“ ‘Mes
bonnes gens, entendez tous ici.
Vous savez bien coment le roy banny
A, à grant tort, vostre seigneur Henry,
Et sans raison;
Et pource j’ay fait impetracion
Au saint père, qui est nostre patron,
Que trestous ceulx auront rémission
De leurs péchiez
De quoy oncques ilz furent entachiez,
De puis l’eure qu’ilz furent baptisiez,
Qui leur aideront tous certains en suez
Celle journée;
Et vesenci la bulle seellée,
Que le pappe de romme la louée
M’a envoié, et pour vous tous donnée,
Mes bons amis.
Vueilliez lui donc aidier ses ennemis
A conquerre, et vous en serez mis
Avecques ceux qui sont en paradis
Après la mort.’
Lors veissiez jeune, viel, feble, et fort
Murmure faire, et par commun accort,
Sans regarder ni le droit ni le tort,
Eulx émouvoir,
Cuidant que ce c’on leur fist assavoir
Feust vérité, tous le courent de voir;
Car de sens n’ont guères ne de savoir,
De telz y a.
L’arcevesque ce conseil cy trouva.”