f. 140
Du double pois, dont se soubtile
A faire l’inconvenience
De fraude, dont son fait commence;
Car n’est espiece ne semence
Dont il son malvois gain ne pile:
De la balance point ne pense
Dont Micheux en la dieu presence
Luy poisera les faitz du guile.
Triche Espiecer du pecché gaigne,
Qant les colours vent et bargaigne 25610
Dont se blanchont les femelines,
Et la bealté, q’estoit foraine,
Du viele face q’est baraigne
Fait revenir des medicines,
Siq’elles pieront angelines:
Et d’autre part de ses falsines
Il fait que lecchour et putaine
A leur pecché sont plus enclinez,
Q’il lour fait boire les racines
Que plus excitent cel ovraigne. 25620
Plus que ne vient a ma resoun
Triche Espiecer deinz sa maisoun
Les gens deçoit; mais qant avera
Phisicien au compaignoun,
De tant sanz nul comparisoun
Plus a centfoitz deceivera:
L’un la receipte ordeinera
Et l’autre la componera,
Mais la value d’un botoun
Pour un florin vendu serra: 25630
Einsi l’espiecer soufflera
Sa guile en nostre chaperoun.
Phisicien de son affaire
En les Cités u q’il repaire
Toutdis se trait a l’aquointance
De l’espiecer ipotecaire;
Et lors font tiele chose faire
Dont mainte vie ert en balance:
Car cil qui de leur ordinance
User voldra d’acoustummance 25640
Le cirimp et le lettuaire,
Trop puet languir en esperance
D’amendement, car tiele usance
Est a nature trop contraire.
Phisique et Triche l’Espiecer
Bien se scievont entracorder;
Car l’un ton ventre vuidera
Asses plus que ne fuist mestier,
Et l’autre savra bien vuider
Ta bource, qu’il dissolvera: 25650
Si l’estomac te poisera,
L’un dist qu’il t’en alleggera
Et toldra le superfluer,
Et si te superfluera
La bource, bien l’espourgera
L’ipotecaire en son mestier.
Meillour estomac ne querroie,
Si je phisique suieroie,
Que je n’en scieusse bien honir,
Ne jammais jour souhaideroie 25660
Plus riche bource que fuist moie,627
Q’ipotecaire enpoverir
Ne scieust; car quique doit languir,
Voir ou tout perdre ou tout morir,
Triche Espiecer ascune voie
N’en chalt, maisq’il puet avenir
Au fraude, que luy fait venir
A la richesce de monoie.
O qui savroit au point descrire
Phisicien qant il escrire 25670
Fait la cedule au medicine,
Comment ove l’espicier conspire,
Il duist bien par resoun despire
De l’un et l’autre la covine:
Car maintefois de leur falsine
Cil q’est malade a la poitrine
Un tiel cirimp luy font confire
Q’auci luy fait doloir l’eschine,
Pour plus gaigner en long termine
De luy qui sa santé desire. 25680
Pour plus parler du tricherie,
En le mestier du pelterie
Triche est auci trop bien apris:
Le vein orguil de ceste vie
Que gist en la burgoiserie
Des femmes que trop sont cheris,
Et de les autres du paiis,
De leur Ermyne et de leur gris,
Dont la fourrure ont acuillie,
Fait ce que Triche est enrichiz; 25690
Mais s’ils portassent le berbis,
Triche eust sa proie trop faillie.
Sicomme ma dame la Contesse,
Solonc q’affiert a sa noblesse,
Se fait furrer de la pellure,
Ensi la vaine Escuieresse,
Voir et la sote presteresse,
Portont d’ermine la furrure:
C’est une cause au present hure628
Que de l’argent poi nous demure, 25700
Dont soloions avoir largesse;
Si l’en n’en preigne bonne cure,
Puet avenir par aventure,
Ainz q’om le sache, grant destresse.
Triche est de son mal gain trop lée,
Qant il la pane en long et lée
De la furrure fait tirer;
Dont qant le mantell ad furrée,
Et soit des quatre jours usée,
Lors voit om bien que le furrer 25710
Est plus eschar que le draper;
Mais ce que chalt, quant le denier
Au Triche serra bien paié:
Et molt sovent de son mestier
Viel pour novel nous fait bailler;
Ce n’est pas droit ne loyauté.
