. And whill that we had skarslie begune agane to implore the helpe of our God, and to schaw some signes of our obedience unto his messingeris, and holy worde, lo! the potent hand of God from above send unto us a wonderfull and most joyfull deliverance: For unhappy Francis, husband to our Soverane, suddandlie perissheth of a rottin ear. But becaus the death of that child was nott onlie the cause of joy to us in Scotland, but also by it war the faythfull in France delivered, as it ware, from the present death, we think expedient to entreat the same somewhat more largelie.
These cruell and conjured ennemyes of God, and of all godlynes, the Duck of Gwyse, the Cardinall of Lorane, and thair factioun, who then at thair awin appetite plaide the tyrantis in France, had determined the destructioun[289] of all that professed the trew knowledge of Jesus Christ within that Realme. What tyranny laite befoir thei had used at Amboyse, the historie of France doth witness. Now, in Orleance, in the moneth of November, conveyned the King, unhappie Francis, the Quene oure Soverane, and the Quene Mother, the Duck of Gweise, with all his factioun, the King of Navar, and the Prince his brother.[290] So that great was the confluence of the Nobilitie; but greater was the assemblie of the murtheraris; for thair was nott a hangman in all France whiche was nott thair. The preasonis ware full of the trew servandis of God: the King of Navar and the Prince war constitut preasonaris. The Schereff of Orleance, a man fearing God, was tackin, and so war many otheris of the toune. Breiflie, thair was none that professed God or godlyness within that toune, that looked nott for the extreamitie; for the walles and yettis war nycht and day keapt with tha garnysonis of the Gwysianes: miserable men war dalie browght in to suffer judgement, but none was suffered to departe furth butt at the devotioun of the tyrantis. And so thei proceided till the tent or twelft[291] of December, when that thei thowght tyme to putt thair bloody counsall in executioun, and for that purpoise conclusioun was tackin that the King should departe of the toune, and lye at a certane place; whiche was done to this intent, that thair should no suyte be maid to the King for the saiftie of any manis lyfe, whome thei thowght worthy of death. And so was the Kingis house in Orleance broken up, his beddis, cofferis, and tapistree sent away; his awin buttis putt on, he sitting at the Messe, immediatlie thairafter to have departed, and so thair tyrannie to have begune,—when all thingis, we say, war into this readdyness to sched the bloode of innocentis, the Eternall, our God, who ever watches for the preservatioun of his awin, begane to work, and suddandlie did put his awin werk in executioun. For as the said King satt at Messe, he was suddandlie strikkin with ane aposthume, in that deaf eare that never wald hear the treuth of God; and so was he caryed to ane void house, layd upoun a palliase unto suche tyme as a cannabie was sett up unto him; whair he lay till the fyftene day of December, in the year of God Jm Vc threscoir yearis,[292] when his glorie perished, and the pryde of the stubburne heart evanished in smok. And so was the snare brokin, the tyrantis disappoynted of thair crueltye; those that war appointed to death rased, as it war out of thair graves; and we, who by our foolischnes had maid our selves slaves to strangearis, war restored agane to freedome and libertie of a free Realme.
"Oh! that we had heartis deaplie to considder what ar thy wonderouse workis, O Lord, that we mycht praise Thee in the myddest of this most obstinat and wicked generatioun, and leave the memoriall of the same to oure posterities, whiche, allace, we fear, shall forget thy inestimable benefites." The godlie in France, upoun this suddane death, sett furth in these verses ane admonitioun to Kingis:—
Ad hujus temporis Monarchas Protrepticon Carmen.[293]
The meanyng whairof is, that Charles—
The death of this King maid great alteratioun in Fraunce, England, and Scotland. France was erected in some esperance, that the tyranny of the Gwysianis should no longar ring above thame, becaus that God at unwares had brokin the staff whairupoun thei leaned. But, allace, thei war deceaved: for the simplicitie of some was so abused, that, against the lawes of the Realme, to the Quene Mother was committed regiment: which lifted up asweill the Duck of Gwyse, as the cruell Cardinall for a seassone.
The Quene of England and the Counsall, remitted our Ambassadouris with answer, "That sche wald nott marye hastelye, and, thairfoir, willed the Counsall of Scotland, and the Erle of Arrane, foirsaid, nott to depend upoun any hope thairof."[296] What motives she had, we omitt.
The pryde of the Papists of Scotland begane to be abated, and some that ever had schawin thame selfis ennemyes unto us, begane to think, and planelie to speak, (amanges whom the auld Schiref of Ayr[297] was one,) that thei perceaved God to feght for us. The Erle of Arrane him self did more patientlie abyd the repulse of the Quene of England, becaus that he was nott altogitther without hope that the Quene of Scotland bare unto him some favour. And so he wrait unto her, and send for credite a ryng, whiche the said Quene our Soverane knew well yneuch. The letter and ring war baith presented to the Quene, and of her receaved. Answer was returned to the said Erle, after the whiche he maid no farther persuyte in that mater: and yitt, not the less, he bare it heavelie in harte,[298] and more heavelie then many wold have wissed.
