[The Prudence of the Serpent.]
Hic narrat Confessor exemplum, vt non ab auris exaudicione fatua animus deceptus inuoluatur. Et dicit qualiter ille serpens, qui aspis282 vocatur, quendam preciosissimum lapidem nomine Carbunculum in sue frontis medio gestans, contra verba incantantis aurem vnam terre affigendo premit, et aliam sue caude stimulo firmissime283 obturat.
A Serpent, which that Aspidis
Is cleped, of his kynde hath this,
That he the Ston noblest of alle,
The which that men Carbuncle calle,
Berth in his hed above on heihte.
For which whan that a man be sleyhte,
The Ston to winne and him to daunte,
With his carecte him wolde enchaunte, 470
Anon as he perceiveth that,
He leith doun his on Ere al plat
Unto the ground, and halt it faste,
And ek that other Ere als faste
P. i. 58
He stoppeth with his tail so sore,
That he the wordes lasse or more
Of his enchantement ne hiereth;
And in this wise himself he skiereth,
So that he hath the wordes weyved
And thurgh his Ere is noght deceived. 480
[Tale of the Sirens.]
Aliud exemplum super eodem, qualiter rex Vluxes cum a bello Troiano versus Greciam nauigio remearet, et prope illa Monstra marina, Sirenes nuncupata, angelica voce canoras, ipsum ventorum aduersitate nauigare oporteret, omnium nautarum suorum aures obturari coegit. Et sic salutari prouidencia prefultus absque periculo saluus cum sua classe Vluxes pertransiuit.
An othre thing, who that recordeth,284
Lich unto this ensample acordeth,
Which in the tale of Troie I finde.
Sirenes of a wonder kynde
Ben Monstres, as the bokes tellen,
And in the grete Se thei duellen:
Of body bothe and of visage
Lik unto wommen of yong age285
Up fro the Navele on hih thei be,
And doun benethe, as men mai se, 490
Thei bere of fisshes the figure.286
And overthis of such nature
Thei ben, that with so swete a stevene
Lik to the melodie of hevene
In wommanysshe vois thei singe,
With notes of so gret likinge,
Of such mesure, of such musike,
Wherof the Schipes thei beswike
That passen be the costes there.
For whan the Schipmen leie an Ere 500
Unto the vois, in here avys
Thei wene it be a Paradys,
Which after is to hem an helle.
For reson may noght with hem duelle,
P. i. 59
Whan thei tho grete lustes hiere;287
Thei conne noght here Schipes stiere,
So besiliche upon the note
Thei herkne, and in such wise assote,
That thei here rihte cours and weie
Foryete, and to here Ere obeie, 510
And seilen til it so befalle
That thei into the peril falle,
Where as the Schipes be todrawe,
And thei ben with the Monstres slawe.
Bot fro this peril natheles
With his wisdom king Uluxes
Ascapeth and it overpasseth;
For he tofor the hond compasseth
That noman of his compaignie
Hath pouer unto that folie 520
His Ere for no lust to caste;
For he hem stoppede alle faste,288
That non of hem mai hiere hem singe.
So whan they comen forth seilinge,
Ther was such governance on honde,
That thei the Monstres have withstonde
And slain of hem a gret partie.
Thus was he sauf with his navie,
This wise king, thurgh governance.
Confessor.
[The Sins of the Eye and the Ear.]
Wherof, my Sone, in remembrance 530
Thou myht ensample taken hiere,289
As I have told, and what thou hiere
Be wel war, and yif no credence,
Bot if thou se more evidence.
P. i. 60
For if thou woldest take kepe
And wisly cowthest warde and kepe
Thin yhe and Ere, as I have spoke,
Than haddest thou the gates stoke
Fro such Sotie as comth to winne
Thin hertes wit, which is withinne, 540
Wherof that now thi love excedeth
Mesure, and many a peine bredeth.
Bot if thou cowthest sette in reule
Tho tuo, the thre were eth to reule:
Forthi as of thi wittes five
I wole as now nomore schryve,
Bot only of these ilke tuo.
Tell me therfore if it be so,
Hast thou thin yhen oght misthrowe?290
Amans.
