Corvetto pe le bertolose qualetate soje ’nvidiato da li Cortesciane de lo Rrè, e mmannato a deverze pericole, e sciutone co gran onore pe mmaggiore crepantiglia de li nemmice suoje, l’è data la Nfanta pe mmogliere.
S’erano cossì straformate l’auditure, nell’azziune de Belluccia, che quanno la veddero maretata, se fecero accossì alliegre, e ffestante, comme si fosse nata da li rine loro; ma lo desiderio de sentire Ciulla fece fare pausa a l’applauso, e stare sospese l’arecchie a lo moto de le llavra soje, che accossì parlattero.
Sentette na vota dicere, che Gionone pe ttrovare la Boscia jette ’n Cannia. Ma si uno mme dicesse, dove veramente se porria trovare lo fegnemiento, e la fraude, io non saperria ’mmezzarele autro loco, che la Corte, dove fanno sempre mascare, la mormorazione da Trastullo, la maledecenza da Graziano, lo trademiento da Zanne, e la forfantaria da Polecenella: dove a no stisso tiempo se taglia, e ccose, se pogne, ed ogne: se rompe, e ’ncolla: de le quale cose ve ne mostrarraggio schitto na retaglia a lo cunto, che ve farraggio ’ntennere.
Era na vota a li servizie de lo Rrè de Sciummo largo no Giovane muto da bene chiammato Corvetto, lo quale pe li buone portamiente suoje, essenno tenuto drinto lo core da lo patrone, era pe sta causa odiato, e ttenuto ’nsavuorrio da tutte li cortesciane; li quale essenno sportegliune de ’gnoranzia, non potevano mirare lo llustro de la virtù de Corvetto, che a ddenare contante de buone termene s’accattevava la grazia de lo Patrone. Ma l’aure de li favure, che le faceva lo Rrè, erano scirocche a la guallara de li crepate de ’nvidia, tale che non facevano autro pe ttutte li cantune de lo Palazzo, ed a tutte l’ore de mormorare, tataniare, vervesiare, ’mbrosolejare, e sforfecchiare sopra sto pover’ommo, decenno; Che ffattochiaria ha fatto a lo Rrè sto Caccia-l’appascere, che le vò tanto bene? Che ffortuna è la soja, che non è ghiuorno, che non aggia quarche refosa de favure? e nnuje sempre jammo all’arreto comme a li fonare, sempre scapetammo de connezione, puro servimmo comm’a ccane, puro sodammo comm’a zappatore, e ccorrimmo comm’a ddamme, pe ’nzertare a pilo a lo gusto de lo Rrè. Veramente besogna nascere fortunato a sto munno, e chi n’ha ventura se jetta a mmaro: all’utemo è fforza vedere, e ccrepare. Cheste, ed autre pparole scevano dall’arco de la vocca loro, le cquale erano frezze ’ntossecate, che devano a lo verzaglio de la roina de Corvetto. O negregato chi è connannato a sto ’nfierno de la Corte, dove le llosenghe se vennono a quatretto, le mmalegnetate, e li male afficie se mesurano a ttommola, li ’nganne, e li trademiente se pesano a ccantara. Ma chi pò dire le scorze de mellune de machine, che le posero sotto a li piede pe ffarelo sciuliare? chi pò sprecare lo ssapone de le fauzità, che ontaro a la scala de l’arecchie de lo Rrè pe ffarelo scapezzare, e rrompere la noce de lo cuollo? chi pò narrare le fosse de ’nganne scavate drinto a lo cellevriello de lo Patrone, e le ccoperte de sproccola de buono zelo, pe ffarelo derropare? Ma Corvetto, ch’era fatato, e bedeva le ttrapole, e scopreva le trappolle, canosceva le mmatasse, e s’addonava de li ntriche, de l’agguajete, de li mastrille, de le tramme, e de le ’mbroglie de l’avverzarie, steva sempre co l’arecchie pesole, e co l’uocchie apierte, pe no sgarrare lo ffilato, sapenno, che la Fortuna de li Cortesciane è bitriola: ma quanto cchiù ssecotava a ssaglire sto Giovane, tanto cresceva lo descenzo, e la scesa scoperta dell’autre, che non sapenno all’utemo de che muodo levarelo de pede, pocca lo ddirene male non era creduto, pensaro pe la strata de le llaude vottarennillo a no precipizio, (arte ’nventata a ccasa cauda, ed affinata nne la Corte) la quale cosa tentaro de la manera, che ssecota.