The certaintie of the death foirsaid was signified unto us both by sea and land. By sea receaved Johnne Knox (who then had great intelligence both with the churches,[299] and some of the Courte of France) letteris, that the King was mortallye seak, and could nott weall eschap the death. Which letteris receaved, that same day at afternoon, he passed to the Duckis Grace, to his awin ludging at the Kirk of Feild,[300] [with] whome he fand the Lord James in conference togitther, (the Erle of Arrane was in Jedburgh,) to whome he opened such newis as he had receaved, and willed thame to be of good conforte; for, said he, the advertissare never hes yitt abused me: it is the same gentilman that first gave us knawledge of the slauchter of Hary King of France; and shew unto thame the letter, but wold nott expresse the manis name. Whill thei war reassonying in diverse purposes; and he upoun the one parte conforting thame, and thei upoun the other parte conforting him, (for he was in no small heaviness be reassone of the late death of his dear bedfellow, Marjorie Bowis,)[301] whill (we say) thei three war familiarlie commonyng togetther, thair came a messinger from the Lord Grey,[302] furth of Berwick, with letteris, assuring him of the death of the King of France. Which devulgat and noysed abrode, a generall Conventioun of the haill Nobilitie was appointed to be holdin at Edinburgh the fyvetene[303] day of Januare following, in the whiche the Booke of Discipline was perused newlie oure agane, for some pretended ignorance, be reassone thei had not heard it.
In that assemblie was Maister Alexander Andersone, sub-principall of Abirdene,[304] a man more subtill and craftye then ather learned or godlie, called, who refused to dispute in his fayth, abusing a place of Tertulliane to cloik his ignorance. It was ansuered unto him, That Tertulliane should nott prejudge the authoritie of the Holy Ghost, who, by the mouth of Peter, commandis us to geve reassone for our faith to everie one that requires the same of us. It was farther answered, That we neather required him neather yitt any man to dispute in any pointe concernyng our fayth, whiche was grounded upoun Godis word, and fully expressed within his holy Scriptures; for all that we belevit without contraversie. But we required of him, as of the rest of Papistis, that thei wald suffer thair doctrin, constitutionis, and ceremonies to come to tryall; and principallie, that the Messe, and the opinioun thairof by thame taught unto the people, mycht be laid to the squair-reull of Goddis worde, and unto the rycht institutioun of Jesus Christ, that thei mycht understand whither that thair Preacheris offended or nott, in that, that thei affirmed, "The actioun of the Messe to be expressedlye repugnyng unto the last Supper of the Lord Jesus; the sayar of it to committ horrible blasphemye, in usurping upoun him the office of Christ; the hearars to committ damnable idolatrie, and the opinioun of it conceaved to be derogatioun, and as it war, disanulling of Christis death." Whill that the said Maister Alexander denyed that the preast took upoun him Christis office, to offer for syne, as was alledged, a Messe book was produced, and in the begyning of the Canon war these wordis redd: Suscipe, Sancta Trinitas, hanc oblationem, quam ego indignus peccator offero tibi vivo Deo et vero, pro peccatis meis, pro peccatis totius Ecclesiæ vivorum et mortuorum, &c.[305] "Now, (said the reasonare,) yf to offer for the synnes of the haill Kirk was nott the office of Christ Jesus, yea, that office that to him onlie mycht, and may apparteane, lett the Scripture judge. And yf a vyle knave, whome ye call the preast, proudlie tackis the same upoun him, lett your awin hook witnesse." The said Maister Alexander ansuered, "Christ offered the propitiatorie, and that could nane do but he; but we offer the remembrance." Whairto it was ansuered, "We praise God, that ye have denyed a sacrifice propitiatorie to be in the Masse; and yet we offer to prove, that in mo then a hundreth places of your Papisticall Doctouris, this propositioun is affirmed, 'The Messe is a sacrifice propitiatorie.' But, to the secound parte, whair ye allege that ye offer Christ in remembrance, we ask, first, Unto whome do ye offer him? and nixt, By what authoritie are ye assured of weall-doing? In God the Father, thair fallis no oblivioun: and yf ye will yitt schift and say, That ye offer it nott as God war forgetfull, but as willing to apply Christis merittis to his Churche; we demand of you, What power and commandiment ye have so to do? We know that our Maister, Christ Jesus, commanded his Apostles to do that whiche he did 'in remembrance of him;' but plane it is, that Christ took bread, gave thankis, braik bread, and gave it to his disciples, saying, 'Tak ye, eat ye; this is my body whiche is broken for you. Do this in remembrance of me,' &c. Here we fynd a commandiment to tak, to eat, to tak and to drink; but to offer Christis body eather for remembrance or applicatioun, we fynd not: and thairfoir, we say, to tack upoun you ane office which is nott gevin unto you, is injust usurpatioun, and no lauchfull power." The said Maister Alexander being more then astonished, wold have schifted; but then the Lordis willed him to ansuer directlie. Whairto he ansured, "That he was better seane in philosophie, then in theologie." Then was commanded Maister Johne Leslie, (who then was Parsone of Une, and now Lord Abbote of Londoris,)[306] to ansuer to the formare argument: and he with grait gravitie begane to answer, "Yf our Maister have nothing to say to it, I have nothing; for I knaw nothing but the Cannoun Law: and the greatest reassone that ever I could fynd thair, is Nolumus and Volumus." And yitt we understand that now he is the onlie patrone of the Messe. But it is no mervall, for he understoode that he is a Preastis gett; and thairfoir we should nott wonder albeit that the auld trowane verse be trew, Patrem sequitur sua proles. The Nobilitie hearing that neather the one nor the other wold ansure directlie, said, "We have bene miserable deceaved heirtofoir; for yf the Messe may not obteane remissioun of synnes to the quick and to the dead, whairfoir war all the Abacyes so richelie doted with oure temporall landis?"
