Alle ding war schon zu bereyt
Za nechten[961] vmb die versperzeit. 20

Adam spricht.

Ir kinderlein ich sich den Herrn
Mit seinen Engeln kummen von Ferrn
Nun stelt euch in die ordnung fein
Vnd bald der Herre dritt herein
Neygt euch und bietet jm die hend
Schaw zu wie stelt sich an dem End
Der Kain vnd sein Galgen-rott
Sam wöllen sie fliehen vor Gott.

{30} Der Herr geet ein mit zweyen Engeln, geyd den segen vnd spricht.

Der Fried sey euch jr Kinderlein.

Adam hebt sein hend auff vnnd spricht.

O Himelischer Vater mein
Wir dancken in vnsrem gemüt
Das du vns Sunder durch dein güt
Heimsuchst in vnser angst vnd not.

Eua hebt jr hend auff vnd spricht.

Ach du trewer Vatter vnd Got.
Wie soll wirs verdienen vmb dich
Das du kumbst so demütigklich 10
Zu vns elenden an diss ort
Dieweil ich hab veracht dein wort
Vnd gefolgt der hellischen schlangen
Da ich die gröst sünd hab begangen
Wider dich, drumb wirt mein gewissn
Bekümmert, geengst vnd gebissn.

Der Herr spricht.

Mein Tochter sey zu frieden eben
Deine Sünde seind dir vergeben
Wann ich bin barmhertzig vnd gütig 20
Genedig, Trew vnd gar langmütig
Ein Vater der trostlosen armen
Ich wirt mich vber euch erbarmen
So ich euch send in meinem namen
Des verheissenen weibes samen
Der wirt von übel euch erlösen
Zertretten die hellischen bösen
Schlangen doch mitler zeit vnd fort
Solt jhr euch halten an mein wort
Mit eim festen vnd starcken glaubn 30
Vnd last euch des niemand beraubn
Das sol die weil ewer trost sein.

Adam spricht.

O himelischer vater mein
Des sey dir lob, danck, preiss vnd ehr
Jetzund ewig vnd jmmer mehr
Nun jhr kinder euch hieher macht
Mit reuerentz den Herrn entpfacht
Sich, Sich, wie sich der Kain stelt
Mit seiner rott so vngschickt helt
Vnd wend vnserm herr gott den rück
Wend euch und habt euch als[962] vnglück
Empfacht jn nach einander rumb.

Kain entpfecht den Herrn mit der lincken hand vnd spricht.

Herr nun biss mir wilkumb. 10

Eua spricht.

Ey reicht jr denn an diesem end
Vnserm hergott die lincken hend
Ziecht auch ewre hütlein nit ab
Wie ich euch vor geleret hab
Ir groben filtz[963] an zucht vnd ehr
Mein Abel kum zum Herren her
Sambt den ghorsamen brüdern dein
Entpfahet Gott den herrn fein.

{20} Abel beut dem Herrn sein hand sampt den frommen kindern vnnd spricht.

O Herr Got du himlischer vater
Ich danck dir du höchster Wolthater
Der du dich vnser so gnedigklich
Annembst wer kan vol loben dich.

Der Herr spricht.

Abel vnd diese fünffe sind
Gehorsam wolgezogne kind
Kumpt thüt neher zu mir her trettn 30
Saget mir her wie künd jhr bettn.