Si plus de Triche oïr voldras,
Triche en tailler auci des draps
Est trop soubtil et trop sachant;
Pour conscience ne laist pas 25720
Q’il ou par reule ou par compas
Du drap q’il te serra taillant
Ne prent le toll, et si faillant
Soit de son taille et nonvaillant
Soit le façoun, tu paieras
Molt plus que resoun nepourqant:
Car Triche, quiq’en soit perdant,
Du malvois gain fait son pourchas.
Ascune fois Triche est Seller,
De ce se plaignt qui chivalcher 25730
D’acoustumance doit sovent;
Ascune fois est Sabbatier,
De ce luy povre labourer
Se plaignt par tout communement:
Des tous mestiers que l’en aprent
Triche est apris et son gain prent,
Et d’autre part en marchander
Il sciet le droit experiment,
Du quoy, a qui, qant et comment
Il doit son fait faire et lesser. 25740
Sicome la viele q’est puteine
Ses jofnes files entre et meine
Au fait, je voi que Triche ensi
Ses apprentis primer enseigne
L’engin, les fraudes et la treine
De marchander et vendre auci.
Mais de la vente dont vous dy
Au double ou treble ert encheri
Plus que ne valt; pour ce se peine629
Son dieu et tous les nouns de luy 25750
Jurer, tanq’il porra l’autry
Guiler de sa parole veine.
Ensi ly jofnes apprentis,
Q’est de son mestre Triche apris,
Les autres triche en son vendant:
Ce que luy couste ou cink ou sis
Il te mettra a dousze ou dis,
Si jure et dist q’il meinz de tant
N’el puet donner, s’il trop perdant
N’en soit; ensi te meine avant, 25760
Tanq’il t’avera tant abaubis
Qe tu luy soies bien creant:
Ensi deçoit cil jofne enfant
Tout les plus viels de les paiis.630
Mais combien que l’apprentis jure,
Ly mestres qui le mal conjure
Ove l’apprentis primerement
Avra le peché par droiture;
Car son estat est au dessure,
Et il auci le gaign en prent,631 25770
Dont c’est au droit convenient
Q’il ait les charges ensement
De ce dont il les faitz procure:
Car l’autre est son obedient,
Son apprentis et son client,
Soubz sa doctrine et soubz sa cure.
Mais nepourqant l’en puet entendre,
Si soul ly mestre volroit vendre
Et mesmes tricher son voisin,
Meinz mal serroit, car lors extendre
Tantsoulement duist et descendre 25781
Sur soy le mal de son engin:
Mais qant le jofne marchandin
Falt estre a sa malice enclin,
Du guile et sa manere aprendre,
Pis est; car ambedeux au fin
Pecchent, mais solonc le divin
L’un plus que l’autre est a reprendre.
Q’est ce que je vous dirray plus,
Mais que le siecle est trop confus632 25790
Des tieus marchantz especial?
Q’entr’eulx ont loyalté refus,
f. 141
Si ont le triche retenuz:
De luy ont fait lour governal,
Et de Soubtil le desloial
Ont fait lour sergant communal,
Qui vent les choses a lour us:
Ja Bonne foy deinz leur hostall
Ne puet entrer apprentisal,
Car Guile le reboute al huiss. 25800
Mais sanz deceipte et sanz envie
El temps du viele ancesserie
Lors il fesoient bonnement,
Chascuns endroit de sa partie;
Loyal furont sanz tricherie
Leur vente et leur acatement.
Mais ore il est tout autrement,
Si cist dist voir, cil autre ment,
Poy sont du bonne compaignie:
Pour ce l’en voit q’au jour present 25810
Trestout vait au declinement,
Le mestier et la marchandie.