Thus much we thocht good to insert here, becaus that some Papistis ar nott eschamed now to affirme, That thei with thair reassonis could never be hearde; but that all that we did, we did by fyn force; when that the haill Realme knawis, that we ever requyred thame to speak thair judgmentis freelie, not onlie promissing unto thame protectioun and defense, but also that we should subscrive with thame, yf thei by Goddis Scriptures could confute us, and by the same word establisse thair assertionis. "But who can correct the leasingis of such as in all thingis schaw thame selves the sones of the Father of all lyes. Preserve us, Lord, from that perverst and malitious generatioun. Amen."
At this same Assemblie was the Lord James appoynted to go to France to the Quene oure Soverane;[308] and a Parliament was appointed to begyn the twenty of Maij nixt following; for at that tyme was the returne of the said Lord James looked for. And so was that Conventioun dissolved without any other thing of importance concluded. The said Lord James prepared him for his jornay; (for albeit he past in the publict effairis, he susteaned the charge of his awin expensses; and yit thair never past fra this Realme in the cumpanye of one man so many, and so honest, throwght England to France.) Befoir he departed, he was foirwarned asweill of the danger in France, as of the Quenis craft, (not that we then suspected her nature, but that we understoode the malice of hir freindis:) he was planelie premonisshed, that yf ever he condiscended that sche should have Messe publictlie or privatlie within the Realme of Scotland, that then betrayed he the caus of God, and exponed the religioun evin to the uttermoist danger that he could do. That sche should have Messe publictlie, he affirmed that he should never consent: but to have it secreatlie in hir chalmer, who could stopp hir? The danger was schawin; and so he departed.
The Electioun of the Superintendentis heirefter followed in this maner:[309]—
. . . . . .
The Forme and Ordour of the Electioun of the Superintendents, quhilk may serve also in Electioun of all uther Ministers. At Edinburghe the 9th of Merche 1560[310] yeiris, Johne Knox being Minister.[311]
First was made a Sermone, in the quhilk thir Heids war intreated. First, The necessity of Ministers and Superintendents. 2. The crymes and vyces that micht unable thame [of the ministrie]. 3. The vertues required in thame. And last, Quhidder sick as by publict consent of the Kyrk wer callit to sick Office, micht refuis the same.
The Sermone finisched, it was declared be the same Minister, (maker thareof,) that the Lords of Secrete Councell had given charge and power to the Kirkis of Lauthiane, to chuse Mr. Johne Spottiswode[312] Superintendent; and that sufficient warning was made be publict edict to the Kirks of Edinburghe, Linlythgow, Striveling, Tranent, Hadingtoun, and Dunbar; as also to Earles, Lords, Barones, Gentilmen, and uthers, having, or quho micht clame to have voite in Electioun, to be present that day, at that same hour; And, tharefore, inquisitioun was made, Quho wer present, and quho wer absent.
Efter was called the said Mr. Johne, quho answering; the Minister demanded, Gif ony man knew ony cryme or offence to the said Mr. Johne, that mycht unabill him to be called to that office? And this he demanded thryis. Secundlie, Questioun was moved to the haill multitude, If thair was ony uther quhome they wald put in Electioun with the said Mr. Johne. The pepill wer asked, If they wald have the said Mr. Johne Superintendent? If they wald honour and obey him as Christis Minister? and comfort and assist him in every thing perteining to his Charge? They Answerit.—We will; and we do promeis unto him sick obedience as becumethe the scheip to give unto thair Pastour, sa lang as he remains faythfull in his office.