Mi fader, ye, I am beknowe, 550
I have hem cast upon Meduse,
Therof I may me noght excuse:
Min herte is growen into Ston,
So that my lady therupon
Hath such a priente of love grave,
That I can noght miselve save.
Opponit Confessor.What seist thou, Sone, as of thin Ere?
Respondet Amans.Mi fader, I am gultyf there;
For whanne I may my lady hiere,
Mi wit with that hath lost his Stiere: 560
I do noght as Uluxes dede,
Bot falle anon upon the stede,
Wher as I se my lady stonde;
And there, I do yow understonde,
P. i. 61
I am topulled in my thoght,
So that of reson leveth noght,
Wherof that I me mai defende.
Confessor.
My goode Sone, god thamende:
For as me thenketh be thi speche
Thi wittes ben riht feer to seche. 570
As of thin Ere and of thin yhe
I woll nomore specefie,
Bot I woll axen overthis
Of othre thing how that it is.
[The Seven deadly Sins. Pride.]
v. Celsior est Aquila que Leone ferocior ille,291
Quem tumor elati cordis ad alta mouet.
Sunt species quinque, quibus esse Superbia ductrix
Clamat, et in multis mundus adheret eis.
Laruando faciem ficto pallore subornat
Fraudibus Ypocrisis mellea verba suis.
Sicque pios animos quamsepe ruit muliebres
Ex humili verbo sub latitante dolo.292
Hic loquitur quod septem sunt peccata mortalia, quorum caput Superbia varias species habet, et earum prima Ypocrisis dicitur, cuius proprietatem secundum vicium simpliciter Confessor Amanti declarat.293
Mi Sone, as I thee schal enforme,
Ther ben yet of an other forme
Of dedly vices sevene applied,
Wherof the herte is ofte plied
To thing which after schal him grieve.
The ferste of hem thou schalt believe294 580
Is Pride, which is principal,
And hath with him in special
Ministres five ful diverse,
Of whiche, as I the schal reherse,295
[Five Ministers of Pride.
i. Hypocrisy.]
The ferste is seid Ypocrisie.
If thou art of his compaignie,
Tell forth, my Sone, and schrif the clene.
Amans.
I wot noght, fader, what ye mene:
P. i. 62
Bot this I wolde you beseche,
That ye me be som weie teche 590
What is to ben an ypocrite;
And thanne if I be forto wyte,
I wol beknowen, as it is.296
Confessor.
Mi Sone, an ypocrite is this,—
A man which feigneth conscience,
As thogh it were al innocence,
Withoute, and is noght so withinne;
And doth so for he wolde winne
Of his desir the vein astat.
And whanne he comth anon therat, 600
He scheweth thanne what he was,
The corn is torned into gras,
That was a Rose is thanne a thorn,
And he that was a Lomb beforn297
Is thanne a Wolf, and thus malice
Under the colour of justice
Is hid; and as the poeple telleth,
Ipocrisis Religiosa.298
These ordres witen where he duelleth,
As he that of here conseil is,
And thilke world which thei er this299 610
Forsoken, he drawth in ayein:
He clotheth richesse, as men sein,
Under the simplesce of poverte,
And doth to seme of gret decerte
Thing which is litel worth withinne:
He seith in open, fy! to Sinne,
And in secre ther is no vice
Of which that he nis a Norrice:
P. i. 63
And evere his chiere is sobre and softe,
And where he goth he blesseth ofte, 620
Wherof the blinde world he dreccheth.
Bot yet al only he ne streccheth
His reule upon religioun,
Bot next to that condicioun
In suche as clepe hem holy cherche
Ipocrisis ecclesiastica.300
It scheweth ek how he can werche301
Among tho wyde furred hodes,302
To geten hem the worldes goodes.
And thei hemself ben thilke same
That setten most the world in blame,303 630
Bot yet in contraire of her lore
Ther is nothing thei loven more;
So that semende of liht thei werke
The dedes whiche are inward derke.
