Miramur Phariis nutantia Pondera Saxis,
Et minùs Hospitibus firma Sepulchra suis.
Quod dare debuerant, Ævo Monumenta carerent,
Sæcula ni functis sumeret ipse Lapis.
Arguit elapsam, quâ Mumia duruit, Artem,
Orbatumq; dolet Matre superstes Opus.
At tua Niliaci referent Arcana Laboris
Scripta, nec ignotis jam fluet Amnis Aquis.
Arabiæ Fœlicis Opes, Miracula Memphis,
Isiacos Mores, Justa, Sepulchra, Faces,
Quicquid Arabs novit, Pharii docuere Sophistæ
Indicibus Chartis pandet amica Manus.
Pollinctura tibi reduces debebit Honores,
Arteq; Apollineâ Structa perennis erit.
Corpora quâ nobis servas, tibi nomen in Ævum
Servabis; quâ nos Fama manebit, ope.
Quid dissolvendum restat, Mors irrita? Servat
Corpora Greenhillus salva, Animasq; DEUS.