El Ratton l'è andaa a provved el disnà. El gh'ha ditt al Rattin de scumà la carne; e el Rattin l' è borlaa dent in del caldar. Ven a cà el Ratton; el cerca el Rattin per tutta la cà e le troeuva no. Guarda in del caldar; el troeuva dent el Rattin mort. Allora, disperaa, el tra el caldar in mezz a la cà. La banca, la dis:—«Perchè t'hê traa el caldar in mezz a la cà?»—«Perchè el Rattin l' è mort; e mi hoo traa el caldar in mezz a la cà».—La banca, la dis:—«E mi saltaroo!»—E la s' è missa a salta. L' uss, el ghe dis a la banca:—«Perchè te saltet?»—«Perchè Rattin l' è mort; Ratton l' ha traa el caldar in mezz a la cà; e mi salti».—L' uss, el dis:—«E mi andaroo innanz e indrèe».—La scala, la dis:—Perchè te vee innanz e indrèe?»—«Perchè Rattin l' è mort; Ratton l' ha traa el caldar in mezz a la ca; banca salta; e mi voo innanz e indrèe».—La scala, la dis:—«E mi andaroo tutt a tocch».—La port, la dis:—«Perchè te set tutta a tocch?»—«Perchè Rattin l'è mort; Ratton l' ha traa el caldar in mezz a la cà; la banca salta; uss innanz e indree; e mi sont andada tutta a tocch.»—La porta, la dis:—«E mi andaroo giò de canchen!»—Gh' eva on carr de foeura de la porta; e el gh' ha ditt:—«Perchè te set giò de canchen?»—«Perchè Rattin l'è mort; Ratton l' ha traa el caldar in mezz a la cà; banca salta; uss innanz e indree; la scala tutt a tocch, porta scanchignada».—El carr, el dis:—«E mi andaroo senza i boeu».—Passa ona vipera e la dis:—«Perchè te vee senza i boeu?»—«Perchè Rattin l'è mort; Ratton l'ha traa el caldar in mezz a la cà; banca salta; uss innanz e indree; scala tutta a tocch; porta scanchignada; e mi voo senza i boeu».—La vipera, la dis:—«E mi me pelaroo».—La vipera, la passa d' on fontanin. El fontanin, el dis:—«Perchè te see pelada?»—«Perchè Rattin l' è mort; Ratton l' ha traa el caldar in mezz a la cà; banca salta; uss innanz e indree; scala tutt a tocch; porta scanchignada; el carr, el va senza i boeu; e mi sont pelada.»—El fontanin, el dis:—«Ben! e mi me sugaroo!»—Ven ona serva a cavà' l' acqua; e la ghe dis:—«Perchè te see sugàa, fontanin?»—«Perchè Rattin l' è mort; Ratton l'ha traa el caldar in mezz a la cà; banca salta; uss innanz e indree; scala tutta a tocch; porta scanchignada; el carr, el va senza i boeu; la vipera la s' è pelada, e mi me son sugaa».—E lee, la dis:—«Ben! e mi trarroo el sidell in mezz a la strada».—È vegnuu el padron; el ghe dis:—«Perchè t' hè traa el sidell in mezz a la strada?»—E lee, la ghe dis:—«Perchè Rattin l' è mort; Ratton l' ha traa el caldar in mezz a la cà; banca salta; uss innanz e indree; scala tutta a tocch; porta scanchignada; el carr, el va senza i boeu; la vipera, la s'è pelada; el fontanin s' è sugàa; e mi hoo traa el sidell in mezz a la strada».—E lu, el dis:—«E mi, che sont el padron, la faroo in di calzon».—