And thus this double Ypocrisie
With his devolte apparantie
A viser set upon his face,
Wherof toward this worldes grace
He semeth to be riht wel thewed,
And yit his herte is al beschrewed. 640
Bot natheles he stant believed,
And hath his pourpos ofte achieved
Of worschipe and of worldes welthe,
And takth it, as who seith, be stelthe
Thurgh coverture of his fallas.
And riht so in semblable cas
This vice hath ek his officers
Ipocrisis secularis.
Among these othre seculers
P. i. 64
Of grete men, for of the smale
As for tacompte he set no tale, 650
Bot thei that passen the comune
With suche him liketh to comune,
And where he seith he wol socoure
The poeple, there he woll devoure;
For now aday is manyon
Which spekth of Peter and of John304
And thenketh Judas in his herte.
Ther schal no worldes good asterte
His hond, and yit he yifth almesse
And fasteth ofte and hiereth Messe: 660
With mea culpa, which he seith,
Upon his brest fullofte he leith
His hond, and cast upward his yhe,
As thogh he Cristes face syhe;
So that it seemeth ate syhte,
As he al one alle othre myhte
Rescoue with his holy bede.
Bot yet his herte in other stede
Among hise bedes most devoute
Goth in the worldes cause aboute, 670
How that he myhte his warisoun
Encresce.
[Hypocrisy of Lovers.]
305Hic tractat Confessor cum Amante super illa presertim Ipocrisia, que sub amoris facie fraudulenter latitando mulieres ipsius ficticiis credulas sepissime decipit innocentes.
And in comparisoun
Ther ben lovers of such a sort,
That feignen hem an humble port,
And al is bot Ypocrisie,
Which with deceipte and flaterie
Hath many a worthi wif beguiled.
For whanne he hath his tunge affiled,
P. i. 65
With softe speche and with lesinge,
Forth with his fals pitous lokynge, 680
He wolde make a womman wene
To gon upon the faire grene,
Whan that sche falleth in the Mir.
For if he may have his desir,
How so falle of the remenant,
He halt no word of covenant;
Bot er the time that he spede,
Ther is no sleihte at thilke nede,
Which eny loves faitour mai,
That he ne put it in assai, 690
As him belongeth forto done.
The colour of the reyni Mone
With medicine upon his face
He set, and thanne he axeth grace,
As he which hath sieknesse feigned.
Whan his visage is so desteigned,
With yhe upcast on hire he siketh,
And many a contenance he piketh,
To bringen hire in to believe
Of thing which that he wolde achieve, 700
Wherof he berth the pale hewe;
And for he wolde seme trewe,
He makth him siek, whan he is heil.
Bot whanne he berth lowest the Seil,306
Thanne is he swiftest to beguile
The womman, which that ilke while
Set upon him feith or credence.
Opponit Confessor.
Mi Sone, if thou thi conscience
P. i. 66
Entamed hast in such a wise,
In schrifte thou thee myht avise 710
And telle it me, if it be so.
Respondet Amans.
Min holy fader, certes no.
As forto feigne such sieknesse
It nedeth noght, for this witnesse
I take of god, that my corage
Hath ben mor siek than my visage.
And ek this mai I wel avowe,
So lowe cowthe I nevere bowe
To feigne humilite withoute,
That me ne leste betre loute 720
With alle the thoghtes of myn herte;
For that thing schal me nevere asterte,
I speke as to my lady diere,307
To make hire eny feigned chiere.
God wot wel there I lye noght,
Mi chiere hath be such as my thoght;
For in good feith, this lieveth wel,
Mi will was betre a thousendel
Than eny chiere that I cowthe.
Bot, Sire, if I have in my yowthe 730
Don other wise in other place,
I put me therof in your grace:308
For this excusen I ne schal,
That I have elles overal
To love and to his compaignie
Be plein withoute Ypocrisie;
Bot ther is on the which I serve,
Althogh I may no thonk deserve,
P. i. 67
To whom yet nevere into this day
I seide onlyche or ye or nay, 740
Bot if it so were in my thoght.
As touchende othre seie I noght
That I nam somdel forto wyte
Of that ye clepe an ypocrite.
Confessor.
Mi Sone, it sit wel every wiht
To kepe his word in trowthe upryht
Towardes love in alle wise.