Stava lontano diece miglia da Scozia, dov’era lo Sieggio de sto Rrè, n’Uorco lo cchiù bestiale, e ssarvateco che fosse stato maje all’Orcaria, che ped’essere persequetato da lo Rrè, s’era fatto forte drinto no Vosco desierto ’ncoppa na Montagna, che mmanco nce volavano l’Aucielle: lo quale era tanto ’ntrecato, che non poteva maje recevere la vista de lo Sole: aveva st’Uorco no bellissimo Cavallo, che pareva fatto co lo penniello, e tra l’autre bellizze, non le mancava manco la parola, perchè pe ffatazione parlava comm’a nnuje autre. Ora li Cortesciane, che ssapevano quanto era marvaso l’Uorco, quanto aspro lo Vosco, e quant’auto lo monte, e la deffecortà d’avere sto cavallo, se nne jettero a lo Rrè, decennole menutamente le pperfezzione de st’Anemale, e che era cosa degna de Rrè, pe la quale cosa deveva procurare nn’ogne bia, e mmanera de levarelo da sotta le granfe dell’Uorco, e che ssarria stato buono Corvetto a ccacciarene le mmano, ped’essere giovene spierto, ed atto a scire de lo ffuoco. Lo Rrè, che non sapeva, ca mo sotta le sciure de ste pparole nc’era lo serpe, chiammaje subeto Corvetto, e le disse: se mme vuoje bene, vide ’n ogne cunto d’avere lo cavallo dell’Uorco nnemmico mio, ca te chiammaraje contento, e cconsolato d’avereme fatto sto servizio. Corvetto bè canoscette ca sto tammurro era sonato da chi male le voleva; puro p’obedire a lo Rrè, s’abbiaje pe la via de la Montagna, po trasenno guatto guatto a la stalla dell’Uorco, se ’nsellaje lo cavallo, e puostose ’n sella co li piede forte a la staffa, pigliaje la via da reporta, ma lo cavallo vedennose speronare fora de lo Palazzo, gridaje, allerta, ca Corvetto mme ne porta. A la quale voce scette l’Uorco co ttutte l’anemale, che lo servevano, tanto che de ccà te vedive no gatto maimone, da llà n’urzo de lo Prencepe, da chesta parte no lione, da chella no lupo menaro, pe ffarene mesesca. Ma lo giovane a fforza de bone sbrigliate, s’allontanaje da la Montagna, e cammenanno sempre de galoppo verzo la Cetate, arrivaje a la Corte, dove presentanno lo cavallo a lo Rrè, fu abbracciato cchiù de no Figlio, e puostose mano a na vorza, le nchiette le branche de pataccune, pe la quale cosa se fece na bona jonta de sgotta all’abeto de crepantiglia de li cortesciane, e dove primma abbottavano a ccannella, mò schiattavano a sciosciata de mantece, vedenno ca li sciamarre, con che pensavano de sfravecare la bona sciorte de Corvetto, servevano pe schianare la strata pe ll’utele suoje. Tutta vota sapenno, ca no a primma tozzata de macchena de guerra se rompe la muraglia, vozero tentare la seconna fortuna, dicenno a lo Rrè; sia co la bon’ora lo bello cavallo, che beramente sarrà l’onore de la stalla Reale, accossì avissevo lo paramiento dell’Uorco; lo quale è na cosa, che non se pò dicere, che la famma vosta porria ire pe le ffere, e nnesciuno autro porria accrescere sta recchezza a lo tresoro vuostro, autro che Corvetto, lo quale ’nce ave na mano pagarella a ffare ste sciorte de servizie. Lo Rrè, che ballava ad ogne ssuono, e de sti frutte ammare, ma ’nzuccarate, magnava schitto la scorza, chiammaje Corvetto, pregannolo a farele avere lo paramiento dell’Uorco, lo quale senza leprecare parola, ’n quatto pizzeche fu a la Montagna dell’Uorco, e ttrasuto senz’essere visto a la Cammara dove dormeva, se nasconnette sotto a lo lietto, ed aspettaje accovato, nfi che la notte pe fare ridere le stelle, fa no libro de Carnevale ’n faccie a lo Cielo, quanno essennose corcato l’Uorco, e la mogliere, sparaje zitto zitto la Cammara, e bolenno cottiarene la cotra de lo lietto perzì, commenzaje a ttirare chiano chiano, ma scetatose subeto l’Uorco, disse a la mogliere, che non tirasse tanto, ca lo scommogliava tutto, e l’averria fatto venire quarche ddoglia de matrone: anze tu scommuoglie a mme, respose l’Orca, che non m’è restato niente ’ncuollo. Dove diantane è la coperta, leprecaje l’Uorco, e ccalanno la mano ’nterra, toccaje la facce de Corvetto; e pe la quale cosa commenzaje