The Answers of the Pepill, and thair consents receaved, thir Questiouns wer proponit unto him that was to be elected.
Questioun.—Seing that ye hear the thrist and desyre of this people, do ye not think yourself bound in conscience befoir God to support thame that so earnestly call for your comfort, and for the fruit of your labours?
Answer.—If anie thing wer in me abill to satisfie thair desyir, I acknowledge myself bound to obey God calling by thame.
Questioun.—Do ye seik to be promoted to this Office and charge, for ony respect of warldly commoditie, riches or glory?
Answer.—God knawes the contrarie.
Questioun.—Beleve ye not that the doctrine of the Propheits and Apostles, conteined in the buiks of the Auld and New Testaments, is the onely trew and most absolute foundatioun of the universall Kirk of Christ Jesus, insamekill that in the same Scriptures ar conteined all things necessary to be beleved for the salvatioun of Mankind?
Answer.—I verely beleve the same, and do abhorre and utterly refuis all Doctrine alleged necessary to Salvatioun, that is not expressedly conteined in the same.
Questioun.—Is not Christ Jesus Man of Man, according to the flesche, to wit, the Sone of David, the Seid of Abrahame, conceaved by the Holy Ghost, borne of the Virgin Marie his mother, the onely Head and Mediatour of his Kirk?
Answer.—He is, and without him thair is nouther salvatioun to man, nor lyfe to angell.
Questioun.—Is not the same Lord Jesus, [the] onely trew God, the Eternall Sone of the Eternall Father, in quhome all that sall be saved wer elected befoir the foundatioun of the world was layd?
Answer.—I confes and acknawlege him in the unitie of his Godheid, to be God above all thingis, blessit for evir.
Questioun.—Sall not they quhome God in his eternall councell hes electit, be callit to the knawlege of his Sone, our Lord Jesus? And sall not they, quho of purpoise are elected in this lyfe, be justified? And is not justificatioun and free remissioun of sinnes obtained in this lyfe by free grace? Sall not this glorie of the sonnes of God follow in the generall resurrectioun, quhen the Sone of God sall appeir in his glorious majesty?
Answer.—I acknawlege this to be the doctrine of the Apostles, and the most singular comfort of God's childrein.
Questioun.—Will ye not contein yourself in all doctrine within the boundes of this foundatioun? Will ye not study to promote the same, alsweill by your lyfe as by your doctrine? Will ye not, according to the graces and utterance that God sall grant unto yow, profes, instructe, and mantene the purity of the doctrine, conteined in the sacred Word of God? And, to the uttermost of your power, will ye not ganestand and convince the gaynsayers and teichers of mennis inventiouns?
Answer.—That I do promeis in the presence of God, and of his congregatioun heir assembled.
Questioun.—Knaw ye not, that the excellency of this office, to the quhilk God hes called yow, requires that your conversatioun and behaviour be sick, as that ye may be irreprehensible; yea, even in the eyis of the ungodly?
Answer.—I unfaynedly acknawlege, and humilly desyre the Kirk of God to pray with me, that my lyfe be not scandalous to the glorious Evangell of Jesus Christ.
Questioun.—Becaus ye are a man compassed with infirmities, will ye not charitably, and with lawlines of spirit, receave admonitioun of your Brethrein? And if ye sall happin to slyde, or offend in ony point, will ye not be subject to the Discipline of the Kirk, as the rest of your Brethrein?
The Answer of the Superintendent, or Minister to be elected.—I acknawlege myself to be a man subject to infirmity, and ane that hes neid of correctioun and admonitioun; and tharefoir I maist willingly submit and subject my self to the hailsume disciplin of the Kirk; yea, to the discipline of the same Kirk by the quhilk I ame now called to this office and chairge; and heir in God's presens and youris do promeis obedience to all admonitiones, secretly or publickly gevin; unto the quhilk, if I be found inobedient, I confes myself most worthie to be ejected not onely from this honour, bot also frome the society of the Faythfull, in cais of my stubburnnes: For the vocatioun of God to bear charge within his Kirk, makethe not men tyrantes, nor lordis, but appoynteth thame Servandis, Watchemen, and Pastoris of the Flock.
This ended, Questioun man be asked agane of the Multitude.
Questioun.—Require ye ony farther of this your Superintendent?
If no man answer, let the Minister proceid. Will ye not acknawlege this your Brother, for the Minister of Christ Jesus? Will ye not reverence the word of God that proceids fra his mouthe? Will ye not receave of him the sermone of exhortatioun with patience, not refuising the hailsome medicine of your saules, althocht it be bitter and unpleising to the flesche? Will ye not finally, mantene and comforte him in his ministry, against all sick as wickedly wald rebell against God and his holy ordinance?