For who that wolde him wel avise
What hath befalle in this matiere,
He scholde noght with feigned chiere 750
Deceive Love in no degre.
To love is every herte fre,
Bot in deceipte if that thou feignest
And therupon thi lust atteignest,
That thow hast wonne with thi wyle,
Thogh it thee like for a whyle,309
Thou schalt it afterward repente.
And forto prove myn entente,
I finde ensample in a Croniqe
Of hem that love so beswike. 760
[Tale of Mundus and Paulina.]
Quod Ipocrisia sit in amore periculosa, narrat exemplum qualiter sub regno Tiberii Imperatoris quidam miles nomine Mundus, qui Romanorum dux milicie tunc prefuit, dominam Paulinam pulcherrimam castitatisque famosissimam mediantibus duobus falsis presbiteris in templo Ysis deum se esse fingens310 sub ficte sanctitatis ypocrisi nocturno tempore viciauit. Vnde idem dux in exilium, presbiteri in mortem ob sui criminis enormitatem dampnati extiterant, ymagoque dee Ysis a templo euulsa vniuerso conclamante populo in flumen Tiberiadis proiecta mergebatur.
It fell be olde daies thus,
Whil themperour Tiberius
The Monarchie of Rome ladde,
Ther was a worthi Romein hadde
A wif, and sche Pauline hihte,
Which was to every mannes sihte
Of al the Cite the faireste,
And as men seiden, ek the beste.
P. i. 68
It is and hath ben evere yit,
That so strong is no mannes wit, 770
Which thurgh beaute ne mai be drawe
To love, and stonde under the lawe
Of thilke bore frele kinde,
Which makth the hertes yhen blinde,
Wher no reson mai be comuned:311
And in this wise stod fortuned312
This tale, of which I wolde mene;
This wif, which in hire lustes grene
Was fair and freissh and tendre of age,
Sche may noght lette the corage 780
Of him that wole on hire assote.
Ther was a Duck, and he was hote313
Mundus, which hadde in his baillie
To lede the chivalerie
Of Rome, and was a worthi knyht;
Bot yet he was noght of such myht
The strengthe of love to withstonde,
That he ne was so broght to honde,
That malgre wher he wole or no,
This yonge wif he loveth so, 790
That he hath put al his assay
To wynne thing which he ne may
Gete of hire graunt in no manere,
Be yifte of gold ne be preiere.
And whanne he syh that be no mede
Toward hir love he myhte spede,
Be sleyhte feigned thanne he wroghte;
And therupon he him bethoghte
P. i. 69
How that ther was in the Cite
A temple of such auctorite, 800
To which with gret Devocioun
The noble wommen of the toun
Most comunliche a pelrinage
Gon forto preie thilke ymage
Which the godesse of childinge is,
And cleped was be name Ysis:
And in hire temple thanne were,
To reule and to ministre there
After the lawe which was tho,
Above alle othre Prestes tuo. 810
This Duck, which thoghte his love gete,
Upon a day hem tuo to mete
Hath bede, and thei come at his heste;
Wher that thei hadde a riche feste,
And after mete in prive place
This lord, which wolde his thonk pourchace,
To ech of hem yaf thanne a yifte,
And spak so that be weie of schrifte
He drowh hem unto his covine,
To helpe and schape how he Pauline314 820
After his lust deceive myhte.
And thei here trowthes bothe plyhte,
That thei be nyhte hire scholden wynne
Into the temple, and he therinne
Schal have of hire al his entente:
And thus acorded forth thei wente.
Now lest thurgh which ypocrisie
Ordeigned was the tricherie,
P. i. 70
Wherof this ladi was deceived.
These Prestes hadden wel conceived 830
That sche was of gret holinesse;
And with a contrefet simplesse,
Which hid was in a fals corage,
Feignende an hevenely message315
Thei come and seide unto hir thus:
‘Pauline, the god Anubus
Hath sent ous bothe Prestes hiere,316
And seith he woll to thee appiere
Be nyhtes time himself alone,
For love he hath to thi persone: 840
And therupon he hath ous bede,
That we in Ysis temple a stede
Honestely for thee pourveie,
Wher thou be nyhte, as we thee seie,
Of him schalt take avisioun.