Jadis qant les marchantz parloiont
De vingt et Cent, lors habondoiont
De richesce et de soufficance,
Lors de lour propres biens vivoiont,
Et loyalment se contenoiont
Sanz faire a nully decevance:
Mais ils font ore lour parlance
De mainte Mill; et sanz doubtance 25820
Des tieus y ad que s’il paioiont
Leur debtes, lors sanz chevisance
Ils n’ont quoy propre a la montance
D’un florin, dont paier porroiont.
En leur hostealx qui vient entrer
Leur sales verra tapicer
Et pour l’ivern et pour l’estée,
Et leur chambres encourtiner,
Et sur leur tables veseller,
Comme fuissent Duc de la Cité. 25830
Mais en la fin qant sont alé
De ceste vie et avalé
Bass en la terre, lors crier
Om puet oïr la niceté
De leur orguil, que povreté
Leur debtes covient excuser.
Si tu soies du Triche aqueinte,
Il te dirra parole queinte,
C’est que ton orr luy baillerez;
Il te ferra la forte enpeinte 25840
Du covoitise qu’il ad peinte,
Et dirra que tu gaignerez.
Mais je t’en loo par ameistez,
Q’ensi par consail t’avisez
Dont n’eietz cause de compleignte;
Car Cent au tiel bailler porretz,633
Qe trente jammais reverretz
Ne par amour ne par constreinte.
L’en voit ascuns de tiele enprise
Qui par deceipte et par queintise 25850
Al oill passont tout lour voisin;
Mais ce n’est pas honeste guise,
Qant puis s’en fuiont au franchise634
De saint Piere ou de saint Martin,
Q’attendre n’osent en la fin
Deinz la Cité, mais au chemin
Se mettont vers la sainte eglise.
Maldit soient tiel pelerin,
Q’ensi vienont au lieu divin
Pour faire au deable sacrefise. 25860
Car tiel y ad qui tout du gré
Aprompte sanz necessité,
Et puis s’en vait ove tout fuïr635
Au sainte eglise en salveté.
Mais ore oietz la falseté,
Q’il ne se voet de la partir,
Ainz quiert de l’autry bien partir,
Tanq’il pardoun porra tenir
Du tierce part ou la moytée;
Et lors se ferra revertir 25870
A son hostell tout par loisir,
Et dist que tout est bien alé.
L’en dist poverte est chose dure,
Ce sciet qui la poverte endure,
En part poverte excuse errour;
Mais cil q’est riche a demesure
Et fait enqore mesprisure
Ne puet excuser sa folour.
Mais comme l’en dist au present jour,
Le riche est ore tricheour, 25880
Plus que le povere en sa mesure;636
Car Triche n’ad de dieu paour,
Et d’autre part ne porte amour
Envers nulle autre creature.
Roy Salomon ce nous ensense,
Qui molt fuist plain de sapience,
Et dist, ‘Qui sa richesce adquiert
Sanz soy blemir en conscience
Molt fait honeste providence’:
Mais d’autre voie qui la quiert, 25890
En ceste vie luy surquiert
Vengance, s’au dieu ne requiert
Pardoun et face penitence,
Ou autrement sa paine affiert
Apres la mort, qant dieus le fiert,
Et l’alme en paie la despense.637
En l’evangile truis escrit,
Dieus nous demande quel profit
Homme ad pour tout le mond gainer,
Qant il en pert son espirit:638 25900
C’est un eschange mal confit
Pour chose que ne puet durer.
Mais Triche ainçois en marchander
Quiert le proufit de son denier,
Qe tout le bien q’est infinit;
Quique luy doit desallouer,
Il prent du siecle son louer,
Mais au final ne s’esjoÿt.
Ne sai pour quoy je precheroie
As tieux marchans del autre joye 25910
Ou autrement de la dolour;
Car bien scievont, qui multiploie
En ceste vie de monoie
Il ad au meinz du corps l’onour:
Dont un me disoit l’autre jour,
Cil qui puet tenir la doulçour
De ceste vie et la desvoie,
A son avis ferroit folour,
Q’apres ce nuls sciet la verrour,
Queu part aler ne quelle voie. 25920
Ensi desputont, ensi diont,
Ensi communement reppliont
Ly marchant q’ore sont present;
Pour bien du siecle, a quel se pliont,
Le bien del alme tout oubliont,
Du quel ils sont trop indigent:
Et nepourqant qui les reprent,
Tout lour estat par argument
Du marchandie justefiont;
Al oill respondent sagement, 25930
Mais de si faint excusement
Lour almes point ne glorifiont.
