Pe chiudetura de la ’ntroduzzione de li Trattenemiente, che sarrà lo Trattenemiento X. de la Jornata Quinta.
Conta Zoza la storia de li guaje suoje. La Schiava, che se sente toccare li taste fa fuorfece fuorfece, azzò no scompa lo Cunto. Ma lo Prencepe a dispietto sujo lo vò sentire, e scopierto lo trademiento de la mogliere, la fa morire prena, e bona, e se piglia Zoza.
Stettero tutte a rrecchie pesole a ssentire lo Cunto de Ciommetella, e parte laudaro lo sapere, co che l’avea contato, parte nne mormoraro, tassannola de poco jodizio, che non doveva ’n presenzia de na Prencepessa schiava, spubrecare li vituperie de n’autra simmele, e decevano, che s’era posta a no gran riseco de sconcecare lo juoco. Ma Lucia fece veramente da Lucia, cernennose tutta, mentre se contava sto Cunto, che a l’arteteca de lo cuorpo se consideraje la borrasca, ch’aveva drinto a lo core, avenno visto drinto no Cunto de n’autra schiava lo retratto spiccecato de le mmarcancegne soje: ed averria fatto scacare subeto la scommerzione; ma parte perchè non se poteva spesare de li Cunte, tanto fuoco l’avea puosto ncuorpo la Pipata, comme l’attarantato non se pò spesare de li suone. E parte pe non dare materia a Taddeo de sospettare, se gliottette sto veluocciolo, co penziero de farene a tiempo, ed a luoco no buono resentemiento. Ma Taddeo che l’era trasuto ngrazia sto spassatiempo, azzennaje a Zoza, che decesse lo sujo, la quale fatto la crejanza soja, decette.
La veretà, Segnore Prencepe, fu sempre mamma dell’odio, e perzò non vorria che l’obedire a li commanne vuostre offennesse quarcuno de chiste, che stanno ntuorno; perchè non essenno usata a fegnere nvenziune, ed a tessere favole, so costretta, e pe natura, e pe azzedente a dire lo vero; e si bè dice lo proverbio: piscia chiaro, e fa la fico a lo Miedeco: tutta vota sapenno ca la veretà non è rricevuta a la presenzia de li Princepe, io tremmo de dire cosa, che ve faccia fuorze nfomare. Dì chello che buoje, respose Taddeo, ca da ssa bella vocca non pò scire cosa, si no nzoccarata, e doce. Ste parole foro pognalate a lo core de la schiava, e n’averria mostrato signale, si le ffacce negre comme le ghianche fossero libro dell’arma, e averria pagato no dito de la mano ad essere diuna de sti cunte; perchè lo core l’era fatto chiù nigro de la facce, e dubetanno, che lo Cunto passato non fosse stato primmo annunzio, e po malanno, da la matina se zonnaje lo male juorno. Ma Zoza fra sto tiempo commenzaje a ncantare li circostante co la docezza de le pparole, contanno da lo prencipio a la fine tutte l’affanne suoje, accommenzanno appunto da la natorale malanconia soja, nfelice agurio de chello, che doveva passare; portannose da la connola la mara radeca de tutte le male sciagure, che co la chiave de no riso sforzato la sforzaro a tanta lagreme. Secotaje dapò la jastemma de la vecchia, lo pellegrinaggio sujo co tante angosce, l’arrivata a la fontana, lo chiagnere a bita tagliata, lo suonno tradetore causa de la roina soja. La schiava sentennola pigliare larga, e ritta, e bedenno la varca mal’abbiata, gridaje: Stare zitta, appilare, si no punia a ventre dare, e Giorgetiello mazzocare. Taddeo, che aveva scopierto paese, non appe cchiù fremma; ma levatose la mascara, e ghiettanno la varda ’n terra disse: Lassala contare fi ’n ponta, e non fare cchiù ste llevate de cappa de Giorgetiello, e Giorgione, ca all’utemo no m’aje trovato sulo: e si mme saglie lo senapo, meglio che te pigliasse rota de carro: e commannato a Zoza, che secotiasse a despietto de la mogliere; essa che non ne voze autro che lo zinno, secotaje la trovata de la lancella rotta, lo nganno de la schiava pe levarele da le mmano sta bona fortuna; e accossì decenno, scappaje a chiagnere de manera, che non fu persona llà presente, che stesse sauda a le botte. Taddeo, che da le lagreme de Zoza, e da lo selenzio de la schiava, ch’era ammotuta, comprese, e pescaje la veretà de lo fatto; e facenno a Lucia tale lavata de capo, che non se sarria fatto a n’Aseno, fattole confessare de vocca propia sto trademiento; deze subeto ordene, che fosse atterrata viva co la capo schitto da fora, azzò fosse cchiù stentata la morte soja, ed abbracciato Zoza la fece onorare comm’a Prencepessa, e mmogliere soja, facennose avisato lo Rrè de Valle-pelosa, che benesse a ste ffeste, e co ste nnove nozze termenaje la grannezza de la schiava, e lo trattenemiento de li Cunte, e buon prode nce faccia, e ssanetate, ch’io mme ne venne a pede a pede co na cocchiarella de mele.
SCOMPETURA.