For upon thi condicioun,
The which is chaste and ful of feith,
Such pris, as he ous tolde, he leith,
That he wol stonde of thin acord;
And forto bere hierof record 850
He sende ous hider bothe tuo.’
Glad was hire innocence tho
Of suche wordes as sche herde,
With humble chiere and thus answerde,
And seide that the goddes wille
Sche was al redy to fulfille,
That be hire housebondes leve
Sche wolde in Ysis temple at eve
P. i. 71
Upon hire goddes grace abide,
To serven him the nyhtes tide. 860
The Prestes tho gon hom ayein,
And sche goth to hire sovereign,
Of goddes wille and as it was
Sche tolde him al the pleine cas,
Wherof he was deceived eke,
And bad that sche hire scholde meke
Al hol unto the goddes heste.
And thus sche, which was al honeste
To godward after hire entente,
At nyht unto the temple wente, 870
Wher that the false Prestes were;
And thei receiven hire there
With such a tokne of holinesse,
As thogh thei syhen a godesse,
And al withinne in prive place
A softe bedd of large space317
Thei hadde mad and encourtined,
Wher sche was afterward engined.
Bot sche, which al honour supposeth,
The false Prestes thanne opposeth, 880
And axeth be what observance
Sche myhte most to the plesance
Of godd that nyhtes reule kepe:
And thei hire bidden forto slepe318
Liggende upon the bedd alofte,
For so, thei seide, al stille and softe319
God Anubus hire wolde awake.
The conseil in this wise take,
P. i. 72
The Prestes fro this lady gon;
And sche, that wiste of guile non, 890
In the manere as it was seid
To slepe upon the bedd is leid,
In hope that sche scholde achieve320
Thing which stod thanne upon bilieve,
Fulfild of alle holinesse.
Bot sche hath failed, as I gesse,321
For in a closet faste by
The Duck was hid so prively
That sche him myhte noght perceive;
And he, that thoghte to deceive, 900
Hath such arrai upon him nome,
That whanne he wolde unto hir come,
It scholde semen at hire yhe322
As thogh sche verrailiche syhe
God Anubus, and in such wise
This ypocrite of his queintise
Awaiteth evere til sche slepte.
And thanne out of his place he crepte
So stille that sche nothing herde,
And to the bedd stalkende he ferde, 910
And sodeinly, er sche it wiste,
Beclipt in armes he hire kiste:
Wherof in wommanysshe drede
Sche wok and nyste what to rede;
Bot he with softe wordes milde
Conforteth hire and seith, with childe
He wolde hire make in such a kynde
That al the world schal have in mynde
P. i. 73
The worschipe of that ilke Sone;
For he schal with the goddes wone, 920
And ben himself a godd also.
With suche wordes and with mo,
The whiche he feigneth in his speche,
This lady wit was al to seche,323
As sche which alle trowthe weneth:
Bot he, that alle untrowthe meneth,
With blinde tales so hire ladde,
That all his wille of hire he hadde.
And whan him thoghte it was ynowh,
Ayein the day he him withdrowh 930
So prively that sche ne wiste
Wher he becom, bot as him liste
Out of the temple he goth his weie.
And sche began to bidde and preie
Upon the bare ground knelende,
And after that made hire offrende,
And to the Prestes yiftes grete
Sche yaf, and homward be the Strete.
The Duck hire mette and seide thus:
‘The myhti godd which Anubus 940
Is hote, he save the, Pauline,
For thou art of his discipline
So holy, that no mannes myht
Mai do that he hath do to nyht
Of thing which thou hast evere eschuied.
Bot I his grace have so poursuied,
That I was mad his lieutenant:
Forthi be weie of covenant
P. i. 74
Fro this day forth I am al thin,
And if thee like to be myn, 950
That stant upon thin oghne wille.’
Sche herde his tale and bar it stille,
And hom sche wente, as it befell,
Into hir chambre, and ther sche fell
Upon hire bedd to wepe and crie,
And seide: ‘O derke ypocrisie,
Thurgh whos dissimilacion
Of fals ymaginacion
I am thus wickedly deceived!