The Peple answereth.—We will, as we will answer to the Lord Jesus, quho hes commandit his Ministeris to be had in reverence, as his ambassadours, and as men that cairfully watche for the salvatioun of our saullis.
Let the Nobility also be urged with this.—Ye have heard the dewty and professioun of this your Brother, by your consentis appointit to this charge; as also the dewty and obedience, quhilk God requireth of us towards him heir in his ministry: Bot becaus that neyther of bothe are abill to performe ony thing without the especiall grace of our God in Christ Jesus, quho hes promeised to be with us present, even to the consummatioun of the world; with unfayned hairtis, let us crave of him his benedictioun and assistance in this work begun to his glory, and for the comfort of his Kirk.
The Prayer.
O Lord, to quhome all power is gevin in heavin and in eirthe, thow that art the Eternall Sone of the Eternall Father, quho hes not onely so luifit thy Kirk, that for the redemptioun and purgatioun of the same, thow hes humilled thyself to the deyth of the Croce; and thareupoun hes sched thy most innocent bluid, to prepair to thyself a Spous without spott; bot also, to retein this thy most excellent benefite in memory, hes appointed in thy Kirk, Teichears, Pastores, and Apostles, to instruct, comfort, and admonische the same: Luk upoun us mercifully, O Lord, thow that onely art King, Teicher, and Hie Priest to thy awin flock; and send unto this our Brother, quhome in thy name we have chairged with the cheif cair of thy Kirk, within the boundis of Louthiane, sick portioun of thy Holy Spreit, as thareby he may rychtly devyde thy word to the instructioun of thy flocke, and to the confutatioun of pernitious erroures, and damnable superstitiones. Give unto him, gude Lord, a mouthe and wisdome, quhareby the enemies of thy truthe may be confounded, the wolfis expellit, and driven from thy fauld, thy scheip may be fed in the wholsum pastures of thy most holy word, the blind and ignorant may be illuminated with thy trew knawlege: Finally, That the dregis of superstitioun and idolatry quhilk yit restis within this Realme, being purged and removed, we may all not only have occasioun to glorifie thee our onely Lord and Saviour, but also dayly to grow in godlines and obedience of thy most holy will, to the destructioun of the body of synne, and to the restitutioun of that image to the quhilk we wer anes created, and to the quhilk, efter our fall and defectioun, we ar renewed by participatioun of thy Holy Spirit, quhilk by trew fayth in thee, we do profes as the blissit of thy Father, of quhome the perpetuall incres of thy graces we crave, as by thee our Lord and King, and onely Bischope, we are taucht to pray, saying, "Our Father that art in hevin, &c."
The prayer ended, the rest of the Ministers, if ony be, and Elders of that Kirk present, in signe of thair consents, sall tak the elected by the hand, and then the cheif Minister sall gif the benedictioun, as follows:—
God, the Father of our Lord Jesus Christ, quho hes comanded his Evangell to be preiched, to the comfort of his Elect, and hes called thee to the office of a Watchman over his peple, multiply his graces with thee, illuminat thee with his Holy Spirit, comfort and strenthen thee in all vertewe, governe and guyde thy ministry, to the prayse of his holy Name, to the propagatioun of Christis kingdome, to the comforte of his Kirk, and finally, to the plain dischairge and assurance of thy awin conscience in the day of the Lord Jesus; to quhome, with the Father, and the Holy Ghost, be all honour, prayse, and glory, now and ever. So be it.
The last Exhortatioun to the Elected.
Take heid to thy self, and unto the Flock comitted to thy chairge; feid the same cairfully, not as it wer of compulsioun, bot of very love, quhilk thow bearest to the Lord Jesus. Walk in simplicity and purenes of lyfe, as it becumethe the trew servand and ambassadour of the Lord Jesus. Usurpe not dominioun nor tyrranicall impyre over thy brethrein. Be not discouraged in adversity, bot lay befoir thyself the example of Propheits, Apostles, and of the Lord Jesus, quho in thair ministry susteaned contradictioun, contempt, persecutioun and deyth. Feir not to rebuik the warld of sinne, justice, and jugement. If ony thing succeid prosperously in thy vocatioun, be not puft upe with pryde; nether yit flatter thy self as that the gude succes proceided from thy vertew, industry, or cair: Bot let ever that sentence of the Apostle remane in thy hairt; "Quhat hes thou, quhilk thou hes not receavit? If thou hes receivit, quhy gloriest thou?" Comfort the afflicted, support the puir, and exhort utheris to support thame. Be not solist for things of this lyfe, bot be fervent in prayer to God for incress of his Holy Spirit. And finally, behave thyself in this holy vocatioun, with sick sobriety, as God may be glorified in thy ministry: And so sall thow schortly obtein the victory, and shall receave the crown promeised, quhen the Lord Jesus sall appeir in his glory, quhois Omnipotent Spirit assist thee and us unto the end. Amen.