a gridare; lo Monaciello, lo Monaciello, gente, cannele, corrite, a le quale vuce tutta la casa fu ssotta sopra. Ma Corvetto, ch’aveva jettato le rrobbe pe la fenestra, se lassaje cadere ’ncoppa ad esse, e fatto no bravo fardiello, toccaje a la vota de la Cetate, dove non se pò dire li carizze, che le fece lo Rrè, e la cottura, che n’appero li Cortesciane, ch’erano schiattate pe li scianche. Co ttutto chesso facevano penziero de dare adduosso a Ccorvetto co la retroguardia de le fforfantarie, e ttrovato lo Rrè, ch’era tutto cuocolo, pe lo gusto avuto de lo paramiento, li quale, otra ch’erano de seta regamate d’oro, ’nc’erano de cchiù storiate cchiù de millanta ’mprese de varie crapiccie, e penziere; e tra l’autre, si male non me allecordo, ’nc’era no Gallo ’nn atto de cantare pe l’Arba, che vedeva scire, co no mutto ’ntoscano (sol ch’io te miri) accossì ancora no sciore litroppio ammosciato, co no mutto Toscano (al calar del Sole). E tante, e tante, che nce vorria cchiù memmoria, e cchiù tiempo da contarele tutte. Trovato (dico) lo Rrè tutto prejato, e giubelante, le dissero; mentre Corvetto ha fatto tanto, e ttanto pe sservizio vuostro, non sarria gran cosa, che pe ffareve no piacere segnalato, ve facesse avere lo palazzo dell’Uorco, lo quale è da starence no ’Mperatore. Anze ha tanta miembre drinto, e pe ffora, che nce cape n’aserzeto: e non porrissevo credere li Cortiglie, li Suppuorteche, le Loggette, li gaife, le llatrine a carracò, e le ccemmenere a ttufolo, che ’nce songo co tanta Archetettura, che l’arte se ne picca, la natura se ne corre, e lo stupore nne sguazza. Lo Rrè ch’era de cellevriello figliarulo, che ssubeto se ’mprenava, chiammato Corvetto, le disse lo golìo, che l’era venuto de lo Palazzo dell’Uorco, e che tra tante guste, che l’aveva dato, ’nce agghiognesse sta refosa, ca l’averria scritto co lo carvone dell’obreco a la Taverna de la mammoria. Corvetto, ch’era no zorfariello, e ffaceva ciento miglia l’ora, se mese subbeto le gamme ’n cuollo, ed arrivato a lo Palazzo dell’Uorco trovaje ch’essenno figliata l’Orca, e fatto no bello Uorcheciello, era juto lo Marito a commetare li pariente, e la figliata auzatase da lo lietto, era tutta affacennata ad apparecchiare lo mazzecatorio, dove trasuto Corvetto co na facce de martiello, disse; ben trovato magna femmena, bella massara, e perchè straziarete tanto sta vita? Jere figliaste, e mmo fatiche tanto, e non aje compassione de le ccarne toje. Che buoje, che ’nce faccia, (respose l’Orca) si non aggio chi mm’ajuta? So ccà io (leprecaje Corvetto) pe ajutarete a ccauce, ed a mmuorze: Singhe lo buono-venuto (disse l’Orca), e pocca mme te si benuto ad offerire co ttanta ammorosanza; ajutame a spaccare quatto piezze de legna. De grazia (leprecaje Corvetto) si non bastano quatto siano cinco, e pigliata n’accetta ammolata de frisco ’n cagno de dare a lo ligno, dette a lo cozzetto dell’Orca, e la fece cadere comm’a piro ’n terra; e ccurzo subeto a la ’ntrata de la porta fece no fuosso futo futo, e copiertolo de frasche, e tterreno, se mese a fare le guattarelle pe ddereto la porta, e quando vedde venire l’Uorco co li pariente, se mese drinto lo Cortiglio a gridare: Testemmonia vostra, strunzo ’mmiezo, e biva lo Rrè de Sciummo-largo. L’Uorco, che sentette sta sbraviata, corze comm’a frugolo verzo Corvetto pe ffarene sauza, ma trasenno co ffuria drinto lo soppuorteco, tutte ’nzieme schiaffaro de pede a la fossa, e brociolate a bascio, dove a cuorpo de pretate nne fece na pizza, e chiusa la porta, portaje le cchiave a lo Rrè, lo quale visto lo valore, e lo ’nciegno de sto giovane, a le garge de la fortuna, a ddespietto de la nvidia, a sfastio de li Cortesciane, le dette la Figlia pe mmogliere, essennole state li travierze de la ’nvidia falanghe da varare la Varca de la vita soja a lo maro de le grannizze, e li nnemmice suoje restanno confuse, e ccrepate, jero a ccorcarese senza cannela,
Che la pena de n’ommo tristo assaje
Tricare pote, ma non manca maje.