I see a form, I see a face,

Ye weel may wi’ the fairest place:

It wants, to me, the witching grace,

The kind love that’s in her e’e.

O this is no my ain lassie,

Fair tho’ the lassie be;

O weel ken I my ain lassie,

Kind love is in her e’e.

She’s bonnie, blooming, straight, and tall,

And lang has had my heart in thrall;

And aye it charms my very saul,

The kind love that’s in her e’e.

A thief sae pawkie is my Jean,

To steal a blink, by a’ unseen;

But gleg as light are lovers’ e’en,

When kind love is in the e’e.

It may escape the courtly sparks,

It may escape the learnèd clerks;

But weel the watching lover marks

The kind love that’s in her e’e.