Then sing the 23d Psalme.
The Ordour of the Electioun of Elderis and Deaconis in the Privie Kirk of Edinburgh, in the begynning, quhen as yet thair was no publict face of a Kirk, nor open Assemblies, bot secreit and privie Conventiounis in Houses, or in the Feilds.[313]
Befoir that thare wes ony publict face of a trew Religioun within this Realme, it pleised God of his grit mercie, to illuminat the hairts of mony privat persones, so that they did perceave and understand the abusses that wer in the Papisticall Kirk, and thareupoun withdrew thameselfis from participatioun of thare idolatrie. And becaus the Spirit of God will never suffer his awne to be idle and voyde of all religioun, men began to exercise thameselfis in reading of the Scriptures secreitly within thair awne houses; and varietie of persones culd not be keipt in gud obedience and honest fame, without Oversiers, Elders, and Deacones: And so begane that small flocke to put thameselfis in sick ordour, as if Christ Jesus had planely triumphed in the middes of thame by the power of his Evangell. And thay did elect sum to occupie the supreame place of exhortatioun and reading, som to be Elderis and helperis unto thame, for the oversight of the flocke: And some to be Deacones for the collectioun of almes to be distributed to the poore of thair awne bodie. Of this small begyning is that Ordour, quhilk now God of his grit mercie hes gevin unto us publictlie within this Realme. Of the principalls of thame that wer knowne to be men of gude conversatioun and honest fame in the privy Kirk, wer chosen Elders and Deacones to reull with the Minister in the publike Kirk; quhilk burdene thay patiently susteaned a yeir and mair: And then, becaus they could not (without neglecting of thair awen private houses) langer wait upoun the publict charge, they desyred that they micht be releaved, and that uthers micht be burdeined in thair roume: Quhilk was thocht a petitioun ressonabill of the haill Kirk. And tharefore it was granted unto thame, that thay sould nominat and gif up in electioun sick personages as thay in thair consciences thocht maist apte and abill to serve in that charge; provyding that they sould nominate double moe personis then war sufficient to serve in that charge, to the end that the haill Congregatioun micht have thair free vote in thair Electioun.
And this Ordour hes bene ever observed sen that tyme in the Kirk of Edinburgh; that is, that the auld Sessioun befor thair departure, nominat twenty-four in Electioun for Elders, of quhom twelve ar to be chosen, and thirty-two for Deacounes, of quhome sixteen ar to be elected; quhilk persones ar publictly proclaimed in the audience of the haill Kirk, upoun a Sonday befoir none, efter sermone; with admonitioun to the Kirk, that if ony man knaw ony notorious cryme or caus that micht unabill ony of these persones to enter in sick vocatioun, that they sould notifie the same unto the Sessioun the next Thursday: Or if ony knaw any persones mair abill for that charge, they sould notifie the same unto the Sessioun, to the end that na man eyther present or absent (being ane of the Kirk) suld complayne that he was spoyled of his liberty in electioun.
The Sonday following befoir none, in the end of the Sermone, the hole Communicants ar commandit to be present efternone, to gif thair votes, as they will answer befoir God, to sick as they esteme most abill to beir the charge of the Kirk with the ministers. The votes of all being receaved, the scroles of all ar delyvered to any of the ministers, quho keips the same secreit fra the sicht of all men till the next Thursday; and then in the Sessioun he produces thame, that the voites may be counted, quhare the moniest voites, without respect of persones, have the first place in the Eldership, and so proceiding till the number of twelve be compleit; so that if a puir man exceid the riche man in votes, he preceids him in place; and it is called the first, secound, and thrid Elder, even as the votes answereth. And this same is observed in the electioun of Deaconis.
The Fryday efter the jugement is tane quhat persones ar elected for Elders and Deacones to serve for that yeir; the minister efter his sermone, reids the same names publictly, and gives commandment openly, that sick persones be present the next Sonday at sermone befoir none, in the place to be appointed for thame, to accept of that charge that God by plurality of votes had layd upoun thame. Quho being conveined, the Minister efter sermone reids the names publictly, the absents (if ony be) ar noted, and these quho ar present ar admonisched to consider the dignity of that vocatioun, quhareunto God hes called thame; the dewty that they aucht to the pepill; the danger that lyes upoun thame, if they be found negligent in thair vocatioun: And finally, the dewty of the people towards the persons elected. Quhilk being done, this Prayer is red:—
The Prayer in the Electioun of the Elderis.