Bot that I have it aperceived 960
I thonke unto the goddes alle;
For thogh it ones be befalle,
It schal nevere eft whil that I live,
And thilke avou to godd I yive.’
And thus wepende sche compleigneth,
Hire faire face and al desteigneth
With wofull teres of hire ÿe,
So that upon this agonie
Hire housebonde is inne come,
And syh how sche was overcome 970
With sorwe, and axeth what hire eileth.
And sche with that hirself beweileth
Welmore than sche dede afore,
And seide, ‘Helas, wifhode is lore
In me, which whilom was honeste,324
I am non other than a beste,
Now I defouled am of tuo.’
And as sche myhte speke tho,
P. i. 75
Aschamed with a pitous onde
Sche tolde unto hir housebonde 980
The sothe of al the hole tale,
And in hire speche ded and pale
Sche swouneth welnyh to the laste.
And he hire in hise armes faste
Uphield, and ofte swor his oth
That he with hire is nothing wroth,
For wel he wot sche may ther noght:
Bot natheles withinne his thoght
His herte stod in sori plit,
And seide he wolde of that despit 990
Be venged, how so evere it falle,
And sende unto hise frendes alle.
And whan thei weren come in fere,
He tolde hem upon this matiere,
And axeth hem what was to done:
And thei avised were sone,
And seide it thoghte hem for the beste
To sette ferst his wif in reste,
And after pleigne to the king
Upon the matiere of this thing. 1000
Tho was this wofull wif conforted
Be alle weies and desported,
Til that sche was somdiel amended;
And thus a day or tuo despended,
The thridde day sche goth to pleigne
With many a worthi Citezeine,
And he with many a Citezein.
Whan themperour it herde sein,
P. i. 76
And knew the falshed of the vice,
He seide he wolde do justice: 1010
And ferst he let the Prestes take,
And for thei scholde it noght forsake,
He put hem into questioun;325
Bot thei of the suggestioun
Ne couthen noght a word refuse,326
Bot for thei wolde hemself excuse,
The blame upon the Duck thei leide.
Bot therayein the conseil seide
That thei be noght excused so,
For he is on and thei ben tuo, 1020
And tuo han more wit then on,
So thilke excusement was non.
And over that was seid hem eke,327
That whan men wolden vertu seke,
Men scholde it in the Prestes finde;
Here ordre is of so hyh a kinde,
That thei be Duistres of the weie:328
Forthi, if eny man forsueie
Thurgh hem, thei be noght excusable.
And thus be lawe resonable 1030
Among the wise jugges there
The Prestes bothe dampned were,
So that the prive tricherie
Hid under fals Ipocrisie
Was thanne al openliche schewed,
That many a man hem hath beschrewed.329
And whan the Prestes weren dede,
The temple of thilke horrible dede
P. i. 77
Thei thoghten purge, and thilke ymage,
Whos cause was the pelrinage, 1040
Thei drowen out and als so faste
Fer into Tibre thei it caste,
Wher the Rivere it hath defied:
And thus the temple purified
Thei have of thilke horrible Sinne,
Which was that time do therinne.
Of this point such was the juise,
Bot of the Duck was other wise:
For he with love was bestad,
His dom was noght so harde lad; 1050
For Love put reson aweie
And can noght se the rihte weie.
And be this cause he was respited,
So that the deth him was acquited,
Bot for al that he was exiled,
For he his love hath so beguiled,
That he schal nevere come ayein:
For who that is to trowthe unplein,
He may noght failen of vengance.330
And ek to take remembrance 1060
Of that Ypocrisie hath wroght
On other half, men scholde noght
To lihtly lieve al that thei hiere,
Bot thanne scholde a wisman stiere
The Schip, whan suche wyndes blowe:
For ferst thogh thei beginne lowe,
At ende thei be noght menable,331
Bot al tobreken Mast and Cable,332
P. i. 78
So that the Schip with sodein blast,
Whan men lest wene, is overcast; 1070
As now fulofte a man mai se:
And of old time how it hath be
I finde a gret experience,
Wherof to take an evidence
Good is, and to be war also
Of the peril, er him be wo.