Soubtilement sciet Triche usure
Covrir et faire la vesture,
Siq’en apert ne soit conue;
Mais s’il sa conscience assure,
Fols est, car dieus la voit dessure
Trestoute overte et toute nue;
Par quoy si Triche ne se mue
De sa falsine et s’esvertue 25940
De loyauté, verra celle hure,
Qant dieus les faitz de tous argue,
Sa fraude serra desvestue,
Dont deble avra la forsfaiture.
Des marchans ore luy alqant
Le siecle blament nepourqant,
Et l’un et l’autre en sa partie
Vait mainte cause enchesonant:
L’un dist arere et l’autre avant,
Mais riens parlont du tricherie 25950
Q’ils mesmes font en marchandie;
Ainz chascun d’eulx se justefie
Et blamont tout le remenant:
Dont m’est avis que la folie
De jour en jour se multeplie
Sanz amender ne tant ne qant.
Ils sont marchans, ils sont mestiers,
Des queux nous avons grans mestiers,
S’ils bien gardassent loyalté;
Mais Triche est un des parçoniers 25960
Qui tant covoite les deniers
Qu’il point n’ad garde d’equité.
N’est un mestier d’ascun degré
Dont Triche, si luy vient a gré,
N’ait vingt et quatre soldoiers,
Qui le bienfaire ont refusé,
Et ce nous trouble en la Cité
Les burgois et les officiers.
Meistre Aristole ce nous dist,
Qe les mestiers sont infinit, 25970
Nuls puet nombrer la variance:
Pour ce ne suy je pas parfit
Qe tous les mette en mon escrit
D’especiale remembrance.
Mais chascune art en sa substance,
De ce que donne sustienance
A luy qui de son mestier vit,
Est bonne en bonne governance:
Si nuls la mette en male usance,
Pour ce n’est pas l’art inparfit. 25980

Puisq’il ad dit del errour de ceaux qui trichent en marchandie et en l’estat des Artifices, dirra ore del errour des Vitaillers.

f. 142
L’estat del homme ensi se taille,
Qe sur tout falt avoir vitaille,639
Dont l’en porra boire et manger:
Pour ce n’est mie de mervaille,
Si je n’oublie ne tressaille
A parler et a reconter
De ceaux qui sont dit vitailler;
Car Triche y est pour consailler,
Q’au fraude chascuns s’apparaille:
Je prens tesmoign du Taverner, 25990
N’est pas sanz guile le celier
Q’il tient dessoubz sa governaille.
Du Taverner fai mon appell,
Qant il le vin del an novell
Ove l’autre viel del an devant,
Qui gist corrupt deinz son tonell
Et n’est ne sein ne bon ne bell,
De sa falsine vait mellant,
Et ensi le vait tavernant:
Mais qui luy fuist au droit rendant,
La goule par le haterell 26001
As fourches ly serroit pendant,
Car il occit maint entendant
Au boire de si fals revell.
Trop est malvoise la mellée,
Qant le vin est ensi mellé,
Dont cil qui boit ne puet faillir
De deux mals dont serra grevé:
L’un est qant il avra paié
Ce dont nul bien luy puet venir, 26010
Et l’autre que luy fra languir
Et grande enfermeté souffrir,
Et molt sovent l’enfermeté
Le meine jusques a morir.
Qui voet taverne ensi tenir
N’est pas exempt du falseté.
Qant Must vendra primerement,
Molt le vent Triche chierement,
Mais lors sa fraude renovelle:
Comme cil qui fait trop queintement,
Tout en secré l’aqueintement 26021
Ferra du viele et de novelle
Et l’un ove l’autre Must appelle;
Sovent entrouble sa tonelle,
Si fait crier Must a la gent,
N’en chalt a qui dolt la cervelle,
Maisqu’il sa falseté concelle,
Dont porra gaigner de l’argent.