O Eternall and everlasting God, Father of our Lord Jesus Christ, quho, of thy infinite gudeness and mercy, hes chosin to thy self a Kirk of the lost seid of Adame, quhilk thow hes ever reulled by the inspiratioun of thy Holie Spirit; and yet not the less, hes always usit the ministry of men, alswell in preiching of thy word, and administratioun of thy sacraments, as in gyding of thy flock, and provyding for the puir within the same, as in the Law, Propheits, and in thy glorious Evangell we have witnesses: Quhilk ordour, O Lord, thow of thy mercie hes now restoired unto us agane efter that the publict face of the Kirk hes bene deformed by the tyrany of that Romane Antichrist. Grant unto us, O hevinly Father, hairts thankfull for the benefites quhilks we have receaved, and give unto these our brethrein, elected unto thir charges within thy Kirk, sick abundance of thy Holie Spirit, that they may be found vigilant and faythfull in that vocatioun, quharunto thow of thy mercy hes callit thame. And albeit, O Lord, these small begynings ar contemned of the proude world, yet, O Lord, do thow for thy awne mercies sake, bless the same in sick sorte that thy godlie name may be glorified, superstitioun and idolatry may be ruited out, and vertue may be planted, not onely in this generatioun, bot also in the posterity to cum. Amen. Grant us this, mercifull Father, for Christ Jesus thy Sones saik, in quhose name we call unto thee, as he hes taucht us, saying, Our Father, &c.
And so efter the rehersall of the beleif, efter the quhilk sall be sung this portioun of the 103 Psalme, ver. 19. The hevins hie ar maid the seat,[314] and so forth to the end of that Psalme. Efter the quhilk sall this schort Admonitioun be given to the elected:—
Magnifie God, quho hes of his mercy callit yow to ruill within his Kirk: Be thankfull in your vocatioun: Schaw yourselfis zealous to promote verity: Feir not the faces of the wicked, bot rebuik thair wickitnes: Be mercifull to the puir, and support thame to the uttermost of your power; and so sall ye receave the benedictioun of God, present and everlasting. God save the Kingis Majestie, and gif unto him the Spirit of sanctificatioun in his young age: Blesse his Regent, and sick as assist him in upricht counsaill, and eyther fruitfully convert, or suddanely confound the enemies of trew religioun, and of this afflicted Comoun-welthe. Amen.
As the servandis of God uprychtlie travellit to haif vice punissit and verteu plantit, so did the Devill ever steir up some in the contrair of baith. Thair was a law maid aganis fornicatouris and adulteraris,[315] that the ane and the uther suld be cartit throcht the townis, and so banissit, till that thair repentance wes offerit and receavit. And albeit this wes nott the severitie of Goddis law, especiallie aganis adulteraris, yet wes it a greit brydill to malefactouris; quhairat the wickit did wonderouslie storme. It chancit that ane Sandersoun, a fleschour, wes deprehendit to haif put away his lauchfull wyffe, (under cullour that he was lauchfullie partit efter the maner of the Papisticall religioun,) and haid takin to him ane uther in [his] housse. The complaynt and sclander proponit to the Kirk, and tryall takin that he wes nott maryit with the secund woman, nather that he wes able to prove that he wes devorcit by any ordour of law from the first, he wes committit in the handis of the Magistratis, quha, according to the lawis, commandit him to be cartit. Bot the raschall multitude, enflambit be some ungodlie craftismen, maid insurrectioun, brake the carte, boistit the officiaris, and tuke away the malefactour. This wes the begyning of farther evillis, as we will efter heir.
In the meantyme, quhill Lord James (we say) wes in France, thair came ane Ambassadour frome France,[316] subornit, na doubt, with all craft that mycht truble the Estait of the Religioun. His demandis wes 1. That the league betwix us and Ingland suld be broken: 2. That the ancient league betwix France and Scotland suld be renewit: And, 3. That the Bischops and Kirkmen suld be reponit in thair formair places, and be sufferit to intromet with thair levingis. The Counsall delayit answer to the Parliament appoyntit in May. In the meantyme the Papistis of Scotland practisit with him. The Erlis of Huntlie, Atholl, Bothwell, and utheris, intendit to haiff takin Edinburgh befoir the said Parliament. The haill Bischoppis assemblit, and held counsall in Striveling. Some quhispering thair wes, that the Duke and the Bischop of Sanctandrois were too familiare; and some feared that the auctoritie of the Quene suld haif bene usurpit, be ressone of her absence, and that the Duke wes secound persone, for thairat haid some of his preissit immediatlie efter the death of the King of France. The Protestantis thairof advertised, preventit thame, and came to Edinburgh. The Erle of Arrane stude constant with his brethrene. Thair war some that cairfullie and panefullie travellit that nathing prejudiciall to the Quenis auctoritie, suld be done in absence of the Lord James; to quhom the Quene hes recompensit evill for gude service. Maister James Makgill,[317] in that poynt did baith stoutlie and treulie; for Johne Knox and he war than fallin in familiaritie, in quhilk thay yet contineu, 20 Octobris 1567,[318] be ressone that the said Maister James haid embrasit the Religioun, and professit it publiclie.
The Papistis and Bischoppis, dissapoyntit of thair principall purpose and interpryse did yet mak broillie for trouble; for the raschall multitude war stirred up to mak a Robene Hude,[319] quhilk enormitie wes of mony yeiris left and dampnit by statute and act of Parliament. Yit wald thay nott be forbiddin, bot wald disobey and truble the Towne, especiallie upone the nycht. Quhairat the Baillies offendit, tuke fra thame some swerdis and an enseynze, quhilk wes occasioun that thay that same nycht maid a mutinye, keippit the portis of the towne, and intendit to have persewit some men within thair awin housses; bot that, upoun the restitutioun of thair swerdis and enseynze, wes stayit. Bot yit thay ceassit nott to molest, alsweill the inhabitantes of Edinburgh as diverse countrey men, taking frome thame money, and threitnyng some with farder injureis. Quhairwith the Magistratis of the towne, heychtlie offendit, tuke mair diligent heid to suche as resortit to the towne, and so apprehendit ane of the principall of that misordour, namit Gillone,[320] a cordinare, quhome thai put to ane assisse; [and being convicted, for he could not be absolved,][321] (for he wes the cheif man that spoillit Johnne Mowbray of ten crownis of the Sone,) thai thocht to have execute jugement upone him, and so erected a jebbete beneath the Croce. But, quhidder it came by pactioun with the Provest and some uther, or by instigatioun of the Craftismen, quha ever haif bene bent too muche to mayntene suche vanitie and ryotousnes, we fullie knaw nott, but suddandlie thair did ryse a tumult; the Tolbuyth wes brokin up, and not onlie the said Gillone, quho befoir wes dampnit, wes violentlie takin furth, bot also all uther malefactouris wer set at fredome; the jebbete wes pullit downe, and dispitfullie brokin; and thairefter, as the Provest and some of the Counsall assemblit to the Clerkis[322] chalmer for consultatioun, the haill rascall [multitude] bandit togidder, with some knawin unhonest[323] craftismen, and intendit invasioun of the said chalmer. Quhilk perceavit, the Provest, and such as wer in his cumpany, past to the Tolbuyth, suspecting nothing that thai wald haif bene sa enragit that thai wald mak new persute, efter that thai had obtenit thair intent: Bot thai wer suddandlie deceavit, for from the Castelhill thai come with violence, and with stanis, gunnis, and such uther weaponis as thei had, began to assault the said Tolbuyth, ran at the dure of it, quhilk that parte by stanis cast from above, and partlie by a pystoll schott by Robert Norwell, quhilk hurt ane Twedy, thai wer repulsit [fra the door]; bot yit ceassit not thai to cast and schute in at the wyndowis, threitnyng deith to all that war within. And in verray deid the malice of the craftismen, quho wer suspectit to be the occasioun of that tumult, bare na gude will to dyvers of thame that wes with the Provost.
The argumentis that the Craftis wer the caus of that uproire, besydis thair first misordour that thai haid usit befoir, in tackin Sandersoun from the exectioun of punishment, are twa. The formar, Archibald Dewar, Patrik Schange, with uther five deaconis [of the craftis] come to Johnne Knox, and willit him to solist the Provest and the towne to delay the executioun: quho did answer, "That he haid sa oft solistit in thair favouris, that his awin conscience accusit him, that thai usit his labouris for na uther end, bot to be a patrone to thair impietie." For he haid befoir maid intercessioun for William Harlaw, James Frissall, and utheris, that wer convict of the formare tumult. Thai proudlie said, "That gif it was not stayit, bayth he and the Baillies suld repent it." Quhairto he answerit, "He wald not hurt his conscience for ony feir of man." And sa thai departit; and the tumult (as said is) immediatlie thairefter did aryse. The secund argument is, the tumult continewit fra twa at efter none till efter aucht at nycht. The Craftismen wer requyrit to assemble them selfis togidder for deliverance of thair Provest [and Baillies]; bot thai past to thair foure houris penny, and in thair jesting said, "Thai will be Magistratis allone, latt thame reule the multitude allone." And sa, contrair to the ayth that thai haid maid, thai denyit thair assistance, counsall, and conforte to thair Provest and Baillies; quhilk ar argumentis verray probable, that the said tumult raise by thair procurement. The end heirof was, that the Provest[324] and Baillies wer compellit to gif thair handwrittis, that thai suld never perseu ony of thame that war of that tumult, for ony cryme that wes done in that behalf. And this wes proclamet at the Croce efter nyne houris at nycht; and sa that truble quyetted. Bot the Nobilitie avowit, that thai suld not spare it; and sa a greit nomber of that factioun war absent frome the towne, till the arryvall of the Quene. The haill multitude wer haldin excomunicat, and war admittit to no participatioun of the sacramentis, unto suche tyme as thai satisfied the Magistratis, and maid humble sute unto the Kirk.